Read Chang Naga LEIYENBÜ 17 Bible Online

LEIYENBÜ 17 - Chang Naga bible

LEIYENBÜ 17

¹Israel mütshang pendou Sin yamlamang ka meimeian BUNYUBOUei sakkubü tegü kaoen che ka che to kukkei hoba haoen Refidima shaikei; lausikei khonei mütshuong shanga yunglabü dei akitei.

²Hibü haoenei Mosa to oyoko laukei, “Künla yunglabü labü.” Mosaei jongaiko laukei, “Kan kü to aila oyoda? Aila kanei BUNYUBOU takteida?”

³Lausikei khonei mütshuong deiei aeibou mühkei; hoba mütshuongei Mosa khulimbo nyamnyambei. Haoenei laukei, “Deilaei kün, küneibü shousi shuong hoba samkeisamuk shatsinam shuong haitila Ijep kaodak ka aila nyi kün leijung loukei?”

⁴Hibü Mosaei BUNYUBOU to ngekko laukei, “Habü mütshuong to ngei ai kümla? Haoenei kü to laangei tetlabü lele ong lamleakei.”

⁵BUNYUBOUei Mosa to laukei, “Ka yoa Israelbü jaishou shuong at leian mütshuong thedangto hauashi, hoba kaibü ju laobouei yungnyua ngümbei kho kaibü ika jungan hauashi.

⁶Chühashi, Horeba ngo ka thedanga laang thüka lolabü. Nyi laang to ngümashi, hoba mütshuongei yunglabü lele kho laang ka dei longlabü.” Mosaei Israelbü jaishou shuong thedanga kho tegü kümbei.

⁷Hobaje kho kaoen to Massa hoba Meriba dogo nyenkei, aieilausi Israel shousi shuongei oyokei hoba BUNYUBOU takteiko laukei, “BUNYUBOU sen yoa kiasi aki?”

⁸Kheijinei Amalekbü louan Israelbü to Refidima wapyokei.

⁹Mosaei Joshua to laukei, “Sen shanga müt pienashi hoba Amalekbü to wapyoashi. Ngiet ngo shongh khua Mühghaüeibü ju ngeibü ika jungan lolabü.”

¹⁰Hibü Mosaei lenbü tegü Joshuaei kümbei hoba Amalekbü to wapyokei, hoba Mosa, Aron hoba Hur shongh khu to angkei.

¹¹Ladang Mosaei haoeibü ik tuokkei, kheijinei Israelbüei thükkei, hoba ladang ong haoeibü ik yanlaje kheijinei Amalekbüei thükkei.

¹²Lausikei ladang Mosa ik noukei, haoenei laang che sungjung louan hao phanga phokei, hoba kho thüka hao setkei; hoba Aron si Hur haosi hamei cheei jinei, cheei jinei dogo jungan haoeibü ik tuokan kitikei; hoba chanyu anepshongko haoeibü ik akukko kikei.

¹³Hibü Joshuaei Amalek hoba haoen mütshuong haoeibü inlouei thükenkei.

¹⁴Kheijinei BUNYUBOUei Mosa to laukei, “Damenlabü shanga ho le chenei doashi, hoba Joshuaeibü nouei ditko nyibou wean chühashi; aieilausi mühnyu phanga mütei ho adamenlabü lele ngei Amalek haman aplabü.”

¹⁵Hobaje Mosaei laangshongei lemshang che yaükei, hoba khoeibü nyen “BUNYUBOU kho ngeibü Nisan” dogo nyenkei.

¹⁶Hobaje haoei laukei, “BUNYUBOUei thebülanbü lea. BUNYUBOUei Amalekbü to meten meten wapyolabü.”