Read Chang Naga NEHEMIA 13 Bible Online

NEHEMIA 13 - Chang Naga bible

NEHEMIA 13

¹Kho chaloua haoenei shuong thedanga Mosaeibü ngühkhüm le ka wekei hoba khünei Ammonbü si Moabbü ladangkei Mühghaüeibü lembü- chem to loula athük dogo doan kikei.

²Aishanga haoenei Israel shousi shuong to shausiyung si dei sungjung louan ühaüyo; lausikei haoen khulimbo khüksiuok ngüh laula shanga haoenei Balaam la munam kukei; yingsikei küneibü Mühghaüei shedsikhau kho haülabü yeitikei.

³Ladang haoenei ngühkhüm kho ditkei, kheijinei kheinepan kibü dan pendou kho Israelbü ka bangnyinkei.

⁴Kho thedangto ungshedbou Eliashib, ao Mühghaüeibü chem shemjang pendou thüka bunyu pienkei,

⁵haoei Tobia to jailanala yeian shemjang yaangü che, lanei shangied shausiyung lembü, jen, thungsiphau an phejan lembü, youshou, ih, hoba onang phoshang Levibü la chia laubü si koukhün lombü la ngühkhümei yoshaikubü hoba haujem lembü ungshedbou shanga yoshaibü khübü pendou phoan kikei.

⁶Kho jih pendoua ngo Jerusalema akitei, aieilausi Artazerkzes Babilon Choba po khujinto nyi boubüa ngo Choba jungto haukei hoba chalou shisho kian phaia Choba to sudi phekei,

⁷hoba ngo Jerusalem to louan phaia Eliashibei Mühghaü chema shemjang che kubü danko Tobia shanga ai shedbü kümbei kho ngei ditenkei.

⁸Khoei ngo aeibou maangto shatkei, hibü ngei Tobiaeibü peisilei pendou shemjang khüka sungan apbukei.

⁹Kheijinei ngei ngühkhüm kukei hoba haoenei shemjang kho saüenkei, hoba Mühghaüeibü chem thungsiphau hoba tokei shausiyung lembü si jen pendou kho shemjang khüto ngei nyibou sungbakei.

¹⁰Hobaje Levibü la haoeneibü phejan akubü ngei hapbei, hibü Levibü si chia laubü shuong haoeneibü kümsilei apyoan mütpem weko lulueibü sek to satkhüman kikei.

¹¹Kheijinei ngei songdakbü shuong to hakkei hoba laukei, “Aila kanei Mühghaüeibü chem tekan apda?” Hobaje ngei haoen pendou nyibou leishaikei hoba mütpem weko haoen lulueibü kümaleia phongaikei.

¹²Kheijinei Jihudabü pendouei an phejan youshou, ih, hoba onang thanshang to sungbakei.

¹³Hobaje ngei ungshedbou Shelemia, dobou Zadok hoba Levibü yoa Pedaia dogo thanshanga ikjaibü yeitikei, hoba haoen phanga thuiyolabü lele, Mattaniaeibü shou, Zakureibü shou Hanan pienkei. Aishanga haoen to maang lemenan kikei, hoba jaisinasi shuong la janan kubü kho haoeneibü kümsilei kikei.

¹⁴O ngeibü Mühghaü, ho kümsilei shanga ngo damenashi, hoba ngeibü Mühghaü chem shanga ngei kümbü kümsilei maibü hoba ngei thounoubü kho nyi haman tüpbuma.

¹⁵Khübü chaloua Jihuda kaodaka mütshuongei Nounyet semlüh nitbü youthep künbü hoba gadu la on küntibü ngei hapbei; tokei ih, semlüh, bhuk hoba lubü on juong Nounyet Jerusalem to sungbabü ngei hapbei; hoba ngei kho chaloua shausiyung yaakbü ngei thangetkei.

¹⁶Tokei khünei Tairbü aoyou kikei, haoenei Nounyet ngau hoba lubü peisilei phang juong sungbaan Jihudabü la Jerusalema yaakko lekei.

¹⁷Kheijinei Jihudabü leiyeibü to hakko laukei, “Kanei Nounyet shatiko aila shabü kümsilei ho jungeida?

¹⁸Kaneibü pisiboueikei hai amaibü aküm lo? hoba kho laüa sen jungto hoba ho sangnyu to habü khonsak khonku thu Mühghaüei sungbakei aying lo? Khei yingsikei kanei Nounyet leilubü haangjung Israelbü jungto khonku aei sungbada.”

¹⁹Ladang Jerusalem bakhün Nounyet thedangto chasemlamto jijimomo aplaje bakhün pendou khinlabü hoba Nounyet chalou adankhüm shongko aipla ngei ngühkhüm kukei, hoba ngeibü khangenbü at ngei koukhün lombü yeitikei hoba ai on yinglaje yingsikei Nounyet asungetti.

²⁰Kheijinei namyaak namseibü shuong Jerusalem kümthang thükaenei che nyinei sühko otkei.

²¹Kheijinei ngei haoen to laukei, “Kan aila kümthang nyangko setda? Kan nyibou kho tegü ong yensüh kümalonga ngei kan to ik atngailabü.” Kho phaiaje haoen Nounyet alou.

²²Hobaje ngei Levibü to haoen lulu lolo saüenjan dogo hoba Nounyet saopoan phola shanga haoenei koukhün kho lomjan dogo ngühkhüm sakkukei. O ngeibü Mühghaü, ho shangakei nyi ngo damenshima hoba kaibü sanou yaangbüei ngo khümenkaima.

²³Tokei kho jiha ong Jihudabüei Ashdod, Ammon hoba Moabbü sao to chemdang yeibü ngei hapbei,

²⁴hoba haoeneibü shousi jamdeei Ashdodbü ngühyem laukei, hoba Jihudabü ngühyem alauenen, lausikei phang wekoei lulueibü ngühyem laukei.

²⁵Hobaje ngo haoen to wetyokei hoba khükkei uokkei hoba attoje ngümbei hoba khuloukei thapan apbukei, hoba Mühghaü nyena hai lauko thelettikei, “Kanei kaneibü nouyangshou haoeneibü shousi shuong shanga akujan, ayingsi haoeneibü nouyangshou kaneibü bousu shousi shuong shanga hoba kan shanga alejan.

²⁶Israel Choba Solomonei kho tegübü kümsilei kümbü danko shed shonjung loukei aying lo? Khei yingasikei phang juong yoa hao phatbü Choba aokei akitei, hoba Mühghaüei hao to sanoukei hoba Israel khümbo thüka Choba yeitikei; khei yingsikei haokei küksithang sao lebü danko shed shonkei.

²⁷Khülonga künei kan to küksithang sao danko seneibü Mühghaü to shed shonla hoba kho tegü kümsilei amaibü kümla lenlep sai?”

²⁸Hobaje Joiadaeibü shisi yoa che ungshedbou chungthem Eliashibeibü shou Horonbü Sanballateibü kounyang kikei, hibü ngei hao kü thedang ka shieikei.

²⁹O Mühghaü, haoen damenshima; aishanga haoenei ungshedbou setshang, Levibü hoba ungshedboueibü theyolanyobü kümsilei khulimbo küma.

³⁰Kho tegü ngei haoen pendou küksithang ka panthetan hoba saüenan yeitikei hoba ungshedbou si Levibü lulueibü kümaleia ikphen lamtikei.

³¹Hobaje buhek lembü si shaangbü buhek lembü shanga jih kho janenkei. O ngeibü Mühghaü, ponpen shanga nyi ngo damenshima.