Read Chang Naga LEIYENBÜ 1 Bible Online

LEIYENBÜ 1 - Chang Naga bible

LEIYENBÜ 1

¹Tou Israel shousi shuong mütpem weko lulu chempen yoa Ijep to Jakob yoa loubü shuong nyen habü ho ki.

²Reuben, Simeon, Levi hoba Jihuda,

³Issakar, Zebulun, hoba Benjamin,

⁴Dan hoba Naftali, Gad hoba Asher.

⁵Jakob ka pakbü müt pendouei anjinlei kikei, lausikei Josefje Ijepa hauan kiteikei.

⁶Touje Josef si haoeibü jaisinasi shuong pendou hoba kho meten pendou haikhümbei,

⁷lausikei Israel shousi shuongje aei thusinaang maiko bukko haako haukei.

⁸Kheijinei Ijep kaodaka Josef angebü choba haanbü che longkei.

⁹Haoei hao mütshuong to laukei, “Chühashi, Israelbü shuong mütshang aei juongbou hoba hau kibou yeida.

¹⁰Kaiya, haoen haako hauan wapyo longalonga haoen seneibü dangbou shuong yoa yoan sen khulimbo wapyoan kaonyek ka satsi amaibüla hoba haoen aei haakoyaangko ohautila senei haoen amaiko jungeikho.”

¹¹Hibü Ijepbüei haoen thükto onat jinkuko haoen shieinangeila shanga haoen thüka lombü shuong phokei, hoba haoenei Farao shanga shaubu thanshang sangnyu shuong Pithom si Rameses kümbei.

¹²Lausikei haoenei latetche shieinangeida, khütetche haoen aei aei haakei; hibü Ijepbü shuongei haoen khei jungeila hatkei.

¹³Hobaje Ijepbüei Israel shousi shuong aeibou shieikoeko khangentikei.

¹⁴Shungkung tham thamjuok hoba sekmou chemmou kümsilei pendouei haoeneibü langkei khauektham yeitikei hoba haoeneibü kümsilei pendoua haoen la tukosekko kümtikei.

¹⁵Kheijinei Ibribü sao na hapjinei thuibü müt nyi Shifra si Pua nyenbü to Ijep chobaei laukei,

¹⁶“Ladang kanei Ibribü nyuei na hapbüa thuilaje bousu yinga longa haitiashi hoba yaksa yinga longa lang phoshi.”

¹⁷Lausikei na hapbü thuinyu shuongei Mühghaü to hatkei, hoba Ijep chobaei haoen la ngühkhüm kubü tegü aküm, lausikei bousu nashou shuong lang phokei.

¹⁸Hibü nahap thuinyu shuong kho Ijep chobaei ngakei hoba haoen to laukei, “Kanei aila ho hai kümbei? Aila bousu nashou shuong lang phokukei?”

¹⁹Nahap thuinyu shuongei choba to laukei, “Aieilausi Ibri saoje Ijep sao tegü aying; aishanga haoen aeibou sokeisepbei, hoba nahap thuinyu shuong asühtoua na hapan kiteida.”

²⁰Kho tegü Mühghaüei nahap thuinyu to yoko jungeikei, hoba haoen mütshang aei haakoyaangko hoba hau kiko yeikei.

²¹Nahap thuinyu shuongei Mühghaü to hatsije haoei haoeneibü chemdang maibü longtikei.

²²Kheijinei Faraoei hao mütshuong la ngühkhüm kuko laukei, “Ibri saoei bukbü bousu shou pendou Nail shumang to tekan jinkushi, lausikei kanei yaksaje lang phokushi.”