Read Chang Naga ESTHER 5 Bible Online

ESTHER 5 - Chang Naga bible

ESTHER 5

¹Tou nyengbü chalou sembounyet Estherei Chobasaoeibü hele lekei hoba Chobaeibü chem kouthea Chobaeibü chem shemjang maangkaboua lokei, hoba Choba haoeibü Choba setshanga Chobaeibü haangae yeian setan kikei.

²Ladang Chobaei Esther khongaenei loan hapbei, hao junga Estherei onou hapbei; hoba Chobaeibü honeibü aubu haoeibü ika kibü Esther jungto juan litikei. Hibü Esther nyangko loukei, hoba Chobaeibü aubu sembunga meitikei.

³Kheijinei Chobaei sao to laukei, “Chobasao Esther, nyi mangsühbü ai hoba kaibü subüjabü ai? Chobaeibü sangle jamtekei ngei ka la kulabü.”

⁴Hobaje Estherei laukei, “Chobaei maiakei dogo damalonga Choba si Haman shanga ngei lamlebü lem to tat loushi.”

⁵Kheijinei Chobaei laukei, “Estherei laubü tegü kümla Haman panteiko loutishi.” Hibü Choba si Haman Estherei lamlebü lem khüto loukei.

⁶Hobaje Chobaei iheibü lema Esther to laukei, “Nyi mangsühbü kü la lenbü hoba kho ka la sengkulabü hoba kaibü subüjabü ai? Choba sangle jamde dogo lauasikei sakkulabü.”

⁷Kheijinei Estherei jongaiko laukei, “Ho ngei phebü hoba subüjabü ki,

⁸Choba thedanga kü la onou lenkho laualonga, hoba Chobaei ngei phebü sengkula maang angalonga hoba ngei subüjabü kümbho laualonga Choba si Haman shanga ngei ngiet lem lubü lamlekubü khüto loushima. Kho jiha ngei ai mangsühbü ki kho ka la lenlabü.”

⁹Kheijinei Haman kho chaloua olinangko maangpona olinko haukei, lausikei ladang Hamanei Chobaeibü koukhüna Mordekai hao thedanga aloku ayingsi hao danjinei soumo akuko hapbei, Hamanei hao khulimbo maang- pokbüei shenan kikei.

¹⁰Khei yingsikei Hamanei jembü lolo thepetkei hoba chem to haukei hoba haoei hautikei hoba haoeibü thangbou shuong ngakei hoba yak Zereskei yotikei.

¹¹Hobaje Hamanei haoen la haoeneibü nyaksinam soneikangbü hoba haoeibü shousi juong hoba kümsilei pendou aenei Chobaei hao lai thükkabou to tonenkei hoba haoei leiyeibü shuong hoba Choba khangenbü thüka hao yaangentikei kho yonglambo thenan lenkei.

¹²Tokei Hamanei laukei, “Khei Chobasao Estherei saoei lamlebü lem to kü to liman müt aokei Choba yoa loula asakkuda hoba tokei ngiet saoei Choba yoa liko ngaakei.

¹³Khei yingsikei Jihudabü Mordekai Chobaeibü koukhüna setan ki shongko ho pendou kü shanga ai tegü aying.”

¹⁴Kheijinei hao yak Zeres hoba hao thangbou pendouei hao to laukei, “Hao bu chenei phenetnyu haitila iknop anjinsem suokan kümashi, hoba ngeyang kho thüka Mordekai phenetnyu haitilabü lele Choba to joyoshi; kho phaia lem to olinangko Choba yoa atshi.” Hobaje khoei Haman olintikei hoba haoei phenetnyu haitilabü shon kho kümbei.