Read Chang Naga LEIYENBÜ 12 Bible Online

LEIYENBÜ 12 - Chang Naga bible

LEIYENBÜ 12

¹BUNYUBOUei Mosa si Aron to Ijep kaodaka lenkei,

²“Kan shanga ho lit ho khangbü kilabü; ho poa shaangbou lit kilabü.

³Israel mütshuong pendou to lenashi, ho lit anbounyet haoen mütpem wekoei jembü shanga san shoushou chebang lelabü, kho haoeneibü chemdang thüngthüng, chemdang che shanga san shoushou che kilabü.

⁴Hobaje chemdang che kho san shoushou che khümbo lela yongko hanalonga, chemdang kabü mütshang tetan, haoenei lepbou to hamjan. San shoushou kho müt wekoei shauthüng kanei takteian kümashi.

⁵Kaneibü san shoushou kho nali athebü hoba kap anakbü, po che onbü shou yingjan, kanei kho san shuong ka ayingsi lon shuong ka lelabü.

⁶Hobaje ho lit chalou anthük leibounyet asühshongko kanei kho phojan; hoba takshatbü Israel mütshang pendouei kho chasemlamto haitilabü.

⁷Hobaje kho shaubü chema haoenei sii at sungan koukhün nanae maeae hama hoba koukhua naangan phojan.

⁸Khüyoutham haoenei phe kho wana kangan pikyik khaubü yoa hoba tokai ajinbü wentek yoa shaulabü.

⁹Kho phe sang ayingsi deikonga athungshaujan, lausikei khu, yousiik hoba sensimaang khümbo yoan wana kangan shauashi.

¹⁰Hobaje kho ngeyang sühko tejouti; ngeyang sühko ai joulaje kho kanei jikan apashi.

¹¹Kanei ho hai kümjan: kan shembe kaian, kaneibü youa nguok lonan kaneibü julo ika jungan, kanei panteiko shaujan. Ho BUNYUBOUei Püetbü lem ki.

¹²“Khüyoutham ngo Ijep kaodak pendoua shoonglabü hoba shaangbü shou si shaang shatbüsitbü pendou haitilabü; hoba Ijep mühghaü shuong pendou thükto matjem sungbalabü. Ngo BUNYUBOU ki.

¹³Hobaje sii naangbü koukhu shuong kho kan kibü chem shensinge kilabü. Ladang ngei sii haplaje ngei kan koletlabü hoba Ijepbü to limsilang kayangei ngümjinei kan to ameitilabü.

¹⁴Hobaje ho chalou kan shanga damen-nou che kilabü; loulabüa meten meten kanei ho BUNYUBOU to lemlinou che kilabü.”

¹⁵“Chalou nyet kanei tokai ajinbü wentek shaulabü. Shaangbounyet kanei kaneibü chem ka tokai sungan apjan; aishanga shaangbounyet ka nyetbounyet sühko aoei tokai jinbü shaulaje kho müt Israel ka wapan aplabü.

¹⁶Shaangbounyet kanei saopobü kamshai che, hoba nyetbounyet saopobü kamshai che huiashi. Khübü chaloua kanei ai akümaleijan, lausikei müt wekoei ai shaujan kho ong kanei lamlela thükkei.

¹⁷Hobaje kanei tokai ajinbü wentek lem noulabü; aishanga kho chaloua Ijep kaodak ka ngei kan mütshanga leiyenkei; hibü kho chalou kanei meten sünga ngühkhümei ponpen shanga nou noulabü.

¹⁸Shaangbou lit chalou anthük leiboubü chasem ka kho lit saoto chebounyet chasem sühko kanei tokai ajinbü wentek shaulabü.

¹⁹Chalou nyetnyet kanei chema tokai ühüptijan; aieilausi aoyouei tokai jinbü shaulaje kho müt yenbou yingsikei, bukmüt yingsikei, Israel shuong yoka wapan aplabü.

²⁰Tokai jinbü aikei kanei ashaujan. Kan kishang pendoua kanei tokai ajinbü wentek shaulabü.”

²¹Kheijinei Mosaei Israelbü jaishou shuong pendou huishaikei, hoba haoen to laukei, “Kan chemdang chemdang thüng san shoushou pienan Püetbü lembü haitiashi.

²²Kanei hisop shen che jungjung louan phaua kibü siia hamashi hoba phau kabü sii kho koukhua hoba kouthung jijihama naangan phoashi. Kan aokei ngeyang asühshongko jembü chem koukhün ka üanglabü.

²³Ladang BUNYUBOU Ijepbü haitila danjung haulaje, hoba koukhua hoba kouthung jijihama sii kho haplaje, BUNYUBOUei koukhün kho koletan satlabü, hoba Haitibou Hangangbü kan chemto lotan kan haitila haoei asakkulabü.

²⁴Hobaje kan si kaneibü thensilen shanga song ho ngühkhüm tegü ponpen shanga kanei jungeilabü.

²⁵Hobaje BUNYUBOUei thekubü tegü, ladang kan haoei kan la kula thekubü kaonyek to loulaje, kanei ho haangsong jungeilabü.

²⁶Ladang kaneibü shousi shuongei, ‘Ho haangsong tetlabü ai?’ dogo laulaje,

²⁷kheijinei kanei lenlabü, ‘Ho BUNYUBOUeibü Püetbü lembü ki, hoba haoei Ijepbü haitijinei, Ijepa Israel shousi shuongeibü chemje koletkei hoba seneibü chem shuongje amenkei.’ ” Kheijinei mütshuongei khu ngomjung kouan lembei.

²⁸Israel shousi shuongei hauan BUNYUBOUei Mosa si Aron la sakkubü tegü haoenei kümbei.

²⁹Saotometuphanga Ijep kaodaka choba setshanga setbü Faraoeibü shaang bukbü ka laangpoba thüngdanga kibü müteibü shaang bukbü shou sühko hoba shatsinam hoba samkeisamukei shaang shatbüsitbü pendou BUNYUBOUei haitikei.

³⁰Hobaje Farao hoba haoeibü khangenbü pendou hoba Ijepbü pendou nangnak pienkei. Hobaje Ijepa haapbü yaang kikei; aieilausi chem chenei ongkei ühaibü akitei.

³¹Nangnak Faraoei Mosa si Aron ngaan laukei, “Meimeiashi, ngeibü mütli apyoan Israel shousi shuong leian hauan nyi laubü tegü kaneibü BUNYUBOU to lemashi!

³²Kanei laubü tegü kaneibü sanshuong, masu shuong, leian satashi, hoba ngokei haütibü!”

³³Ijepbüei Israelbü panteiko, kaonyek ka tongde sattila shanga haoen thungeikei; aishanga haoenei laukei, “Kün pendou haian aplabü!”

³⁴Hibü mütshuongei tokai ajinbü wen jungan hoba wen nyatbü phauyaang haoeneibü neiei shoan phak to tonan jinkei.

³⁵Hobaje Mosaeibü ngüh tegü Israel shousi shuongei kümbei; hoba Ijepbü ka hon yak, chandinam yak hoba neisimei hikei.

³⁶BUNYUBOUei mütshuong la onou kusije haoenei hibü haoen la letikei, hoba kho tegü haoenei Ijepbü nyaksinam solangkei.

³⁷Israel shousi shuong Rameses ka Sukot sühko haukei. Nashou yaksa aweko bousu shuong hajar saongao lak youei paikei.

³⁸Toukei haoen yoa kheiyobü mütshang yaang, san si lon shuong, masu shuong, hoba samkeisamuk juong yoan haukei.

³⁹Ijep ka wennyat künan loubüei haoenei tokai ajinbü wentek kangshaukei. Aishanga kho tokai ajinko kikei; aieilausi haoen Ijep ka thungan sattisije ühaien hoba haoen shangakei shausiyung alamleen.

⁴⁰Tou Israel shousi shuong Ijep kaodaka kibü po saongao leito khujin kikei.

⁴¹Po saongao leito khujin thonlama tükde khünyet kho BUNYUBOUeibü mütshang pendou Ijep kaodak ka meimeijung haukei.

⁴²Ho haoen Ijep kaodak ka leilangla BUNYUBOUei lombü langyou che kiteikei; hoba Israel shousi pendouei meten meten BUNYUBOU shanga chüheitaiko kilabü langyou che ki.

⁴³BUNYUBOUei Mosa si Aron to laukei, “Püetbü lem ngühkhüm ho ki: Küksithang aoeikei ho ashaujan;

⁴⁴lausikei namei jekngaibü aaomüt, nyi hao la kipbuan kialonga haoei ho ka shauenakei.

⁴⁵Pensiyen hoba mulambü mütei ho ka ashaulabü.

⁴⁶Kho chem chenei ashaujan, nyi phe kho danga khonga jungan apaijan; hoba khoka lo che ongkei aleilujan.

⁴⁷Israelbü shuong pendouei kho jungeijan.

⁴⁸Hobaje ladang yenbou che ka junga otan kilaje hoba BUNYUBOUeibü Püetbü lema yomang sühlaje, haoen bousu pendou kipan apbuashi, hoba kheijinei hao nyangko louan yolabü; hoba hao sangbüshou che tegü kilabü; akipbü aoeikei ho ka ashaujan.

⁴⁹Sangbüshou hoba kan yoa louan kibü yenbou shanga ngühkhüm che kilabü.”

⁵⁰BUNYUBOUei Mosa si Aron to lenbü tegü Israelbü pendouei khei kümbei.

⁵¹Khünyettham Israel shousi shuong mütshang yaang Ijep ka BUNYUBOUei leiyenkei.