Read Chang Naga LEIYENBÜ 14 Bible Online

LEIYENBÜ 14 - Chang Naga bible

LEIYENBÜ 14

¹Kheijinei BUNYUBOUei Mosa to laukei,

²“Israelbü to sepeinyu ngaian Pi Hahirot thedanga Migdol si Saklangbü Yungnyu kaanglang Baal Zefon nyangko shaiteishi dogo lenshi.

³Aieilausi Faraoei ‘Israelbü phetsen kaoei kailepan yamei mühakei’ dogo laulabü.

⁴Hobaje ngei Farao maang kaangtilabü hoba haoei haoen shijung haulabü. Lausikei Farao si haoeibü sepai tan pendou thüka ngei nyenhaang haplabü; hoba Ijepbüei ngo BUNYUBOU ki dogo ngelabü.” Hobaje Israelbüei kho tegü kümbei.

⁵Ladang Ijep choba to mütshuong sada dogo lenkei, Farao si haoeibü yaangenbü shuong dambü jakshaian apbei, hoba laukei, “Senei ai kümbei? Senei Israelbü litia, hoba senei haoeneibü eik aleouko apa!”

⁶Hibü haoei haoeibü kailong lamlean haoeibü sepai shuong hao yoa leian haukei.

⁷Shanenbü kailong saongaolak hoba Ijepbü kailong pendou hoba khübü thüka leiyeibü dan yoan hao yoa haukei.

⁸Ijep choba Faraoeibü maangpon BUNYUBOUei kaangtisi haoei Israel shousi shuong phai shijung haukei; aieilausi Israel shousi shuongkei maangei omatnyu hauko kikei.

⁹Ijepbü shuongeibü koli sepai, hoba kailong leibü dan hoba sepai shuong khümboei Israelbü shuong shilangkei, hoba haoen Pi Hahirot si Baal Zefon nyangko Saklangbü Yungnyu yungkoa shaian kijinei laphetkei.

¹⁰Ladang Israel shousi shuongei chühangtikei, haoenei Farao Choba si Ijepbü shuong hao phainei haoen shijung louko hapbei; haoen aeibou hatkei hoba Israel shousi shuongei BUNYUBOU to ngekkei.

¹¹Hobaje haoenei Mosa to laukei, “Ijepa hee aki dogo nyi kün yama haitila leian satkei sai? Ijep ka leian longan nyi aila kün ho tegü jungeida?

¹²‘Ijepbü khangenko kikho, kün khei ong apyoshi’ dogo ho ngüh Ijepa ka to alau lo? Aieilausi yama haibü toje Ijepbü khangenko kibü kün shanga maibou yingkhoulabü.”

¹³Mosaei mütshuong to laukei, “Kan tehüt! Atopeiko kishi, hoba BUNYUBOU khümenbü laobou kan shanga haoei tat kümlabü ki khüto chühashi; aieilausi kanei tat hapbü Ijepbü shuong kanei ladangkei ühüpmailabü.

¹⁴BUNYUBOUei kan shanga wapyolabü, kanje sangsembo kishi.”

¹⁵BUNYUBOUei Mosa to laukei, “Aila nyi kü to ong ngekda? Israelbü to thedang aeto hauashi dogo lenshi.

¹⁶Nyi ju tonenan yungnyua ik shingan kho janyinashi, hoba Israel shousi shuong yungnyu jenyua kao ulangbüa haulabü.

¹⁷Hobaje ngei Ijepbü maangpon kaangtilabü hoba haoenei haoen phaito shilabü; hoba ngei Farao, haoeibü sepai, haoeibü kailong, hoba haoeibü koli thüka setbü sepai thüka ngeibü nyenhaang haplabü.

¹⁸Ladang ngei Farao, haoeibü kailong hoba haoeibü kolia setbü sepai thüka nyenhaang haplaje, kheijinei Ijepbüei ngo BUNYUBOU ki dogo ngelabü.”

¹⁹Mühghaü khuthük hangangbü laobou Israelbü shaishang thedanga haukei, kukjung hauan haoen phainei lokei. Sangmei thaonyukei thedang ka kukkei hoba haoen phainei

²⁰Ijepbü si Israelbü kanglanga lokei. Langyang sünga sangmeiei Ijepbü la nakthühkukei hoba Israel shousi la ngesakkukei; khoei langyang sünga cheei che nyangko ohauen.

²¹Kheijinei Mosaei haoeibü ik yungnyu aeto shingkei, hoba BUNYUBOUei chaangbou yei kaangbüei langyang sünga yungnyu kho souan ngaitikei, hoba kho kao ubüla yeitikei. Hobaje yungnyu kho janyinan apbei,

²²hoba Israelbü shuong, haoeneibü nanae maiaedang hama deiei kümthang la lean kaolina yungnyu khatkei.

²³Hobaje Ijepbü haoen shijung Faraoeibü koli, haoeibü kailong hoba haoeneibü koli sepai pendou yungnyu jenyu to haoen phai semjung lotkei.

²⁴Langnge lamto BUNYUBOUei wan si sangmei thaonyu ka Ijep sepai shuong to chühyantikei hoba haoen panglangtikei.

²⁵Hobaje haoei haoeneibü kailong you hatlepsije haoenei leila aeibou khonsakkei, hibü Ijepbü shuongei laukei, “Sen Israelbü thedang ka satakho! Aieilausi BUNYUBOUei haoen shanga Ijepbü khulimbo wapyoda.”

²⁶Kheijinei BUNYUBOUei Mosa to laukei, “Ijepbü thükto, haoeneibü kailong thükto, hoba haoeneibü koli sepai thükto dei nyibou loukoutila shanga nyi kaibü ik yungnyu thükto shingashi.”

²⁷Hibü Mosaei haoeibü ik yungnyu thükto shingkei, hoba ngeyangje yungnyu kho nyishou tegü yeikei. Hobaje Ijepbü khüka satkei, hoba BUNYUBOUei haoen yungmanga phonglangtikei.

²⁸Hobaje dei kho sepeinyu longeitian kailong, kolia setbü sepai shuong hoba Israelbü phai semjung loubü Faraoeibü lakjaibü shuong yungnyu to atbü pendou danglepbei; haoen che ongkei ajou.

²⁹Lausikei Israelbü shuongje yungnyu jenyua kao ubüa paikei, hoba haoeneibü nanae maiaedang ham shanga yungnyu kho kümthang la lekei.

³⁰Khünyet chaloua BUNYUBOUYUBOUei Israelbü shuong Ijepbü ik ka khümenkei; hoba Israelbü shuongei Ijepbü haibü hapbei.

³¹Ladang Israelbü shuongei BUNYUBOUei Ijepbü khulimbo seisihau yaangbüei kümbü hapbei, kheijinei mütshuongei BUNYUBOU to hatkei; hoba haoenei BUNYUBOU to hoba hao khangenbou Mosa to mailembei.