Read Chang Naga NEHEMIA 9 Bible Online

NEHEMIA 9 - Chang Naga bible

NEHEMIA 9

¹Tou ho lit chalou saoto leibounyet Israel shousi shuong senounei neian hoba haoen thüka tham naangan mühei nyengko kamshaikei.

²Hobaje Israel mütli phai küksithang ka haoen lolo janyinan lokei, hoba haoenei lulueibü shabü hoba pisiboueibü shabü kümsilei shedbü thekukei.

³Hobaje haoen lulu kishanga lokei hoba khünyet angh sem haoeneibü Mühghaü BUNYUBOUeibü ngühkhüm le wekei, hoba angh sem haoenei Mühghaü BUNYUBOU to thekuko lembei.

⁴Kheijinei Levi phang shemjanga Jeshua, Bani, Kadmeil, Shebania, Bunni, Sherebia, Bani hoba Chenani lokei, hoba BUNYUBOU haoeneibü Mühghaü to ngüh yaangbüei ngekkei.

⁵Hobaje Levibü shuong: Jeshua, Kadmeil, Bani, Hashabneia, Sherebia, Hodia, Shebania hoba Pethahia, haoen danei laukei: “Loashi hoba kaibü Mühghaü BUNYUBOU nyen sangashi; hao ponpen thon akiko sangashi! Müteibü nyensang kheinyutham soubü ayingsi dogokei, mütpem wekoei hao soneikangbü nyen sangashi.”

⁶Hobaje Israel mütshuongei ho hai welaukei: “No ong BUNYUBOU, ka to limbo toukei aki; nyi müh hoba mühkabü khanshoulitshou shuong kümbei. Nyi kaodak hoba yungnyu hoba khünei kibü pendou kümbei; hoba khübü pendou la nyi kukei. Hobaje müha kibü danei khüpetda hoba no lemda.

⁷No BUNYUBOU Mühghaü, aoei Abram pienkei, hoba Khaldibü kaodak Ur ka hao leijung louan hao la Abraham nyenkukei.

⁸Hobaje ka to maanglemenbü maangpon nyi hao ka hapbei, hoba Kanan, Hit, Amor, Periz, Jebus hoba Girgashbü kibü kaodak hao la kula theyolanyokei, hoba kaibü ngüh kümsilei la yeitikei, aieilausi no saopobü ki.

⁹“Nyi Ijep kaodaka küneibü pisibou khonkubü hapbei; Saklangbü Yungnyua nyi haoenei ngekbü ngühlang ditkei.

¹⁰Farao thedanga hoba haoeibü eikshuong hoba haoeibü kaonyek mütli khulimbo nyi amaaphelabü hoba maangpanglabü seikümseilei lenkei. Aishanga nyi ngekkei, haoenei yonglambo habü khulimbo jungeikei hoba tat chalou tegü kaibü nyen ngean aptikei.

¹¹Hobaje haoenei yungnyu deiyaak danko kaolina danlabü lele nyi yungnyu kho janyinkei; hoba haoen shijung loubü dangbou kho dei yaangbü maanga laang che tegü haübüa mautikei.

¹²Tokei haoen laeto ong haulaje lama ngesakbü kula shanga nyi change nangnak wan thaonyuei haoen lam leikei.

¹³No tokei Sinai shongh thükto louyenkei hoba haoen to khuthük ka joyokei; Hobaje haoen la ngühmai matjem hoba ngühmai ngühkhüm, takletbü ngühkhüm hoba sengkubü maibü kukei.

¹⁴Nyi haoen la khangenbou Mosa danko saopobü Nounyet ngetikei hoba ngühkhüm shuong kho haoen la sakkukei.

¹⁵“Hobaje haoen mühei haijinei khuthük ka wentek kukei, hoba dei lajinei yunglabü dei laang ka longtikei; hoba nyi kula thekubü kaodak khüto hauan kishi dogo thekukei.

¹⁶Lausikei haoen hoba küneibü pisibouei yonglambo tukosekko kaibü ngühkhüm shuong aditkuko apbei.

¹⁷Hobaje haoenei kaibü ngüha ale, hoba haoen junga kaibü seikümseilei shuong haoeneibü maang to üt; lausikei haoen tukosekko lenbü aditbü lenko tokei nyibou khühbü buleng thu to sepeinyu ngaila haoenei leiyeibü che pienkei. Lausikei no shedbü apbuenbü Mühghaü, khauangla maangyangsho, onoua apsileko kibü Mühghaü hoba nyi haoen üpyo.

¹⁸Haü, haoenei tühnyinbü masu pongsu che haoen lolo kümbei hoba laukei, ‘Ho kaneibü mühghaü, aoei kan Ijep ka leian loukei.’ Kho tegübü haoenei aweasüngbü kümsilei yaang kümbei.

¹⁹Lausikei kaibü onou yongkotham yaangbü ka nyi haoen yamlamanga ananglet; changea leibü sangmei thaonyu hoba nangnak wan thaonyuei ngesak lenkei hoba haoen haubü lamnyu shean lenla shanga haoen üpyo.

²⁰Haoen la lenla soushou maibü haoen la kukei, haoeneibü sembung ka kaibü mana nyi asungngai; hoba haoen dei lajinei nyi dei kukei.

²¹Haü, po saonyi nyi haoen yamlamanga sambei, haoen aieikei shaleko üpyo; haoeneibü neisimei ühang hoba haoen you apok.

²²“Tokei nyi haoen la sangle shuong hoba phangshuong kukei, laobou phejan nyi pheian kukei; kho tegü haoenei Heshbonbü Choba Sihon kao hoba Bashanbü Choba Og kaodak yoan lekei.

²³Haoeneibü shousi müha khanshoulitshou tegü nyi hautikei hoba haoeneibü pisibou to laobou kao kukho laukei, khoto nyi haoen leian louan phokukei.

²⁴Hibü shieishouei hauan kho kaodak lekei hoba khünei kibü Kananbü Chobaei leian imyam pendou nyi haoen phang to lottikei, khei haoen yoa haoen maangleko kila shanga.

²⁵Ba lengaian kibü sangnyu shuong, hoba haabü kibü kaonyek kho haoenei lekei; hoba khünei peisilei maibüei shenan kibü chem shuong, yaüenan kibü yungdei shuong, semlüh si oliv bamang shuong, hoba buheklong shuong apsileko haoeneibü yeikei, nyi maisho thounoubüei haoen olinyokei.

²⁶“Khei yingsikei haoenei lenbü aditko no khulimbo meimeikei hoba kaibü ngühkhüm phainei nangletkei; thuseibü aoyouei haoen ka jungto sepeinyu longeitila maangsanglabü songlen kukei haoen haitikei, hoba aweasüngbü kümsilei yaang kümbei.

²⁷Hibü nyi haoen dangboueibü ik to kukei; hoba khonsak jiha haoenei ngekbü ngühlang khuthük ka nyi ditkei. Hobaje kaibü onou yaangbüei haoen dangboueibü ik ka püetan phola shanga nyi haoen la khuleilanglei shuong kukei.

²⁸Lausikei longche ong haksoko kianje tokei haoenei ka thedanga amaibü kümbei; hibü nyi haoen dangboueibü ika nangletnyu phokei, hoba haoen thüka haoenei songdakkei. Lausikei ladang haoenei sepeinyu ka junga ngekkei, nyi khuthük ka ditkei, hoba onouei haoen annebenko khümenkei.

²⁹Hobaje nyi haoen kaibü ngühkhüm phangto leian loula shanga shangashatko maangsanglabü kukei; lausikei haoenei liliseseko jungeikei; aoyouei kho jungeilaje lang kilabü yingankei, haoenei kaibü ngühkhüm to ngüha ale; hoba kaibü matjem khulimbo shed shonkei. Haoenei phak atho lausikei ngüm kaangko tubüsekbü lenkei hoba lenbü adit.

³⁰Khei yingasikei nyi po lounyu haoen to natenkei. Hobaje ka soushouei thuseibü shuong danko haoen khulimbo maangsanglabü küntikei lankei haoen la nou ayem; hibü nyi haoen kho kaonyeka kibü mütshuong ikto kukei.

³¹Khei yingsi dogokei nyi haoen to onoukei, khoei haoen lemailela amauti ayingsi üpyo; aieilausi no sanoubü hoba onou thonbü Mühghaü ki!

³²“Hibü tou, O Mühghaü, theletbü hoba onou phoenbü yaangenbou, hoba hatlamoklabü Mühghaü! Assiriabü Choba shuong haang ka tat sühko kün jungto, hoba küneibü Choba shuong küneibü khuleibü shuong, küneibü ungshedbou küneibü thuseibü, küneibü bousi shuong hoba kaibü mütli pendou jungto loubü khonsak khonku ho ka thedanga hanbü tegü ki.

³³Ai yinglaje yingasikei, kün to haüthükbü pendoua nyi janbü ong küma; aishanga künei kümsilei amaibü kümasikei nyije ngühmaanglanbü ong kümda.

³⁴Küneibü yaangenbü leiyeibü ungshedbou shuong ayingsi bousi shuong aoeikei kaibü ngüha ale, ayingsi kaibü sakkubü hoba kaibü ngühkhüma apai.

³⁵No yongko maibü danko nyi haoen la kubü haoenei sangle hoba haabü kibü kaodak ongabü hapbei; lausikei khünei haoenei no akhangen, ayingsi amaibü kümsilei ka haoen asepei.

³⁶Chühashi, tat kün aaola lean kia, nyi küneibü pisibou la kubü kaonyeka hoba khünei buhekdeihek hoba peisilei maibü shaulabü jeiko, chühashi kün aaola yeian kia.

³⁷Ho kao honei Choba shuong aoyou la küneibü shabü danko kün thüka nyi song daktikei, haoen la lang aei haatikukei. Tokei küneibü manga hoba küneibü samkeisamuk thüka haoenei jungeimang sühbü jungeila hau kia, hoba kün khonsak khonku yaanga kia!”

³⁸Ho pendou shanga künei thebülanbü kaangko phoda, hoba doan phoda; hoba küneibü leiyeibü kün Levi phang hoba ungshedbou shuong nyen khünei jangan phoda.