Read Chang Naga ESTHER 7 Bible Online

ESTHER 7 - Chang Naga bible

ESTHER 7

¹Hibü Choba hoba Haman Esther yoa lem shaula loukei,

²hoba Chobaei nyibou iheibü lem nyibounyet Esther to laukei, “Chobasao Esther, kaibü subüjabü ai? Kho ka la kulabü, hoba nyi mangsühbü ai? Choba sangle jamde yinga tegükei kho kulabü.”

³Kheijinei Estherei Choba to jongaiko laukei, “O Choba, ngei ka thedanga onou hapalonga ngeibü langkei kü la kungaibü. Kho ngei phebü hoba ngeibü mütli lang kila sakkubuma, kho ngei subüjabü;

⁴aieilausi ngo hoba ngeibü mütli leilutila hoba haitila hoba mautila kün yaakshaua. Lausikei kün khei bousu yaksa aao la lelabü lele ong yaakbü tegüje ngo maangsembo kikhoulabü, aishanga khonkubü khoei Choba senyühshembü amu.”

⁵Kheijinei Ahasueras Chobaei Esther to phekei, “Haoeibü maangpona kho tegü kümla dambo maangkaangko dambou hao kho ao hoba lanei ki?”

⁶Hobaje Estherei jongaikei, “Khulimbou che hoba dangbou che, khei amaibou kho Haman.” Kheijinei Choba si Chobasao thedanga Haman hatko kikei.

⁷Hobaje khauangko Choba iheibü lem ka meimeikei hoba Chobaeibü bamang khüto atkei. Hobaje Esther Chobasao to haoeibü langkei shanga sutijatila Haman loukei, aishanga Chobaei hao danthetko amaibü damenbü haoei hapbei.

⁸Kheijinei Choba bamang ka longeian iheibü lem to atkei, hoba Esther kibü setshang thüka Haman khüpetan kikei. Kheijinei Chobaei laukei, “Haoei kü thedanga Chobasaokei chema shatilep lo?” Chobaeibü ngüh sembung ka longsilengko haoenei Hamaneibü thenyek yuklepbukei.

⁹Kheijinei Choba thedanga kibü sungphatbü müt yoka che Harbonaei laukei, “Chühashi, tokei Mordekai, aoei Choba shanga ngüh maibü laukei hao shanga Hamanei phenetnyu haitila bu iknop anjinsem suokan kümbü Hamaneibü chema lotian phoakei.” Hobaje Chobaei laukei, “Khonei hao phenetnyu haitiashi!”

¹⁰Hibü haoenei Mordekai shanga kümbü bu shon khünei Haman phenetnyu haitikei. Kheijinei Choba khauangbü sokei.