Read Chang Naga EZRA 7 Bible Online

EZRA 7 - Chang Naga bible

EZRA 7

¹Tou habü phainei, Persia Choba Artaxerkzesei songdakko kijinei Seraiaeibü shou Ezra, Azariaeibü shou Hilkiaeibü shou,

²Shallumeibü shou, Zadokeibü shou, Ahitubeibü shou,

³Amariaeibü shou, Azariaeibü shou, Maraloteibü shou,

⁴Zerah- iaeibü shou, Uzzieibü shou, Bukkieibü shou,

⁵Abishuaeibü shou, Finehaseibü shou, Elea- zareibü shou, Aron thükkabou ungshedboueibü shou

⁶ho Ezra Babilon ka longkei; hoba Mosa ngühkhüma shetenbü dobou che kikei, laobou BUNYUBOU Israel Mühghaüei kukei, hoba BUNYUBOU haoeibü Mühghaü hao thüka kisije haoei phebü pendou Chobaei sengkukei.

⁷Hobaje Artazerkzes Choba po nyetboubüa Israelbü shousi shuong at, ungshedbou shuong, Levibü shuong, hoba chia laubü shuong, hoba koukhün lombü shuong, hoba lembüchem khangenbü shuong Jerusalem to angkei.

⁸Hobaje hao Jerusalem to lit ngaoboubüa loukei, laobou Choba po nyetboubüa kikei.

⁹Aishanga shaangboubü lit shaangbounyet haoei Babilon to angla khangkei, hoba lit ngaoboubü shaangbounyet haoeibü Mühghaüeibü ik maibü hao thüka kisije, Jerusalem to hao loukei.

¹⁰Aishanga Ezraei BUNYUBOUeibü ngühkhüm jungeila hoba kho kümla, hoba Israela takletbü ngühkhüm hoba matjem lenla haoei maangshikko kikei.

¹¹Tou ungshedbou Ezra, dobou hoba BUNYUBOU ngühkhüma hoba Israelbü la kubü sengkubü ngühkhüma shetenbü hao la Artazerkzes Chobaei kubü le ho;

¹²“Artazerkzes, Choba shuong thüka Chobaei Ezra ungshedbou, khuthük Mühghaü ngühkhüm dobou jungto:

¹³Tou ngei ngühkhüm che kümda, khei Israel mütli atei ayingsi ngeibü sanglea haoen ungshedbou shuong hoba Levi shuong aoei Jerusalem to haula maang angan ki ka yoa haula thükkei.

¹⁴Aieilausi Chobaei haoeibü songsido kubü müt nyetei Jihuda hoba Jerusalem shanga kaibü ika kibü kaibü Mühghaüeibü ngühkhüm tegütham phanyola hautian kia.

¹⁵Hobaje Choba si hao la songsido kubü shuongei Israel Mühghaü, ao Jerusalema kida, hao la maangnyu angko chandinam hoba hon kubü jungan haulabü.

¹⁶Hobaje nyi Babilon provins pendoua hapbü chandinam si hon mütli hoba ungshedbou shuongei maangangko lembü haoeneibü Mühghaü chem laobou Jerusalema ki, kho shanga maangangbü lembü yoan jungan haulabü.

¹⁷Kho khei yingsije nyi aeibou sonanepbo khoeibü namei masu pongsu, sanlon paang hoba sanlon shoushou shuong haoeneibü shausiyung lembü hoba yunglabü lembü jeklabü hoba Jerusalema kibü kaibü Mühghaü chem lemshanga khübü kho lemashi.

¹⁸Hobaje joubü chandinam si honei ka thedanga hoba kaibü jaisina thedanga ai maikei dogo damda kho kaneibü Mühghaüei maangangbü tegü kümashi.

¹⁹Hobaje chaksiam kaibü Mühghaüeibü chem kümsilei shanga ka la kubü kho nyi Jerusalem Mühghaü thedanga khümbo kuashi.

²⁰Hobaje tokei kaibü Mühghaüeibü chem shanga ai ong khambo ki, kho nyi Chobaeibü namphot ka apshi.

²¹“Hobaje ngei khei ngo Artazerkzesei shumang danan kibü namthanbou pendou jungto ngühkhüm che kümda, khei Ezra ungshedbou, khuthük Mühghaüeibü ngühkhüm dobouei ai ong kan ka khambo yeilaje, kho tongde kümshi.

²²Chandinam seret khujin atbü saongao sühko, whet youshou saongao sühko, onang ihlechak saongao sühko hoba jemje lajuche dogo wean achühko kuashi.

²³Khuthükbü Mühghaüei ai ong sengkuda, tükde khei ong khuthük Mühghaüeibü chem shanga kümtiashi, aishanga aila Choba hoba haoeibü shousi shuong sangle thüka Mühghaü maangshat kitila?

²⁴Tokei künei ho sakkuda, ungshedbou shuong, Levi shuong, chia laubü shuong, koukhün lombü shuong, lembüchema kibü shuong ayingsi ho Mühghaüeibü chema khangenbü at to ongkei khüm, kayang, lotsang khangla ngühkhüm aki.

²⁵“Aeila leko, Ezra, nyi Mühghaüeibü songsido ka to kibü thüng nyi kümashi; shumang danan kibü mütli pendou mat jemlabü governor si matjembü shuong pienashi, khei kaibü Mühghaüeibü ngühkhüm ngebü pendou hoba habü angebü to kanei lenashi.

²⁶Hobaje aoyouei kaibü Mühghaüeibü ngühkhüm ajungeilaje hao thükto matjem tükde kuashi, hailabü yingsije, kaonyek ka nangan apbü yingasikei, peisilei sobü yingasikei ayingsi thüngshanga pholabü yingasikei.

²⁷BUNYUBOU seneibü pisibou Mühghaü haübou yingshi, aoei ho tegü Chobaeibü maang- pona Jerusalema kibü BUNYUBOUeibü chem hemaitila jinkukei.”

²⁸Hobaje kü la Choba si hao la songsido kubü shuong thedanga hoba Chobaeibü yaangbou leiyeibü shuong thedanga onou lenkei. Hobaje BUNYUBOUeibü ik kü thüka kibü thüng ngei hau kitikei, hoba ngei Israel ka kongnyu shuong kü yoa angla liko leishaikei.