Read Chang Naga LEIYENBÜ 15 Bible Online

LEIYENBÜ 15 - Chang Naga bible

LEIYENBÜ 15

¹Kheijinei Mosa si Israel shousi shuongei BUNYUBOU la ho chia atkuko laukei: “Ngei BUNYUBOU la chia atkulabü, aieilausi haoei soneikangko thük hapa; koli hoba khonei setbü haoei yungnyua shemtia;

²BUNYUBOU kho ngeibü hau hoba ngeibü chia; hoba hao ngo khümenbou yeia, hao ngeibü Mühghaü ki hoba ngei hao sanglabü. Hao ngeibü bousi shuongeibü Mühghaü, ngei hao yaangentilabü.

³BUNYUBOU kho lakjaibou ki; haoeibü nyen BUNYUBOU ki.

⁴“Faraoeibü kailong hoba lakjaibü dan haoei yungnyu to tekan jinkukei, hoba pienbü lajamleibü shuong Saklangbü Yungnyu maang to ada.

⁵Si haübüei haoen küplepa; Laang che tegü haoen yungnyu haüboua nyema.

⁶“O BUNYUBOU, kaibü mai ik seia hatlamoklabü che ki O BUNYUBOU, kaibü mai ikei kaibü dangbou netla yeiko jangnyinkua.

⁷No thükkaboua yaangenbüei, kaibü dangbou shuong nyi pekan apda; no khau lotbüa haoen youho tegü lonan aptida.

⁸Hobaje kaibü kungkhün hakei metbü ka yungnyu kho chela onshaian apbei; yungsen kho tangshaitham kümthang tegü lokei; yungnyu deiyaaka si kho ontoula yeian apbei.

⁹Dangbou shuongei laukei, ‘Ngei shijung haulabü, ngei laphetlabü; ngei soletbü peisilei janan lelabü. Haoen thüka ngeibümaangdak senyühshemlabü; ngei ngeibü in setenlabü, ngeibü ikei haoen shemtilabü.’

¹⁰Lausikei nyi hak metan jinkukei, hoba yungnyuei haoen küplepbei. Dei yaangbüa haoen shisanam tegü maangto atkei,

¹¹“O BUNYUBOU, saopobüa soneikangko, nyensangbüa hatlamoklabü seikümseilei kümbo, mühghaü shuong pendou yoa no phatko ao ki?

¹²Nyi kaibü mae ik shingkei hoba kaoei haoen suikei.

¹³Kaibü üeisanouei nyi khümenbü eikshuong nyi leiyenkei; kaibü haua nyi haoen kaibü saopobü kishang kaoen to leikei.

¹⁴Phangshuongei kho ditjinei haoen lühkei; Filistiaa kibü shuong to khonkuei sühkei.

¹⁵Edoma leiyeibü shuong hatyomokyoko kikei; Moab kaodak kabü bunyu shuong to hatbümokbüei sühkei; Kanana kibü shuong tühnyinkei.

¹⁶Hatbülühbü jemtenbü haoen thüka sühkei; O BUNYUBOUYUBOU, kaibü eikshuong adankhümshongko, kaibü phem kaibü hauei haoen laang che phatko atopeiko yeitia.

¹⁷O BUNYUBOU, nyi no kila kümbü kishang; O BUNYUBOU, kaibü ikei kümbü lemshang to, nyi haoen leishaikei, hoba nyi kaibü shongha phokukei.

¹⁸BUNYUBOUei ponpen thon akiko chobalabü.”

¹⁹Ladang Faraoeibü koli shuong hoba kailong yoa haoeibü sepai shuong yungnyu jenyu to atkei, hoba nyibou yungnyu kho haoen thükto lottikei; Israel shousi shuongje yungnyu jenyua kao ulangbüa paitikei.

²⁰Kheijinei Aroneibü nou thuseinyu; Miriamei jembü ik busena jungkei, hoba yaksa shuong pendouei sao phainei busen kaangko nyen sangko laukei;

²¹“BUNYUBOU to chia lauashi, aishanga haoei soneikangbü thüksimin hapa; haoei koli shuong hoba khonei setbü shuong yungnyu maangto shemetlangtia.”

²²Kheijinei Saklangbü Yungnyu ka Mosaei Israel shousi shuong leian thedang ae Shur phetsen kaodak to leian atkei. Yama chalou semnyet paian phaia haoenei dei ühüp.

²³Ladang haoen Mara to loukei, haoenei Mara dei kho ayungen; aishanga dei kho khauekbü kikei. (Khoei kaoeneibü nyen Mara nyenkei).

²⁴Hibü mütshuongei Mosa khulimbo nyamnyamko laukei, “Senei ai yungla?”

²⁵Hobaje Mosaei BUNYUBOU to welaukei; hoba BUNYUBOUei hao la bunetshou che lenkei, hoba haoei kho deia jinkusi dei kho teikei. Khünei BUNYUBOUei haoen shanga sakkubü hoba Ngühkhüm che kümbei, hoba khonei haoei haoen takteikei.

²⁶Haoei laukei, “Kanei kaneibü Mühghaü BUNYUBOUeibü ngüh noua nepbo ditko laualonga, hoba haoeibü Ngühkhüm pendou jungeiko dogo yingalonga, Ijepbü to sühtibü shatsinyat che ongkei ngei kan la asühtilabü; aishanga no maitibou BUNYUBOU kho ngo ki.”

²⁷Kheijinei shumang anthüknyi hoba hekyang anjinlei kibü Elim sühko haoen loukei; hoba khünei dei nyangko haoen onshaikei.