Read Chang Naga LEIYENBÜ 13 Bible Online

LEIYENBÜ 13 - Chang Naga bible

LEIYENBÜ 13

¹BUNYUBOUei Mosa to laukei,

²“Israel shuong yoa shaangbou bousushou ayingsi paangshou kho küla saüenkushi. Mütkei meisiaukei ajanjan pendou büngbü nyusem ipan shaang hapbü weko ngeibü!”

³Mosaei mütshuong to laukei, “Aaothu ka Ijep apyoan lousatbü chalou ho damenashi: aieilausi hau kibü ikei BUNYUBOUei khüka kan leiyenkei. Tokai jinbü wentek aikei ashaujan.

⁴Tat kan Abib lita shaangbounyet meimeida.

⁵Hobaje sendei si naodei kouko kibü Kanan, Hit, Amor, Hiv, hoba Jebus kaodak, laobou haoei kaneibü pisibousi shuong to kan la kula thekukei khüto BUNYUBOUei kan leian loujinei kanei kümsilei kho ho lita jungeishi.

⁶Chalou nyet kanei tokai ajinbü wentek shaulabü; hoba nyetbounyet BUNYUBOU shangabü lem che lilabü.

⁷Chalou nyet khümbo kho tokai ajinbü wentek shaulabü; hoba tokai jinbü wentek aikei kan yoa hoba tokei kaneibü kaophei sühkoa ühüptijan.

⁸Hobaje kho chaloua kanei kaneibü shousi to lenshi, ‘Ngo Ijep ka longjinei BUNYUBOUei kü shanga kümbü khümboei ho ki.’

⁹BUNYUBOUeibü ngühkhüm kaneibü sembunga kila shanga ho kaneibü ika tetsida che kilabü, hoba kanei khüngjaa damenlabü che kilabü. Aieilausi hau kibü ikei BUNYUBOUei kan Ijep ka leieyenkei.

¹⁰Hibü ho ngühkhüm kanei jih tükdea po weko jungeishi.

¹¹“Hobaje ladang BUNYUBOUei kan Kanan kaodak to leian louan haoei kan to hoba kaneibü pisibousi shuong to theyolanyobü tegü kho kanla kulaje,

¹²nyusem ipbü pendou hoba kanei kibü shatsinam samkeisamuk shaang shatbüsitbü weko kanei BUNYUBOU shanga pinyinan phoashi. Paang shuong kho BUNYUBOU shanga kilabü.

¹³Hobaje shaang shatbü gadu weko kanei san shoushou cheei angngaiashi; hoba kho kanei üangngai longa kanei haoeibü ngüm leilukushi. Kaneibü jayangshou yoa shaangbüshou kho kanei angngaijan.

¹⁴‘Ho ai tetlabü?’ dogo kaneibü jayangshouei phealonga, kanei hai lenshi, ‘Aaothu ka hau kibü ikei BUNYUBOUei sen Ijep ka leiyenkei.’

¹⁵Ladang Faraoei sen hautila tukeisekkei, kheijinei Ijep kaodaka shaangbü bousushou hoba shaangla shatbüsitbü meisiau pendou BUNYUBOUei haitikei. Khola nyusem ipbü paang pendouei ngei BUNYUBOU to lemda, lausikei ngeibü jayangshou shaangbü pendou ngei angngaida.

¹⁶Hobaje kho ika hoba kaibü khüngjaa shensinge che kilabü; aieilausi hau kibü ikei BUNYUBOUei sen Ijep ka leiyenkei.”

¹⁷Ladang Faraoei mütshuong hautikei, Filistia kaodak aeto haubü kho nyangbou lausikei kho lamto Mühghaüei haoen leian ohau. Aishanga Mühghaüei laukei, “Aingenyu haoenei wapyo hapjinei, maangpon sepeinyu Ijep kaodak to haoen ngailabü.”

¹⁸Hibü Mühghaüei mütshuong yam aeto Saklangbü Yungnyu aeto leian haukei. Israel shousi shuong wapyola lamlean Ijep kaodak ka angkei.

¹⁹Hobaje Mosaei hao yoa Josefeibü lo künkei; aieilausi Josefei Israel shousi shuong to kaangkhühtham thetilantiko hai laukei, “Mühghaüei maimaitham kan pean chühlabü hoba kanei ngeibü lo haka kan yoa künlangjan.”

²⁰Hobaje haoen Sukot ka meimeijung hauan Etham yamlam thonbüa shaikei.

²¹Haoen chaloua si nangnak dogo haula shanga chaloua sangmei thaonyu cheei hoba haoen la ngesakbü kutila nangnak wan thaonyu cheei dogo haoen lam leila BUNYUBOU haoen thedanga haukei.

²²Chaloua sangmei thaonyu hoba nangnak wan thaonyu kho mütshuong ka abang.