Read Chang Naga NEHEMIA 12 Bible Online

NEHEMIA 12 - Chang Naga bible

NEHEMIA 12

¹Tou ungshedbou si Levibü aoyou Shealtieleibü shou Zerubbabel hoba Jeshua yoa haukei haoeneibü nyen; Seria, Jeremia, Ezra,

²Ungshedbou shoung: Amaria, Malluk, Hattush Shekania, Rehum, Meremot Iddo, Ginnethon, Abija Mijamin, Moadia, Bilga Shemia, Joiarib, Jedia Sallu, Amok, Hia, Jedaia chaloua khübü kho ungshedbou chungthem hoba haoeneibü jaisinasi shuong kikei.

⁸Levibü shuong: Jeshua Binnui, Kadmiel, Sherebia, Jihuda hoba Mattania, ao chia laubü dan leiyeibü kikei, hao haoeibü jaisinasi shuong.

⁹Tokei haoeneibü jaisinasi Bakbukia si Unni ham haoen thedanga lokei

¹⁰Hobaje Jeshua ka Joiakim pakkei

¹¹Eliashib ka Joiada pakkei, hoba Joiada ka Jonathan ka Jaddua pakkei.

¹²Hobaje Joiakim chaloua ungshedbou shuong bou lin nyek weko ka kongnyubou pienkei: [Ungshedbou] — [Chung] Meraia — Seraia Hanania — Jeremia Meshullam — Ezra Jehohanan — Amaria Jonathan — Malluk Shekania — Josef Adna — Harim Helkai — Meremoth Zekharia — Iddo Meshullam — Ginnethon Zikhri — Abija Abija — Miniamin Piltai — Moadia Shammua — Bilga Jehonathan — Shemaia Mattenai — Joiarib Uzzi — Jedaia Kallai — Sallu Eber — Amok Hashabia — Hilkia Nethanel — Jedaia

²²Levibü Eliashib, Joiada, Johanan hoba Jaddua chalou ka Persiabü Choba Darias songdakbü chalou sühko püshi lin nyek weko kongnyu nyen doan kikei.

²³Levibü shousi shuong püshi lin khushen weko ka kongnyu nyen khei Eliashibeibü shi Johanan chalou sühko lüngbüdobü lea doan kikei.

²⁴Tokei Levi phanga kongnyu shuong: Hashabia, Sherebia, hoba Kadmieleibü shou Jeshua hoba haoeneibü jaisinasi shuong Mühghaü hangangbü Dawid Chobaei sakkubü ngühkhüm tegü nyensang kubü kümaleia janyinbü wekoa chühbou kikei.

²⁵Thanshang shemjanga koukhün lombü shuong kho Mattanaia, Bakbukia, Obadia, Meshullam, Talmon hoba Akkub kikei.

²⁶Habü, ho Jeshuaeibü shou Joiakim, Jozadakeibü shi haoeibü jiha hoba governor Nehemia hoba dobou Ezra jihsiphaia kikei.

²⁷Hobaje Jerusalem kümthang saüenbü chaloua kongkin, pithung, kaangjin jungeiko nyensang chia laubüei saüenbü lem kho lemlemtila shanga kaoen pendou ka Levibü phang shuongei lambo Jerusalem to leishaikei.

²⁸Hobaje chia laubü heshou shuong Jerusalem kaijembo pholi kaonyek hoba Netofath kaonyek juong ka takshatkei.

²⁹Tokei Bethgilgal hoba Azmavet si Giba ham kaonyek ka loukei, aieilausi chia laubü shuongei Jerusalem kaijembo haoeneibü sang sangkei.

³⁰Hobaje ungshedbou si Levibü haoen lolo saüenkei; hoba haoenei bakhün kümthang hoba khübü mütli saüenkei.

³¹Kheijinei ngei Jihudabü yaangbü shuong kümthang thükaenei leishaikei, hoba nyensang kuko khong shoongko haula tan yaangbü penyi pienkei; tan che kümthang mae aeto od apshang bakhün aeto haukei;

³²hoba haoen phainei Hosheia hoba Jihudabü jamde,

³³hoba Azaria, Ezra, Meshullam,

³⁴Jihuda, Benjamin, Shemaia, Jeremia

³⁵hoba ungshedbou shousi shuong at teklaang yoa haoeneibü nyen Jonathaneibü shou Zekharia, Shemaiaeibü shou Mattaniaeibü shou, Mikaiaeibü shou, Zakureibü shou, Asafeibü shou;

³⁶hoba haoeibü jaisinasi shuong Shemaia, Azarel, Milalai, Gilalai, Maai, Nethanel, Jihuda, Hanani, Mühghaü müt Dawid shangabü kongkin phang lulu yoan sembei, hoba dobou Ezra haoen thedangto haukei.

³⁷Hobaje haoenei Deibak Bakhün ka Dawideibü chem thüka kibü kümthang to longshang Dawideibü sangnyu henyu dogo laubü lamnyu to chanyu angbou aenei kibü Deibak Bakhün sühko angkei.

³⁸Hobaje nyensang kuko khong shoongan nyiboubü tan kho haoen to haüyola haukei, hoba haoen phaia ngo hoba kümthang thükaenei kibü mütshuong jamde wanhap lapheishon thük ka phaangyaangbü kümthang kho sühko hukjung angkei.

³⁹Hobaje Efraim Bakhün thükae ka hangbü bakhün si Ngau Bakhün ham hoba Hananel si Hamnea lapheishon ham danko San Bakhün sühko angkei hoba bakhün lombü thedanga küpjemetnyu atopeiko lokei.

⁴⁰Kho tegü Mühghaüeibü chema nyensang kubü dan ham lokei, hoba ngo hoba songdakbü shuong jamde thüng,

⁴¹hoba ungshedbou shuong; Eliakim, Maaseia, Miniamin, Mikaia, Elionai, Zekharia, Hanania, haoeneibü teklaang jungkei,

⁴²hoba Maaseia, Shemaia, Eleazar, Uzzi, Jehohanan, Malkija, Elam, Ezer yoan lokei. Tokei chia laubü shuong haoeneibü leiyeibou Jezrahiaei leian chia kaangko lauko lokei.

⁴³Khünyet Haoenei lembü yaang kuko aeibou olinyokei; aieilausi kho tegübü olinbü yaangbü kienlabü kho Mühghaüei haoen to olinkei; hoba kho olinbüa yaksa hoba nashou hanbü shuong yoan olinyokei, khei kho Jerusalema olinyobü kho saabü ka kei ditko kikei.

⁴⁴Tokei khünyet ong ungshedbou hoba Levibü shanga ngühkhümei sakkubü pienan kibü tegü sek ka haujem lembü shaangbü buhek lembü, hoba an phejan lembü yoshaila hoba thanan phola shanga thanshang shemjang lulu thüka müt pienkei; aieilausi Jihudabüei ungshedbou hoba Levibüei khangenbü to olinyokei.

⁴⁵Hobaje Dawid si Solomon haosi hamei khangenbü ngühkhüm tegütham haoenei chia laubü si koukhün lombü shuong yoan haoeneibü Mühghaü hoba saopoenbü lem kho kaangko sungletkei.

⁴⁶Aieilausi Dawid haanga hoba shangied Asaf chaloua chia laubü yoa pienbü che kikei, hoba Mühghaü shanga nyensang hoba olinbü chia kikei.

⁴⁷Hobaje Zerubbabel si Nehemia haosi ham chaloua Israelbü khümboei chia laubü si koukhün lombü la chalou angbou haoen khambü hoba haplabü phejan ai khokei den lulua janan phokei hoba Levibüeikei Aroneibü shousi shuong phejan kho phangche pienan phokei.