Read Chang Naga NEHEMIA 5 Bible Online

NEHEMIA 5 - Chang Naga bible

NEHEMIA 5

¹Tou mütli yoa yaksi yoan haoeneibü jaisina Jihudabü khulimbo ngüh yaang longkei.

²Haoenei hai lauko kikei, “Sen hoba seneibü nouyang jayangshou juong yeia; sen shauko yungko kila shanga youshou yoshai thanshaikho.”

³Tokei atei hai laukei, “Seneibü sek, semlüh sek, hoba chem yoan angngaikuda; hibü senei mühsinou shanga nyak yoshaikho.”

⁴Tokei hai laukei, “Youshou sek hoba semlüh sek shanga Choba la khüm kula shanga künei nam lotkei.

⁵Lausikei touje küneibü phe küneibü jaisinaeibü phe tegü ki, küneibü shousi haoeneibü shousi to jetei ki. Khei yingsikei chühashi, küneibü nou- yang jayangshou aaola yeilabü lele künei leian louda, nouyang atje khübü thu to sungbaan apa, haoen angla kün to hau aki; aishanga küneibü kao hoba semlüh sek müeibü ika kia.”

⁶Hobaje haoeneibü ngüh hoba lemenbü langh ditan ngo aeibou khau angkei.

⁷Kheijinei ngei ngo lolo damanchühan yaangenbü si songdakbü shuong to hakko laukei, “Kanei hau aei jungeiko kaneibü jaisina weko ka phopnam aei lekei.” Hobaje ngei haoen khulimbo thangyen yaangbü che ngaletkei.

⁸Hobaje ngei haoen to laukei, “Küneibü hau thüng künei lulueibü jaisina Jihudabü mü phang la yaakan apan kibü angngaia, khülonga kanei lulueibü jaisina yaaklep sai ayingsi haoen kho kün la yaaklep sai?” Kheijinei haoen ngüh üangko apbei.

⁹Tokei ngei laukei, “Kanei kümbü kümsilei kho maibü aying; dangbouei sen awealaubü haangjung tokei kanei Mühghaü to souhatbüa apailep lo?

¹⁰Tokei ngei, ngeibü jaisina hoba khangenbü shuongei senei nam hoba nyak lotkuda. Lausikei senei sanoudambo phopnam telekho.

¹¹Ngei sudajada, kanei lean kibü haoeneibü youshou sek, semlüh sek, oliv sek hoba chem, tokei saongao phejana nam tokei youshou, ih hoba onang, kanei lean kibü pendou kho tattham ngaitikuashi!”

¹²Kheijinei haoenei laukei, “Ngaitikukho, hoba haoen ka ai alelabü, nyi laubü tegü künei kümbho.” Kheijinei ngei ungshedbou shuong ngashaian thekubü tegü haoenei jungeila theyotikei.

¹³Tokei ngei ngeibü nei hakan apbo laukei, “Aoei theletbü ajungeilaje mütpem weko jembü chem ka hoba kümkaleika Mühghaüei hai hakan aplabü.” Hobaje kaman kibü pendouei laukei, “Amen” hoba BUNYUBOUeibü nyen sangkei. Hobaje müt shuongei thekubü tegü kümbei.

¹⁴Tokei Jihuda kaodaka ngo governor pienbü chalou ka Artazerkzes Choba saoche boubü ka khujinto nyiboubü kho po anthüknyi ngo hoba ngeibü jaisinasi shuongei governoreibü shausiyung shaula janan kiasikei shauan achüh.

¹⁵Lausikei kü thedangto governor aoyou kikei, haoenei mütli ka munam aei lekei, khei chalou chenei khüm chandinam saonyi lean phaia ong tokei wentek hoba ih haoen ka khangkei; haü, khei haoen phanga khangenbü shuongeikei mütshuong thüka hau aei jungeikei, lausikei ngeije khei ajungei, aieilausi ngei Mühghaü to hatkei.

¹⁶Haü, tokei ngei ho kümthang kümetbü kümaleia athakko ikphen lambei. Künei kao hansho ongkei jekan apho, lausikei ngeibü khangenbü pendouei liko thepyoan kümbeileikei.

¹⁷Tokei ngeibü nyakshau khümsok nyangko kibü küksithang aoyou kün jungto loukei, haoen to limbo, Jihudabü hoba songdakbü müt saongaoto anjinsem kikei.

¹⁸Chalou che shanga shausiyung lamlejinei masu pongsu che, shanenbü sanlon lak; tokei aunakkei shisho yoan kü shanga lamleko kikei, hoba chalou an weko ih phang pendou küpjeman phokuko lekei. Lausikei ngei governor shausiyung ladangkei ahi, aieilausi ho mütli thüka khühbü buleng atshaitham künan kikei.

¹⁹“O ngeibü Mühghaü, mütli shanga ngei ai kümbei, ho shanga ngo damenshima.”