Read Chang Naga ESTHER 2 Bible Online

ESTHER 2 - Chang Naga bible

ESTHER 2

¹Kho thena ladang Ahasueras Choba khau angbü maingaikei, haoei Vasti hoba saoei ai kümbei hoba sao khulimbo ai ngühkhüm kukei kho damenkei.

²Hobaje Choba khangenbü shuongei hao to laukei, “Choba shanga hemai saomai medei shuong lamtiashi,

³hoba khei Shushan sangnyu to yaksa shuong Chobaeibü sungphatbü müt Hegai ika haoenei yaksa saomaibü medei pendou liko Chobaeibü sanglea provins pendoua ikjaibü shuong pienan haoenei takteila shanga nongkuashi.

⁴Hobaje medei aoei Choba olintilaje Vasti jeiko sao Chobasao yeitishi.” Hobaje khoei Choba olintikei, hoba haoei kho tegü kümbei.

⁵Shushan sangnyua Jihudabü che Benjamin mütli chung Kisheibü shou Shimeieibü shou Jaireibü shou nyenei Mordekai kikei.

⁶Babilonbü Choba Nebukhadnezzarei Jihudabü Choba Jekonia Jerusalem ka langsenbü yoa Mordekai yoan laplangkei.

⁷Hobaje haoei haobou nashouboueibü nouyangshou Hadasa, kho Esther, pangteikei aieilausi saoeibü nyusibou aki hoba medeinyu kho chühmang sühlabü hoba hemai saomai kikei, hoba ladang saoeibü nyusibou haikei Mordekaiei sao haoeibü nouyangshou la lekei.

⁸Hibü ladang Chobaei sengkubü haoeibü ngühkhüm phinthonkei medei shuong juongnyu Shushan sangnyu to ngashaikei, khei Esther kei Chobaeibü chem to yaksa lombou Hegai ikjaia leian atkei.

⁹Hobaje medeinyu khoei Hegai olintikei, hoba haoei sao to maangshikkei, hoba haoei panteiko saoeibü peisilei sao saüenla shanga, saoeibü phejan hoba medei nyet, laobou Chobaeibü chem ka sao la kula kikei, kho sao la kukei, hoba haoei sao hoba saoeibü medei shuong yaksa kishang chem maibou to kuktikei.

¹⁰Estherei sao ai mütli ayingsi ai phang kho alen; aieilausi Mordekaiei kho alenla sao to lensepan kikei.

¹¹Hobaje Esther lai ki hoba sao ai yeila kho ngela Mordekai chalou angbou yaksa shuongeibü chem kouthea hau longei dogo paikei.

¹²Tou yaksa shuong shanga ngühkhüm tegü medei lamlelabü lit anthüknyi onko lekei, lit lak ponlem hibü onang hoba lit lak ponlem teibü onang naangko kiteilabü hoba chalou penbüa Choba Ahasueras jungto medei weko lulu chaloua leian atlabü kikei.

¹³Kho tegü medei kho Choba jungto loukei, hoba yaksa shuongeibü chem ka Chobaeibü chem to haujinei saoei mangsühbü hele lean haula sakkuan kikei.

¹⁴Chasem sao haukei hoba ngeyang Chobaeibü sungphatbou müt Shaasgaz, aoei Chobaeibü thangnyu shuong lombei, haoeibü ikjai lambo yaksa shuong nyiboubü chem lambo loukei, sao to Chobaei maangshikko hoba nyen shenko angalonga sao Choba jungto nyibou üet.

¹⁵Tou Mordekai aoei haobou nashoubou Abihaileibü nouyangshou Esther haoeibü nouyangnyu tegü lekei; ladang Choba jungto atlabü jih sühkei, yaksa lombou Hegai sungphatbü mütei lenbü to limbo saoei aikei aphe, hoba Esther to chühbü pendouei sao to maang shikkei.

¹⁶Hibü lit anboubüa kho Tabe lita haoei songdakbü po nyetboubüa Esther Ahasueras Chobaeibü chem to leian atkei.

¹⁷Hobaje yaksa pendou tokei haoei Eshter to aei sanoukei, hoba medei pendou to aei saoei hao ka sanou hoba onou hapbei; hibü haoei saoeibü khua Choba khun hankukei, hoba Vasti jeiko sao Chobasao yeitikei.

¹⁸Kheijinei Chobaei haoeibü yaangbü shuong hoba hao khangenbü pendou shanga lem yaangbü che khei Esthereibü lem kümbei, hoba sangle khümboa soti lela sakkukei, hoba Chobaei kibü thüng jongsak kukei.

¹⁹Hobaje ladang medei shuong nyibou liko yoshaikei, kheijinei Chobaeibü bakhüna Mordekai setkei.

²⁰Estherei tokei jembü phang si chung hoba mütli ai alenkei. Aishanga Mordekaiei sao pangteijinei sakkubü tegü saoei kümbei.

²¹Khübü chaloua Mordekaiei Chobaeibü bakhüna setan kijinei Chobaeibü sungphatbü müt nyi Bigthan hoba Teres, aoyouei koukhün lombo kikei, haosi khau lotkei hoba Ahasueras Choba to ik shatla lambei.

²²Hobaje kho Mordekaiei ngean kikei, hoba haoei Esther Chobasao la ngetikei, hoba Estherei kho Mordekai nyena Choba la lenkei.

²³Hobaje kho shanga lamyokei, hoba kho tükde dogo lapensije haosi ham bulong chenei phenetnyu haitikei, hoba kho lüngbüdobü lea Choba thedanga doan kikei.