Read Chang Naga NEHEMIA 1 Bible Online

NEHEMIA 1 - Chang Naga bible

NEHEMIA 1

¹Hakaliaeibü shou Nehemiaeibü ngüh, tou Kislev lit, po saoche boubüa ngo Susaa Chobaeibü chema kijinei,

²ngeibü jaisina yoa Hanani hoba haoeibü jenabou at Jihuda kaodak ka kü jungto loukei, hoba ngei haoen to Jihudabü joubü aoyou langsenbü ka satenkei haoen hoba Jerusalem shangabü phekei.

³Hobaje haoenei kü to laukei, “Laplangan jouan kibü shuong ho kaonyeka khonku yaang hoba shieikoe thua kia. Jerusalem sangnyu kümthang sakleda hoba ho sangnyu wanei lona.”

⁴Hobaje ngei ladang habü ngüh ditkei, ngo setkei, hoba haapbei hoba chalou shisho mang haapbei. Hobaje ngo mühei nyengkei hoba khuthük Mühghaü thedanga welaukei hoba laukei,

⁵“O BUNYUBOU, khuthük Mühghaü, yaangenbü hoba hatlamoklabü Mühghaüei hao to sanoubü to hoba haoeibü ngühkhüm jungeibü to thebülanbü hoba onou lenda.

⁶No khangenbouei welaubü ditlabü lele sanoudambo kaibü nou haangbüma hoba kaibü nyek ipbushima; tou welau kho change nangnak ngei ka jungto hautida, kho no khangenbou Israel shousi shuong shanga Israel shousi shuongei kümbü shedbü laobou künei kakhu limbo küma, ho ngei ka thedanga thekuda, haü! ngo hoba kübou chemdangei shed shona.

⁷Künei kakhu limbo leilubü juong küma, hoba no khangenbou Mosa la laobou ngühkhüm shuong hoba matjem nyi ai sakkukei khübü kho künei haangeilamei ajungei.

⁸Ngei sudajada, nyi no khangenbou Mosa la sakkuko laubü ngüh ho damenshima, ‘Kanei shed shonalonga ngei kan phangshuong yoa phinnyintilabü;

⁹lausikei kan kü jungto sepeinyu longeialonga hoba ngeibü ngühkhüm shuong phoalonga hoba jungeialonga inletnyu apbü mütli kho kaodak saabüa hauan kiasikei ngei haoen khüka leishailabü.’

¹⁰Tou habü ho no khangenbou hoba mütli, aoyou nyi kaibü hau yaangbü hoba kaibü ik shoulobüei angthetan phokei.

¹¹O BUNYUBOU, ngei ka to sudajada, tou no khangenbouei welaubü hoba ka nyen to souhatla maangdakbü no khangenbü shuongeibü welau nyi ditkushima; ngei ka to welauda, tat chaloua nyi no khangenbou püngko juongko thüksimin kitishi hoba ho müt thedanga hao onou haptishima.” (Tou ngo Chobaeibü thung jungbou kikei).