Read Chang Naga ESTHER 9 Bible Online

ESTHER 9 - Chang Naga bible

ESTHER 9

¹Tou lit anthüknyi boubü laobou Adar lit ki, ho lit chalou anthük semboubüa ladang Chobaeibü sakkubü hoba ngühkhüm kümla nyangko loukei, Jihudabüeibü dangbou shuongei haoen thüka bunyu lela dambü chaloua khei yingsikei kho jaksheida, khei haoen thüka haoenei mangsenbü Jihudabüei ong bunyu yeian kikei.

²Jihudabü haoen lolo liko haoeneibü sangnyu Ahasueras Chobaeibü provins pendoua haoen to ik shatla lambü shuong to ik atla kamshaikei; hoba aoeikei haoen khulimbo aloenen; aishanga müt pendou to hatbü lühbü kikei.

³Hobaje provinsa konglebü pendou hoba Chobaeibü kümbüleibü shuongei Jihudabü to thuikei; aieilausi Mordekai to hatbü haoen to kikei.

⁴Aishanga Chobaeibü chema Mordekai yaangbü kikei, hoba haoeibü nyenhang provins pendou aeto haukei, aishanga ho Mordekai aei aei yaangbou la yeikei.

⁵Hobaje Jihudabüei haoeneibü dangbou shuong inei haitibü hoba leilutibüei thükkei, hoba haoenei ai kümmang sühkei haoen to mangsenbü to kho kümbei.

⁶Hobaje Shushan sangnyua Jihudabüei müt saongao ngaonei haitikei hoba mautikei.

⁷Hobaje Parshandatha hoba Dalfon hoba Aspatha,

⁸hoba Poratha hoba Adalia, hoba Aridatha,

⁹hoba Parmashta, hoba Arisai, hoba Aridai, hoba Vaisatha,

¹⁰Hamedathaeibü shou Hamaeibü shousi müt an, Jihudabü dangbou, haoenei haitikei, lausikei makletbü peisileia haoenei ik üt.

¹¹Kho chaloua Shushan sangnyua haitian kibü shuong lühbak kho Choba la ngetikei.

¹²Hobaje Chobaei Esther Chobasao to laukei, “Jihudabüei Shushan sangnyua müt saongao ngao haitia hoba mautia hoba Hamaneibü shousi an haitia, khülonga lubü provinsa haoenei ai kümbei? Tou kaibü phebü ai? hoba kho sakkulabü; ayingsi nyi mangsühbü ai? hoba kho kümlabü.”

¹³Kheijinei Estherei laukei, “Chobaei maang angalonga, Shushana kibü Jihudabü to tatbü ngühkhüm tegü ngietkei kümla sakkushima, hoba Hamaneibü shousi müt an bunyua saütiashi.”

¹⁴Hobaje Chobaei khei kümla sakkukei hoba Shushana ngühkhüm che kukei, hoba haoenei Hamaneibü shousi müt an saükei.

¹⁵Hobaje Shushana kibü Jihudabü Adar lit chalou anthüklei boubüa haoen liko kamshaikei hoba Shushana müt saongao semnei haitikei, lausikei sangshibü peisileia ik üt.

¹⁶Hobaje Jihudabü provins lubüa kibü shuong liko kamshaikei, hoba haoeneibü langkei shanga lokei hoba haoeneibü dangbou ka solo hapbei, hoba haoen to mangsenbü shuong hajar anjinleito ngao haitikei; lausikei sangshibü peisileia ik üt.

¹⁷Ho Adar lit chalou anthük semboubüa kümbei, hoba anthüklei bounyeta haoen haksokei, hoba kho lem libü hoba olinyobü chalou che kümbei.

¹⁸Lausikei Shushana kibü Jihudabü anthüksem bounyet kamshaikei, hoba anthükngao bounyet haksokei, hoba kho lem libü hoba olinyobü chalou che kikei.

¹⁹Hibü Jihudabü aoyou sangkhonga kida hoba aoyou sang ba lebü akishanga kida Adar lit chalou anthüklei boubü kho olinyobü hoba lem libü hakso chalou hoba cheei che la jongsak kuyobü chalou nouda.

²⁰Kheijinei Mordekaiei habü ho dokei, hoba Ahasueras Chobaeibü provinsa Jihudabü pendou jungto nyangbü hoba saabü to,

²¹Adar lit anthüklei boubü hoba jeteibü lit anthükngao boubüa po weko,

²²Jihudabü haoeneibü dangbou ka solo hapbü hoba haoen shanga maangshat ka olinbü hoba haapbü ka solo chalou jeileibü lit, khei haoenei khübü kho lem hoba olinbü hoba cheei che la jongsak hautiyobü hoba shalebü la jongsak kubü chalou tegü haoenei nou noula le hautikei.

²³Hobaje Jihudabüei haoenei khangan kibü tegütham kümlabü hoba Mordekaiei haoen to dobü tegü ditenan kümbei.

²⁴Aieilausi Jihudabü dangbou Agagbü Hamedathaeibü shou Hamanei Jihudabü khulimbo haoen shemtila huon takkei hoba Purim phaang pakbü kho tetlabü, haoen mautila hoba leilutila phaang pakkei.

²⁵Lausikei ladang Esther Choba jungto loukei, khei Hamanei Jihudabü khulimbo huon takbü haoeibü khu to ngailabü hoba hao hoba hao shousi shuong bua phenetnyu haitila Chobaei sakkukei.

²⁶Khünei haoenei Pur ka pheklangan khübü chalou to Purim dogo laukei. Hibü kho lea dobü ngüh pendou tegütham hoba kho kümsilei shanga haoenei hapbü hoba haoen thükto haüthüklabü shanga,

²⁷Jihudabüei haoen shanga, hoba haoen to bou lamjung louan kibü pendou shanga kho üplabü, khei po weko khübü chalou nyi, doan kibü tegü lem lilabü kho ngühkhüm tegü khangenkei.

²⁸Hobaje khübü chalou damenla hoba mütpem weko phola chemdang weko, provins weko, hoba sangnyu weko hoba Purim chalou khübü Jihudabü yoa anangletjan, ayingsi haoeneibü shisi shousiei khübü damenbü athontijan dogo ngühkhüm yeikei.

²⁹Kheijinei Abihaileibü shou Esther Chobasaoei hoba Jihudabü Mordekaiei ho nyiboubü Purim le kaangngaitila hau pendouei dokei.

³⁰Hobaje Jihudabü pendou jungto: Ahasueras Choba sangle provins saongaoto saoto nyet to sangmai hoba ngühmaiei,

³¹Purim chalou shuong kho pienbü jiha loujan, khei Jihudabü Mordekai hoba Esther Choba saoei haoen to hoba haoeneibü shousina to ngetiko sakkubü tegü mühei nyengbü hoba waangbü chia shanga le hautikei.

³²Hobaje Esthereibü ngühkhümei Purim shanga khübü kümsilei kaangngaitikei hoba kho lea dokei.