Read Chang Naga ESTHER 6 Bible Online

ESTHER 6 - Chang Naga bible

ESTHER 6

¹Khüyou Choba nyeket alou, hoba haoei lüngbüdobü le kho sungbala ngühkhüm kukei, hoba khübü kho Choba thedanga wekei.

²Hobaje Bigthana hoba Teres Chobaeibü sungphatbü müt nyi koukhün lombü aoyouei Choba Ahasueras to ik shatla lambei haoen shanga Mordekaiei lenkei dogo doan hapbei.

³Hobaje Chobaei laukei, “Kho shanga Mordekai to ai souhat hoba nyensang kümbei?” Kheijinei Choba khangenbü shuongei hao to laukei, “Hao shanga ai aküm.”

⁴Hobaje Chobaei laukei, “Chobaeibü khonga ao ki?” Tou Hamanei Mordekai shanga lamlekubüa hao phenetnyu haitila Choba to joyola Chobaeibü thükkabou matjemshang khongmaang to Haman lotan kikei.

⁵Hobaje Choba khangenbü shu- ongei hao to laukei, “Chühashi, Haman Chobaeibü khonga loakei.” Hobaje Chobaei laukei, “Hao lottiashi.”

⁶Hibü Haman lotkei hoba Chobaei hao to laukei, “Chobaei ao to nyenhaang lenla olinda kho müt shanga ngei ai kümla?” Tou Hamanei haoeibü maangpona dambei, “Chobaei kü to liman ao la olinbü lenmang sühla?”

⁷Hobaje Hamanei Choba to laukei, “Chobaei olinbü lenmang sühbü müt shanga,

⁸Chobaei lebü Chobaeibü hele hoba Choba setbü koli, hoba khua Chobaeibü khun hankuan leibatishi.

⁹Hobaje müt ao to Chobaei olinko haangenmang sühda hao la haoenei neitilabü hoba sangnyu khongnyu sünga koli daka setentilabü shanga hele hoba koli kho Chobaeibü yaangenbü konglebou che la khümbo kuashi hoba hao thedanga, müt aoto Chobaei olinko haangenmang sühda hao to hai kümlabü dogo ngekashi.”

¹⁰Kheijinei Chobaei Haman to laukei, “Tongde kümashi, nyi laubü tegü hele hoba koli sungba, hoba kho tegü Chobaeibü bakhüna setbou Jihudabü Mordekai to kümashi, nyi laubü pendou aikei akümbo teki.”

¹¹Kheijinei Hamanei hele hoba koli sungbakei hoba Mordekai la hele lekukei hoba sangnyu khongnyu sünga setan hautikei hoba hao thedanga Chobaei olinko haangenmang sühbü müt to hai kümlabü dogo ngekkei.

¹²Hobaje Mordekai nyibou Chobaeibü bakhün to loukei. Lausikei Hamanje neikhu yukan haapbo haoeibü chem to panteiko ngaikei.

¹³Hobaje Hamanei hao yak Zeres hoba hao thangbou pendou la hao to haüthükbü pendou lenkei. Kheijinei haoeibü songnge donge shuong hoba hao yak Zeresei hao to laukei, “Mordekai ao thedanga no tuongla khangan ki hao Jihudabü ki, nyi hao khulimbüa athüklabü, lausikei maimaitham hao thedanga tuonglabü.”

¹⁴Hao to toukei haoenei joyoko kitoua Chobaeibü sungphatbü müt loukei hoba panteiko Estherei lamlean kibü lem to Haman leian haukei.