Read Chang Naga ESTHER 8 Bible Online

ESTHER 8 - Chang Naga bible

ESTHER 8

¹Khünyet chaloua Ahasueras Chobaei Jihudabüeibü dangbou Hamaneibü chem Esther Chobasao la kukei. Hobaje Mordekai Choba jungto loukei, aishanga Estherei Choba la hao lai phen- yokei kho lenkei.

²Hobaje Chobaei haoeibü ikjikhap laobou haoei Haman ka sungkei kho hangletkei, hoba kho Mordekai la kukei. Hobaje Estherei Mordekai, Hamaneibü chemsibung nyaksinam pendou thüka ikjaila phokukei.

³Kheijinei tokei Estherei Choba to nyibou joyokei hoba haoeibü youa khüpetkei, hoba Agagbü Hamaneibü kümsilei amaibü hoba Jihudabü khulimbo haoei huon takan kibü apbushi dogo nyeksi angko hao to sukeijakei.

⁴Kheijinei Chobaei honeibü aubu kho Esther jungto litikukei. Hibü Esther meimeikei hoba Choba thedanga lokei.

⁵Hobaje saoei laukei, “Chobaei maang angalonga hoba ngo ka thedanga janbü dogo yingalonga hoba ngo hao thea maikualonga Agagbü Hamedathaeibü shou Hamanei huongenbü le shuong laobou haoei Chobaeibü provins pendoua kibü Jihudabü mautila dokei, kho jakshaian dotishima;

⁶aieilausi ngeibü mütli thükto amaibü loula kibü ngei lai natenla? Ayingsi ngeibü chempen maulabü khokei ngei lai natenla?”

⁷Kheijinei Choba Ahasuerasei Esther Chobasao to hoba Jihudabü Mordekai to laukei, “Chühashi, ngei Esther la Hamaneibü chem kua, hoba haoeibü bushona haoenei hao phenetnyu haitia, aieilausi haoei Jihudabü thükto ik atkei.

⁸Kanei tokei lubü Jihudabü shanga kanei maang angbü tegü doashi. Chobaeibü nyena hoba Chobaeibü ikjikhapei kho jangashi, aieilausi laobou Chobaeibü nyena dokei hoba Chobaeibü ikjikhapei jangkei, müt aoeikei ajaksheilabü.”

⁹Kho chaloua Chobaeibü dobü shuong lit semboubüa kho Sivan chalou saoto semboubüa ngashaikei hoba Mordekaiei Jihudabü la sakkubü tegütham hoba konglebü shuong to hoba governor hoba provinsa leiyeibü shuong India ka Ethiopia sühko provins saongaoto saoto nyet, provins weko jungto lulu dolanga hoba mütli weko lulu ngühyema hoba Jihudabü jungto haoeneibü dolanga hoba haoeneibü ngühyema kho dokei.

¹⁰Hobaje haoei Choba Ahasueras nyena dokei, hoba kho Chobaeibü ikjikhapei jangkei hoba le kho lekünbü kolia setan koli you sobü Chobaeibü kümaleia jungeiko kibü koli shanenbü ka longbüa setan hautikei.

¹¹Ainei Chobaei sangnyua kibü Jihudabü to haoen lolo liko kamshaila hoba haoen to hatyolangyobü pendou leilutila, haitila hoba mautila khei provins kei yoan, hoba haoeneibü shousi hoba yaksa shuong hoba haoenei makletbü peisilei soletbü tegü lela sakkukei.

¹²Ahasueras Chobaei provins pendoua nyetche chaloua nyenei lit anthüknyi boubü chalou anthüksem boubü, kho Adar lita kümla pienkei.

¹³Dobü le che, khei provins wekoa ngühkhüm kho kulabü dogo phang pendou la ngetikei, hoba Jihudabüei kho chalou khünei haoenei haoeneibü dangbou to phok lambulabü lamlean kijan dogo phinthonkei.

¹⁴Hibü koli yousobü, Chobaeibü kümaleia jungeibüa setan ngühlang künbü shuong Chobaeibü ngühkhümei panteiko hoba sokosepbo haukei, hoba ngühkhüm kho Shushan sangnyua kümbei.

¹⁵Hobaje Choba thedang ka Mordekai, Chobaeibü neisimei pi hoba thupaibü lean hoba phembanei maibü hoba nakthüngan sakbü neisimei lean haukei, hoba Shushan sangnyubüei olinbüei uihinko lem likei.

¹⁶Jihudabü shanga kho chalou kho olin ngesak maangnyu angbü jihsiphai che hoba nyensang nyenhangei shenan kikei.

¹⁷Hobaje provins weko, hoba sangnyu weko ai aeto ong Chobaeibü sakkubü hoba ngühkhüm loukei, Jihudabü olinbü hoba olinyobü lemsilang hoba solo kikei. Hobaje kaonyeka mütli juong Jihudabü la yeikei, aieilausi Jihudabü to hatbü haoen to kikei.