Read Chang Naga NEHEMIA 8 Bible Online

NEHEMIA 8 - Chang Naga bible

NEHEMIA 8

¹Hobaje lit nyet boubüaje Israel shousi shuong khümbo lulueibü sangnyua kikei. Tou mütli pendou müt che tegü ong Dei Bakhün thedanga khongthu ongabüa kamshaikei, hoba haoenei dobou Ezra to Mosa Ngühkhüm, laobou BUNYUBOUei Israelbü la kukei kho sungbala lenkei.

²Hobaje lit nyet boubü shaangbounyet ditenko ditla thükbü bousu yaksa kamshaian kibü thangyen to ungshedbou Ezraei Ngühkhüm le kho sungbakei.

³Hobaje yungko thedanga ongabü khongthua kamshaian kibü ditenbü shuong thedanga ngeyang ka chalou chajih sühko haoei Ngühkhüm kho wekei hoba kho Ngühkhüm le wejinei müt pendouei nou haangan ditkei.

⁴Dobou Ezra washon chenei lokei hoba haoeibü mae aenei, Matithia, Shema, Anaia, Uria, Hilkia, hoba Maaseia lokei; haoeibü nanaenei Pedaia, Mishael, Malkija, Hashum, Hashbadana, Zekharia hoba Meshullam lokei.

⁵Hobaje Ezraei le müt pendouei hapbo ipbei (aishanga hao pendou thüka tonenan loan kikei) hoba ladang haoei kho ipbei müt pendou lokei.

⁶Hobaje Ezraei laukei, “Yaangenbou BUNYUBOU Mühghaü nyen sangashi!” Hobaje müt pendouei haoeneibü ik mühae tuokkei hoba, “Amen! Amen!” dogo lauko jongaikei. Hobaje haoeneibü thenyek kao ae yeian khüpetan BUNYUBOU to lembei.

⁷Tokei Jeshua, Bani, Sherebia, Jamin, Akkub, Shabbethai, Hodia, Maaseia, Kelita, Azaria, Jozabad, Hanan, Pelaia hoba Levi shuongei mütli shuong la Ngühkhüm kho ditshuoktikei hoba mütli shuong haoen lulueibü kaoena lokei.

⁸Hobaje Mühghaüeibü Ngühkhüm le ka shangashatko wekei, hoba haoenei tetlabü kho wanenkukei, hibü webü kho mütshuongei ditenkei.

⁹Ladang mütshuongei Ngühkhüm le kabü ngüh shuong weko ditkei haoen to meiyoukei hoba haoen haapyola khangkei. Hibü governor Nehemia, ungshedbou hoba Ngühkhüm dobou Ezra, hoba mütshuong la wanenkubou Levibü shuongei müt pendou to lenkei, “Tatbü ho kaneibü Mühghaü BUNYUBOU to saopobü chalou ki, hibü kanei mang tühaap ayingsi tühaapyo.”

¹⁰Kheijinei haoei haoen to laukei, “Kan hauashi, haabü jemoubü shauashi hoba teibü kho yungashi, hoba lamlean akibü dan shanga lembü phejan at künashi. Aishanga BUNYUBOU thedanga tat saopobü chalou ki. Kan maangto shatko teki, aishanga BUNYUBOU olinbü kho kaneibü hau ki.”

¹¹Hibü Levibüei mütli pendou senyühshemtiko laukei, “Kan küpjembo kishi, aieilausi tat saopobü chalou ki. Kan maangto teshat.”

¹²Hobaje müt pendouei shaula yungla phejan at künkei, hoba haoen olinyola haukei; aieilausi haoen la ngekletkubü ngüh kho haoenei ditenkei.

¹³Nyibounyet chung pendou ka kongnyu shuong hoba Levibü haoen pendou dobou Ezra jungto ngühkhüm ngüh kho lamla kamshaikei.

¹⁴Hobaje BUNYUBOUei Mosa la sakkubü ngühkhüma haoenei hai doan hapbei, khei Israel shousi shuong lit nyet boubü lem kho dipa kijan,

¹⁵hoba sangnyu pendoua hoba Jerusalema haoenei hai ngekjan, “Shongh khüto angashi hoba doan kibü tegü dip dangla shanga oliv bubhek hoba bunyem shangbüeibü bhek, doan kibü tegü dip dangla yoshaiashi.”

¹⁶Hibü imyamei hauan khübü peisilei kho sungjung louan müt- pem wekoei lulueibü chemdaka, khonga, hoba Mühghaü lemshang chem kouteia, Dei Bakhün, ongabü khongthua lulu lolo dip dangkei.

¹⁷Hobaje aoyou langsenbü ka longeian kikei, haoen pendouei dip kho dangkei, hoba khünei kikei; aieilausi Naneibü shou Joshuaeibü chalou ka khangan ho chalou sühko Israel shousi shuongei kho tegü akümbo loukei. Hobaje lemlemtham olinyobü yaang kikei.

¹⁸Hobaje chalou angbou shaangbounyet ka thonbü chalou sühko haoei Mühghaüeibü ngühkhüm le ka wekei. Hobaje haoenei chalou nyet sühko lem kho likei, hoba setbounyet thonbü lem kambü che songa kibü tegütham haoenei kikei.