Read Chang Naga EZRA 9 Bible Online

EZRA 9 - Chang Naga bible

EZRA 9

¹Tou khübü kümsilei küman phaia kongnyu leiyeibü shuong kü jungto nyangko louan laukei, “Israel mütliei, ungshedbou shuongei, Levibüei, kaonyeka kibü shuongei, Kananbü, Hitbü, Perizbü, Jebusbü, Ammonbü, Moabbü, Ijepbü, Amorbü, mangsenlabü kümsilei ka abangko kia.

²Aieilausi haoen shanga, haoeneibü shousi shuong shanga, haoeneibü nouyangshou shuong yakla lea, ho tegü saopobü phang kaonyeka kibü shuong yoa haoen lolo kheinepnyu apa, haü, kongnyubou shuong hoba songdakbü shuongei ong shaang leiluda.”

³Hobaje ngei ladang habü kümsilei ditkei, ngei ngeibü nei hoba ngeibü mangyuk jitnyinkei, hoba ngeibü khu ka khulou hoba sembung wi khekei, hoba phenyembo setkei.

⁴Kheijinei langsenbü shuongei shed shonbü shanga Israel Mühghaü ngüha hatbülühbü weko kü jungto kamshaikei, hoba nangnak lembü jih asühshongko ngo maangpangan apan setkei.

⁵Hobaje nangnak lembüchema ngei ngeibü mühei nyengbü ka khei ngeibü nei hoba mangyuk jitnyinan meimeikei; hoba ngeibü youküka khüpetkei hoba BUNYUBOU ngeibü Mühghaü jungto ngeibü ik shingkei.

⁶Hobaje ngei laukei, “O ngeibü Mühghaü, ka jungto ngeibü the phühenla ngo himouda, hoba thenyek saklangtham apda, ngeibü Mühgha, aieilausi küneibü khua küneibü shabü aei yeia, hoba küneibü shedbü müha onlanga.

⁷Küneibü pisibou haang ka tat sühko kün aeibou shabüa kia aishanga küneibü shedbü haangjung küneibü Choba shuong si ungshedbou dan küsithang Choba shuongeibü ika inei hailabü hoba langsenbü to haulabü, soshau soyungtilabü hoba tat tegü himoutila khümbo kua.

⁸Hobaje tou jih tuisho shanga joubü cheje satenlabü, hoba haoeibü saopobü kaoena satenshang che la yeian phokulabü, khei küneibü Mühghaüei küneibü nyek ngesaktikulabü hoba aaothu ka hakso hapla BUNYUBOU küneibü Mühghaü ka onou lena.

⁹Aishanga kün aaothua kibü shuong, khei yingasikei küneibü Mühghaüei kün aaothua üpyo, lausikei kün han khangettila küneibü Mühghaü chem loentila hoba ho leilubü kümetla hoba Jihuda si Jerusalema kümla kümthen che jinkula shanga Persiabü Choba shuong thedanga kün la üeisanou haptikei.

¹⁰“Hobaje tou, O küneibü Mühghaü, ho phaia künei ai laula? aieilausi künei nyi sakkubü inletnyu apa,

¹¹laobou no khangenbü thuseibü shuongei sengkuko laukei, ‘Kanei lela haubü kaonyek kho kaonyeka kibü mütli asaopobü danko asaopobü kaonyek ki, haoen mangsenlabü shuong danko laobouei kho ji thon ka ji thon sühko haoen ahinseibüei shenan kia.

¹²Tou khei yingsije kaneibü nouyangshou shuong haoeneibü bousu shuong la teleti, ayingsi haoeneibü yaksashou shuong kaneibü shousi shuong la teleti, ayingsi kanei ladangkei haoeneibü jiyophaiyo ayingsi naangmaibü telam; khünei kan hau kilabü hoba kaonyek ka maibü shaulabü hoba kho kanei phet phanla ponpen shanga phokulabü.’

¹³Tou küneibü amaibü kümsilei hoba shed yaangbü shanga ho pendou kün thükto louasikei no küneibü Mühghaüei küneibü shedbü mu thüng ayingko shibouei kün shieikoekei, hoba ho tegü joubü kün la kusije,

¹⁴nyibou künei kaibü sakkubü shuong leilulep sai? Hobaje habü mangsenlabü kümbü mütli yoa bukyo haayolep lo? Joubü che ongkei üpyokulabü lele ayingsi che ongkei asatenlabü lele nyi kün amauti shongko nyi kün to khau üanglep lo?

¹⁵O BUNYUBOU, Israel Mühghaü, no ngühmaanglanbü ki, aishanga tat kibü tegü kün satenan kibü joubü apyoan kia; chühashi, ka thedanga kün shabüa kia, khei yingbü khoei aokei ka thedanga lola athük.”