Read Chang Naga NEHEMIA 2 Bible Online

NEHEMIA 2 - Chang Naga bible

NEHEMIA 2

¹Artazerkzes Choba po saoche boubü, nisan lita ladang ih hao thedanga phoan kikei, kho thedangto Choba junga ngei ladangkei maangto shatko lenan achüh.

²Hobaje Chobaei kü to laukei, “No shatbü ayingnyu lai küman kaibü thenyek angesakda? Ho lubü aying lausikei maangpona maangshat kibü ka ong.” Kheijinei ngo aeibou hatko kikei.

³Hobaje ngei Choba to laukei, “Choba salangko kishima: ladang ngeibü pisibou khünshang lusakan leilubü thua ki, hoba sangnyu kümthang hoba bakhün pendou lonan apan ki, kheijinei ngo maangto shatbü thenyek ayembo kienlep lo?”

⁴Kheijinei Chobaei kü to laukei, “Nyi ai phemang sühda?”

⁵Kheijinei ngei khuthükbü Mühghaü to welaukei, hoba ngei Choba to laukei, “Chobaei maang angalonga hoba no khangenbouei subüjabü janbü dogo damalonga kübou khünshang Jihuda kaodak leilubü kho kümetla ngo hautila sakkushi.”

⁶Kheijinei, chobasao hao junga setan kian, Chobaei kü to jongaiko laukei, “Kaibü lam kho lalokche haula hoba no ladang sepeinyu longeila?” Chobaei ngo hautila maangangsi, ngei jih kho janenkei.

⁷Tokei ngei Choba to phekei, “Chobaei maang angalonga Eufrates Shumang thi aedanga kibü governor shuong jungto sakkubü le, ngo Jihuda kaodaka asühshongko danjung haula sakkushi dogo dokula sudajada.

⁸Tokei Chobaeibü lamang chühbou Asaf jungto lembüchem lapheishon bakhün, sangnyu kümthang pangkhüm kongnyu bu pendou kula sakkula shanga le che Chobaei dokula sudajada.” Hobaje Mühghaüeibü thuibü yoan ngeibü khambü pendou Chobaei sakkuenkei.

⁹Kheijinei ngo Eufrates Shumang danan kibü governor shuong jungto haukei hoba Chobaeibü le haoen la lenkei. Chobaei ngo hangla sepai hoba koli leiyeibü shuong hautikei.

¹⁰Hobaje Horonbü Sanballat hoba khangenbü Tobia, Ammonbü songdakbü, haosi hamei Israelbü thounoula müt che louada dogo ditan aeibou khauangkei.

¹¹Kheijinei ngo Jerusalem sühko loukei hoba khünei chalou semnyet kikei.

¹²Hobaje ngo nangnak meimeikei hoba müt at kü phai sembei. Jerusalem shanga ai ong kümla Mühghaüei ngeibü maangpona metan jinkukei, kho ngei aolakei alen hoba ngo setbü shatsinam to liman lubü shatsinam kü yoa akitei.

¹³Hobaje ngo nangnak pholi bakhün, Selongeibü yungdei kishang hoba od apshang bakhün aeto haukei hoba leilubü Jerusalem kümthang hoba khünei lonan apbü bakhün kho limchühkei.

¹⁴Kho phaia ngei deikük bakhün hoba Chobaeibü dei dangshang sühko haukei; lausikei khünei ngo setbü shatsinam phoshang kaoen akitei.

¹⁵Kheijinei ngo nangnak shumang che to angkei, hoba kümthang kho limchühkei, hoba ngo nyibou yomang bakhün aeto sepeinyu ngaikei.

¹⁶Kheijinei ngo laeto ong haukei, ai kümsilei ong kümbei, leiyeibü shuongei ange; aieilausi kho shangabü ngei tokei Jihudabü ungshedbou, yaangenbü, songdakbü hoba lubü müt aolakei mo alenko kikei.

¹⁷Kheijinei haoen to laukei, “Kanei sen maangmau thua kibü hapda, Jerusalem lai leiluan hoba kho bakhün lonan apan ki; kaiya, Jerusalem sangnyu kümthang kho senei kümetkho, khei yingalonga sen himoua akilabü.”

¹⁸Hobaje ngeibü Mühghaüei kü to maibü hoba Chobaei kü to lenbü ngüh pendou haoen to lenkei. Kheijinei Haoenei laukei, “Kaiya, sen meimeikho hoba chem kho dangetkho.” Kheijinei kümsilei maibü shanga haoen hau kingaikei.

¹⁹Lausikei ladang Horonbü Sanballat hoba khangenbü Tobia Ammonbü songdakbü hoba Arabbü Geshem, haoenei ho ditkei, kheijinei kün attiko nyikuko laukei, “Kanei kümbü ho ai? Kanei Choba khulimda sai?”

²⁰Kheijinei ngei haoen to jongaiko laukei, “Khuthükbü Mühghaüei kün to thuilabü, hibü kün hao khangenbü shuong hau kingaian chem kho danglabü; lausikei Jerusalema kaneibü phejan, kaneibü nyenhang hoba nyensang aikei akilabü.”