Read Chang Naga NEHEMIA 6 Bible Online

NEHEMIA 6 - Chang Naga bible

NEHEMIA 6

¹Ladang kümthang kho yeia, touje joubü leilubü aki dogo Sanballat, Tobia hoba Arabbü Geshem hoba joubü labou shuongei ditletkei, (kho jiha tokei bakhüna koukap ajinko kiteikei),

²Sanballat si Geshem, haosiei kü jungto ngühlang hautiko laukei, “Kaiya, sen Ono pholia sang chenei liko haüyokho;” lausikei haoenei kü to amaibü kümla dambei.

³Hobaje ngei haoen jungto ngühlang künbü hautiko laukei, “Ngei kümsilei yaangbü che kümbo kia, hibü ngo louyenla athük; ngo kan jungto louyenla shanga kümsilei kho lai yongshetan phola?”

⁴Haoenei kho tegü ong kü jungto leinei sühko hautikei lausikei ngei jeteibü jongaibü ong kukei.

⁵Kheijinei ngaoboula Sanballatei hao khangenbü che akhinbü le che jungan kü jungto hautikei.

⁶Khonei hai doan kikei: “Phangshuong jungto ho ngühlang loukei hoba Geshemeikei kho tükde dogo lauda, khei nyi hoba Jihudabüei huonbüyoubü tegü damda, kho haangjung nyi kümthang kho kümda, hoba ho ngühlang ditbüei no haoeneibü Choba yeilabü.

⁷Tokei Jihuda kaodaka Choba che kia dogo Jerusalema ka shangabü phinthonla shanga nyi thuseibü pienkei, hoba kho ngühlang kho tou Choba jungto künjan. Hibü kaiya, sen liko janyokho.”

⁸Kheijinei ngei hao jungto hautiko laukei, “Nyi laubü tegü kümbü kümsilei ai aki, lausikei nyi lolo maang ka pakenan laubü ong.”

⁹Aishanga haoen pendouei kün hattiko dogo hai laukei, “Haoeneibü ik kho kümaleia hau akiko aplabü, hoba kho ayeienlabü.” Lausikei ngei welaukei, “O Mühghaü, nyi ngeibü ik hau kingaitiashi!”

¹⁰Hobaje ngo, Mehetabeleibü shi hoba Delaiaeibü shou Shemaia, ao khinngailangan kikei, hao chem to haukei hoba haoei laukei, “Seti lembüchem kommaanga Mühghaü chema liko haüyokho hoba kou kho kapbo, aieilausi haoen louan no haitilabü; haü, haoen nangnak no haitila louada.”

¹¹Kheijinei ngei laukei, “Ngo tegübü müt cheei khei satlep lo? Hobaje ngo tegübü müt cheei jembü langkei khümenla shanga lembüchema satetlangla se? Ngo khüto ütlabü.”

¹²Chühashi, ngei ngekei, Mühghaüei hao ohauti, lausikei haoei ngo khulimbo joyola Tobia si Sanballat haosiei hao besaei jekthetkei.

¹³Kho tegü ngo haitila hoba hatbüa shed shontila hoba ngo khulimbo amaibü ngühlang at haoenei hapenla hoba ngo attila shanga huonei hao suletkei.

¹⁴“O Mühghaü, Tobia si Sanballat haosi hamei kümbü kümsilei hoba thuseinyu Noadia yoa joubü thuseibü shuongei ngo hattimoktila ai ong küma, ho nyi damenshima.”

¹⁵Kho tegü kümthang kho chalou anjinsemto nyia Elul lit saoto ngao bounyeta khümbei.

¹⁶Ladang dangbouei kho ditkei, kaijembo kibü phang pendouei kün to hatkei, hoba chühmang asühko apbei; aieilausi ho Mühghaüeibü kümsilei dogo haoenei ditenkei.

¹⁷Kho chaloua Jihudabü yaangenbü ka Tobia jungto le juong hautikei hoba Tobia kakei kho tegü haoenei hapbei.

¹⁸Aieilausi hao Araeibü shou Shekaniaeibü kounyangbou kikei, hoba haoeibü shou Jehohananei Berekiaeibü shou Meshullam nouyangshou lebü haangjung Jihudaa hao thedanga mat ngekko theyolanyobü juong kikei.

¹⁹Haoenei haoeibü kümsilei maibü shanga kü to lenkei, hoba kü shangakei haoen jungto hauan lenkei. Hobaje Tobiaei ngo hattiko le dodang lekei.