Read Chang Naga NEHEMIA 3 Bible Online

NEHEMIA 3 - Chang Naga bible

NEHEMIA 3

¹Kheijinei thükkabou ungshedbou Eliashib hoba haoeibü jaisina ungshedbou shuong maangpon to thungeikei hoba haoenei San Bakhün kho kümbei; haoei kho saüenkei, hoba koukap jinkei; haoenei Hundred hoba Hananel dogo laubü laangshong dan sühko saüenkei.

²Hao phainei Jerikhobüei kümbei, hoba haoen phainei Imrieibü shou Zakurei dangkei.

³Hobaje Hasenaeibü shousi shuongei Ngau Bakhün kho kümbei; khünei haoenei pangkhüm denkei, koukhün shuong hoba khünei thangtetlabü namlüh jinkei.

⁴Haoen phainei Hakkozeibü shou Uriaeibü shou Meremotei kümetkei. Kho phaia Meshezabeleibü shou Berekiaeibü shou Meshullamei kümetkei. Haoen phaia Baanaeibü shou Zadokei kümetkei.

⁵Haoen phaia Tekoabüei kümetkei, lausikei haoen yoa yaangbü shuongeije BUNYUBOUeibü kümsilei shanga haoeneibü ngüm atho.

⁶Hobaje hangbü bakhün kho Paseaeibü shou Joiada hoba Besodeaeibü shou Mesholamei kümetkei; haoenei pangkhüm kho denkei hoba khünei koukap hoba thangtetlabü namlüh jinkei.

⁷Kho phaia Gibeonbü shou Melatia hoba Meronotbü Jadon tokei Gibeonbü mütshuong hoba Mizpabü mütshuong aoyou Eufrates Shumang thinei kibü governor phanga kikei, haoenei kümetkei.

⁸Hao phaia hon yaübü Har- haiaeibü shou Uzzielei kümetkei. Hobaje hao phainei ponlem hibü peisilei jungeibü Hananiaei kümetkei; hoba haoenei Jerusalem ongabü kümthang sühko kümetkei.

⁹Haoen phaia Hureibü shou Refaia, ao Jerusalem kaonyek jamtea songdakbou kikei, haoei kümetkei.

¹⁰Haoen phaia Harumafeibü shou Jedaiaei haoeibü chem thedanga kibü kümthang kümetkei. Tokei hao phaia Hashabniaeibü shou Hattushei kümetkei.

¹¹Harimeibü shou Malkija hoba Pahath-moabeibü shou Hasshub haosi hamei lubü phejan che, wanjikshang laangchem yoan kümetkei.

¹²Hao phaia Jerusalem kaonyek jamdea songdakbou Hallohesheibü shou Shallum hoba haoeibü nouyangshou shuongei kümetkei.

¹³Pholi Bakhün kho Hanun hoba Zanoaa kibü shuongei kümetkei. Haoenei kho küman koukap, koukhin hoba thangtetlabü jinkei hoba kümthang iknop hajar che thüng Od apshang Bakhün sühko kümbei.

¹⁴Hobaje Bethakerem kaonyeka songdakbou Rekhabeibü shou Malkijaiei Od apshang Bakhün kümetkei, haoei kho küman koukap, koukhin hoba thangtet jinkei.

¹⁵Hobaje Mizpa kaonyeka songdakbou Kolhozeeibü shou Shallunei Deikük Bakhün kümetkei, haoei kho kümbo koukap, koukhin hoba thangtet jinkei hoba Chobaeibü bamang nyangko Shilo thimdei kümthang khokei Dawid sangnyu to yanbü younak sühko kümbei.

¹⁶Hao phaia Azbukeibü shou Nehemia, ao Bethzor kaonyek jamdea songdakbou kikei, haoei Dawid Chobaeibü hee koudei ka deidang hoba yaangenbou kishang chem sühko kümbei.

¹⁷Hao phaia Levibü Banieibü shou Rehunei kümetkei. Hobaje hao phaia Keila kaonyek jamdea songdakbou Hashabiaei haoeibü kaonyek phejan kho kümetkei.

¹⁸Hao phaia haoeibü jaisina Henadadeibü shou Bavai, ao Keila kaonyek jamdea songdakbou kikei, haoei kümetkei.

¹⁹Hao phaia Mizpa songdakbou Jeshuaeibü shou Ezerei kümthang thek che insiaubu thanshang chem aeto angshang kümetkei.

²⁰Hao phaia Zabbaieibü shou Barukei aeibou takliambo kümthang phejan chemnyek ka thükkabou ungshedbou Eliashibeibü koukhün sühko kümetkei.

²¹Hao phaia Hakkozeibü chempen Uriaeibü shou Meremotei Eliashibeibü kouyem ka khangan Eliashibeibü chem thonbü sühko kümetkei.

²²Hao phaia Yomang kabü ungshedbou shuongei kümetkei.

²³Hobaje haoen phaia Benjamin hoba Hasshub haosi hamei haoeneibü chem tangbou kho kümetkei. Haoen phaia Anania ka bousushou Maaseiaeibü shou Azariaei haoeibü chem nyangko kümetkei.

²⁴Hao phaia Henadadeibü shou Binnuei Azariaeibü chem ka khangan kümthang nongaishang hoba chemnyek sühko kümetkei.

²⁵Hobaje Uzaieibü shou Palalei kümthang nongaishang ka Chobaeibü chem thükkabou lapheishon lombü kishang pob nyangbü sühko kümetkei. Hao phaia Parosheibü shou Pedaiaei kümetkei.

²⁶Tou Nethinimbü kho Ofela kikei, chaangbou dei bakhün hoba loan kibü lapheishon sühko khünei kikei.

²⁷Hao phaia Tekoabüei lapheishon yaangbou ka Ofel kümthang sühko naphei che kümetkei.

²⁸Tokei ungshedbou shuong mütpem wekoei koli bakhün thükaenei lubü chem tangbü kho kümetkei.

²⁹Haoen phaia Immereibü shousi shuong Zadokei haoeibü chem tangbou kho kümetkei. Hao phaia chaangbou koukhün lombou Shekhaniaeibü shou Shemaiaei kümetkei.

³⁰Hao phaia Shemaiaeibü shou Hanania hoba Zalapeibü shou lakboubü Hanunei phejan che kümetkei. Hao phaia Berekiaeibü shou Mashullamei haoeibü shemjang thedang kümetkei.

³¹Hao phaia hon yaübou Malkijaei Nithinimeibü chem sühko kümetkei, hoba namyak namseibü shuongei Hammifkad bakhün tangbou ka thükkabou shemjang to angshang chemnyek sühko kümetkei.

³²Tokei thükkabou shemjang to angshang chemnyek khüto san koukhün sühko hon yaübü si namyak namseibü ham kamshai- an kümetkei.