Read Chang Naga NEHEMIA 4 Bible Online

NEHEMIA 4 - Chang Naga bible

NEHEMIA 4

¹Tou ladang künei kümthang kho kümetda dogo Sanballatei ditkei, hao khau angko maangto shatkei hoba Jihudabü attiko nyikukei.

²Hobaje haoei haoeibü jaisinasi shuong hoba Samariaa lakjaibü tan to joyoko laukei, “Habü hau akibü Jihudabüei ai kümda? Haoenei haoen lulu loenlep lo? Haoenei langkei lemla kuenlep lo? Onshaian kibü wanei lonbü onshaibü ka laangshong kho haansangleko haoenei kümetenlep lo?”

³Tou hao nyangko Ammonbü Tobiaei laukei, “Haoenei laobou küman ki, selong che pükalonga laang kümthang kho nopjung koulabü.”

⁴Kheijinei ngei welaukei, “Ditshima, O küneibü Mühghaü, aishanga kün awealau; haoenei nyikubü ngüh kho haoeneibü khu to ngaitikushi, hoba haoen kho aaomüt shuong lapshaishang kaonyeka soshau soyungbü yeila kushi;

⁵hoba haoeneibü shedbü kho küplepan tepho, hoba haoeneibü shabü ka thedang ka haman tüpma; aishanga haoenei chemdangbü thedanga khau angko no attiko nyikua.”

⁶Kho tegü künei kümthang kho kümbei hoba kümthang pendou kho haüyoko kui tho thüng angko kümbei, aishanga mütshuongei maangnyu angko kümbei.

⁷Lausikei ladang Sanballat si Tobia, Arabbü, Ammonbü hoba Ashdodbüei Jerusalem kümthang kümetbü kümsilei kho athakko, hoba leiluan kibü kümetda dogo ditkei, kheijinei haoen aeibou khau angkei.

⁸Hobaje haoen pendou liko huphanga chemphanga huishaian Jerusalem khulimbo wapyola hoba khünei ajiaphai longtila huon kümbei.

⁹Lausikei künei küneibü Mühghaü to welaukei, hoba change nangnak alauko haoen khulimbo lapheibü phokei.

¹⁰Kho jiha Jihuda mütshuongeibü chia che hai laukei, “On künan kibü shuong hao ka ngaida hoba tokei leilubü juong jouakei, hibü kümthang kho senei akümkhümlabü.”

¹¹Tokei küneibü dangbouei hai laukei, “Sen haoen kishang jenyu sühko ohaushongko hoba haoen haitian kümsilei kho anangti shongko haoenei angelabü hoba ühüplabü.”

¹²Hobaje ladang haoen nyangko kibü Jihudabü kün jungto loukei, haoenei annebenko künto laukei, “Kan pendou kaoen pendou aeka kün jungto sepeinyu longeiashi.”

¹³Hibü ngei kümthang naphei kaoen haübü, khongthua mütshuong haoeneibü chemdang yoan leishaikei hoba mütpem weko insiaubu jungtikei.

¹⁴Hobaje ngei chühkei hoba lokei, hoba yaangenbü songdakbü hoba mütshuong to laukei, “Kan haoen to hatko teki, BUNYUBOU ao yaangbou hoba hatlamoklabü ki hao damenashi, hoba kaneibü jaisina, kaneibü nouyang jayang shousi shuong, kaneibü yaksi hoba chemdang shanga wapyoashi.”

¹⁵Hobaje ladang künei kho ngea dogo dangbouei ditkei, hoba Mühghaüei haoeneibü huon konga jimtikei, kün pendou kümthang khüto sepeinyu longeikei hoba mütpem weko lulueibü kümaleia ikphen lambei.

¹⁶Hobaje kho chalou ka khangan ngeibü eikshuong jamde kümsilei kümtikei hoba haoen jamde aubu, aih hoba lau hoba nameibü hele souko lekei hoba songdakbü shuong Jihudabü phang khümbo phainei lotikei.

¹⁷Aoei kümthang kümbei, hoba aoyouei on künda, mütpem weko ikdang che kümaleia ikphen lambei hoba jiaeei insiaubu jungkei.

¹⁸Chemdangbü shuongkei mütpem weko in che bang shouan ong chem dangkei hoba teklaang metbou ngo nyangko kikei.

¹⁹Hobaje yaangenbü, songdakbü hoba imyam to ngei laukei, “Kümsilei kümlabü yaang hoba kaoen hebüa kia, hoba kümthang thüka sen cheei che ka heko bangan kia,

²⁰ainei kilaje kiasikei, ladang teklaang langh ditlaje, kheijinei kün kishang lambo kan kamshaiashi; seneibü Mühghaüei sen shanga wapyolabü.”

²¹Hibü kün kümsileia ikphen lambei hoba haoen yoa jamde ngeyang chanyu longsilengko ka khanshoulitshou alongshongko aubu jungan haiyeiko kikei.

²²Kheijineitham ngei imyam to laukei, “Mütpem weko Jerusalem bakhün phanga thuiyobü shuong yoa kishi, haoen kho nangnak sen thüka lapheibü yinglabü hoba chaloua kümsilei kümlabü.

²³Hibü ngei yingsikei, ngeibü jaisina hoba khangenbü shuong ayingsi kü phainei sembü lombü shuong yingsikei, kün aoeikei neisimei asungen, müt- pem wekoei deikhula haujineikei insiaubu jungan ong haukei.”