Read Chang Naga EZRA 6 Bible Online

EZRA 6 - Chang Naga bible

EZRA 6

¹Kheijinei Dairas Chobaei ngühkhüm che kümbei hoba le thanshang Babilona phoshang ka lamyokei.

²Hobaje Ekbatanaa Mediabü provins Chobaeibü chema tulai che hapbei hoba khünei hai doan phobü hapbei:

³“Sairas Choba shaangboubü poa Sairas Chobaei ngühkhüm che kümbei; Jerusalema Mühghaüeibü chemshanga chem kho dangtiashi, kho haoenei haitibü lembü lemshang, kho chemshang kaangkhühtham ketiashi, kho suokla iknop saosem hoba photak iknop saosem.

⁴Laang yaangbü lin sem, hoba wa haanbü lin che hoba apbü nam kho Chobaeibü chem ka kutiashi.

⁵Hobaje tokei Jerusalema kibü lembüchem ka Nebukhadnezzarei sungbü Babilon to sungbabü Mühghaüeibü chema kibü hon hoba chandinam chaksiam kho nyibou kungaiashi hoba lulu phoshanga phoashi; hoba nyi khübü kho Mühghaü chema phojan.”

⁶“Tou khei yingsije shumang danan kibü governor Tettanai, Shethar-boznai hoba kaibü jenabou shuong Afrasabü aoyou shumang danjung hauan ki kan khüka bangashi;

⁷ho Mühghaüeibü chem kümsilei khei phoyoshi hoba Jihudabü governor hoba Jihudabü jaishou shuong ho Mühghaü chem hao kishanga dangtiashi.

⁸Tokei ho Mühghaü chem dangla shanga habü Jihudabü jaishou shuong to kanei ai kümla ngei ngühkhüm che kümda, Chobaeibü peisilei shuong ka hoba khei shumang danjung hauan kibü khüm yoshaibü ka khei haoen atoketla shanga khübü mütshuong la jih tükdea apbü nam kuashi.

⁹Hobaje haoen khambü ai ong ki, masu pongsu, sanlon paang hoba sanlon khuthük Mühghaü la haitibü lembüa jikla shanga whet youshou, jem, ih hoba onang Jerusalema ungshedbou shuongei hibü tegü atoknokko chalou angboua kuashi,

¹⁰khünei khuthük Mühghaü la ponlem teibü haitibü lembü kula shanga, hoba Chobaeibü langkei hoba haoeibü shousi shuong shanga welaula.

¹¹Tokei ngei ngühkhüm che kümda, khei aoyouei ho ngühkhüm jeileilaje haoeibü chem ka phokhüm che suan sungashi, hao phonan khünei khühashi; hoba kho shanga haoeibü chem od apshang la yeitishi.

¹²Mühghaü, aoei jembü nyen khünei phoan ki, Choba ayingsi laobou phangei ho ngühkhüm jeileilaje ayingsi ho Mühghaü chem Jerusalema leilutikula haujemlaje Mühghaüei tekan apshima. Ngo Dairasei ngühkhüm che küma; kho tükde ong kümtiashi.”

¹³Kheijinei shumang danjung hauan kibü Tettanai, governorei Shethar-boznai hoba haoen jenabou shuongei, Dairasei hautisije ho tegü pendou maangsangko kümbei.

¹⁴Hobaje thuseibü Hagai si Iddoeibü shou Zekhariaei thungeijangeiko songlenbü danko Jihudabü jaishou shuongei küpletthako kümbei hoba yeitikei. Hobaje Israel Mühghaüei sakkubü tegü hoba Sairas si Dairas hoba Persia Choba Artaxerkzesei ngühkhüm kubü tegü haoenei kümbei hoba kho kümsembei.

¹⁵Hobaje kho chem Adar lit semboubüa yeikei, laobou Dairas Chobaei songdakbü po lakboubüa kikei.

¹⁶Kheijinei Israel shousi shuongei ungshedbou shuong hoba Levi shuong hoba langsenbü shousi shuong joubü shuongei ho Mühghaü chem saüenbü olinbüei noukei.

¹⁷Hobaje ho chem saüenbüa haoenei masu pongsu saongao, sanlon paang saoan, hoba san shoushou saongao leiei lembei hoba Israelbü pendou shanga shabü lembü shanga lon paang anthüknyi, Israel chung anthüknyi shanga lembei.

¹⁸Hobaje Mosa ngühkhüma doan kibü tegü haoenei ungshedbou shuong haoen tan tan hoba Levi shuong jembü kümsilei tegü Jerusalema Mühghaü kümsilei shanga phoyokei.

¹⁹Hobaje shaangboubü lit anthük leibounyet langsenbü shousi shuongei püetbü lem likei.

²⁰Aishanga ungshedbou shuong hoba Levi shuongei haoen lolo liko saüenan kikei; haoen pendou hinseian kikei hoba haoenei langsenbü shousi shuong pendou shanga hoba haoeneibü jaisina ungshedbou shuong shanga hoba haoen jembü shanga püetbü san shoushou haitikei.

²¹Hobaje Israel shousi shuong langsenbü ka nyibou longeibü shuong hoba kaonyeka maialembü shuong ihinseibü ka aoyouei Israel Mühghaü BUNYUBOU lamla shanga bangenan ki, haoen pendouei shaukei.

²²Hobaje tokai ajinbü wentek lem olinbüei chalou nyet noukei, aieilausi BUNYUBOUei haoen olintikei, hoba haoeneibü ika Israel Mühghaü lembüchem kümaleia hau kitila haoen jungto Assiriabü Choba maangpon sepeitikei.