Read Chang Naga ESTHER 3 Bible Online

ESTHER 3 - Chang Naga bible

ESTHER 3

¹Kho phaia Ahasueras Chobaei Agagbü Hammedathaeibü shou Haman setshang thükkabou to angtikei, hoba hao yoa kibü konglebü shuong pendou to thükkabou setshanga phokukei.

²Hobaje Chobaeibü koukhüna kibü Choba khangenbü pendouei khüpetkei hoba Haman to souhat lenkei; aieilausi Chobaei hao shanga kho tegü sakkukei. Lausikei Mordekaiei akhüpet hoba souhat alen.

³Kheijinei Chobaeibü koukhüna kibü Choba khangenbü shuongei Mordekai to laukei, “Aila nyi Chobaeibü ngühkhüm leiluda?”

⁴Tou ladang haoenei chalou angbou hao to joyokei, hoba haoen to ngüha ale, Mordekaieibü ngüh kho lela si alela dogo lauan, haoenei Haman to lenkei, aieilausi haoei haoen to hao Jihudabü dogo lenan kikei.

⁵Hobaje ladang Mordekaiei akhüpetda ayingsi hao to souhat alenda dogo Hamanei hapbei, kheijinei Haman aeibou maangto shatkei.

⁶Lausikei haoei Mordekai to ik atko aweasüngla daman kikei, aieilausi haoenei hao to Mordekaieibü mütli shanga lenkei. Hibü Ahasueras Chobaeibü sangle khümboa Jihudabü pendou, khei Mordekaieibü mütli pendou shemtila Hamanei huon takkei.

⁷Shaangboubü lit laobou nisan lit ki, Ahasueras Choba po anthük nyiboubüa Haman thedanga chalou angbou, lit weko, lit anthük nyiboubü sühko, kho Adar lit sühko, haoenei Pur pakkei, kho phaang.

⁸Hobaje Hamanei Ahasueras Choba to laukei, “Kaibü Choba sangle provins pendou aenei phinthonan kibü mütli che kia, hoba haoeneibü ngühkhüm lubü mütli pendou ka lulusap, ayingsi haoenei Chobaeibü ngühkhüm ajungeida; hibü haoen khei apyola Choba shanga kho ku aying.

⁹Ho Chobaei maang angalonga khei haoen shemtilabü dogo dotiashi, hoba Chobaeibü thanshang to sungbala shanga aoyou Chobaeibü kümsilei ikjaiko ki haoen la ngei chandinam khujin bang atbü hajar an kulabü.”

¹⁰Hobaje Chobaei haoeibü ik ka ikjikhap kekan sungkei hoba Jihudabüeibü dangbou Agagbü Mammedatha shou Haman la kho kukei.

¹¹Hobaje Chobaei Haman to laukei, “Nyi ka thedanga ai maibü dogo damda kho tegü haoen to kümla ngei ka la chandinam hoba tokei mütshuong kho kuda.”

¹²Kheijinei shaangboubü lit chalou anthük semboubüa Hamanei Chobaeibü dobou shuong ngakei, hoba Chobaeibü dobou shuong to hoba provins wekoa kibü governor shuong to hoba phang wekoa leiyeibü shuong la sakkubü tegü provins wekoa lulueibü dolanga hoba phang weko lulueibü ngühyema kho doan kikei; Choba Ahasueras nyenei kho dokei, hoba kho Chobaeibü ikjikhapei jangkei.

¹³Hobaje le kho lekünbouei Jihudabü pendou nashou chingbü, nashou yaksa chalou chenei khei lit anthük nyiboubü chalou anthük semboubü, kho Adar lita lusaktilabü, haitilabü, hoba mautilabü, hoba lean apbula shanga hoba haoen ka makan sungla ngühlang provins pendou to hautikei.

¹⁴Kho chalou shanga haoen lamlean kila shanga dobü le che provins wekoa ngühkhüm kujan dogo müt pendou la ngetikei.

¹⁵Chobaeibü ngühkhümei ngühlang künbü shuong panteiko haukei, hoba ngühkhüm kho Shushan sangnyua kümbei. Kheijinei Choba si Haman ih yungla setkei; lausikei Shushan sangnyuje mangan apan kikei.