Read Chang Naga LEIYENBÜ 18 Bible Online

LEIYENBÜ 18 - Chang Naga bible

LEIYENBÜ 18

¹Tou Mühghaüei Mosa shanga hoba haoeibü eikshuong shanga kümbü hoba ailai Israelbü Ijep ka leiyenkei, habü pendou shanga Mosaeibü kounyangbü Midianbü ungshedbou Jethroei ditkei.

²Mosaei haoyak Zippora leian sungan phaia, hao kounyangbou Jethroei nyibou sao yoa

³jayangshou müt nyi yoan sungletkei; cheeibü nyen Gershom kikei; aieilausi haoei laukei, “Ngo kükathanga yenla lean kikei.”

⁴Hobaje lubü cheeibü nyen Eliezer nyenkei; aieilausi haoei laukei, “Küboueibü Mühghaüei kü to thuia, hoba Faraoeibü in ka ngo khümenkei.”

⁵Mosaeibü kounyangbou Jethroei Mosaeibü yak hoba saoeibü jayangshou nyi leian Mühghaü shongh nyangko Mosa kishang yamlamang to loukei.

⁶Müt cheei Mosa to laukei, “Chühashi, kaibü kounyangbou Jethro ka jungto kayak hoba saoeibü jayangshou müt nyi leian louada.”

⁷Hobaje Mosaei hao kounyangbou shuokla hauko hao to souhat lenko hao to sembung shepbei. Haoen maisho kibü akibü pheyoko neichem maangto atkei.

⁸Hobaje Mosaei hao kounyangbou la Israelbü shanga BUNYUBOUei Farao to hoba Ijepbü to kümbü pendou, hoba lama haoen to kühshuokbü khonku pendou hoba BUNYUBOUei lai khümenkei khübü shangabü lenkei.

⁹Ijepbü ik ka püetan BUNYUBOUei hao to maibü pendou shangabü Jethroei ditan olinkei.

¹⁰Hobaje Jethroei laukei, “Ijepbü ik ka hoba Farao ik ka no khümenbou BUNYUBOU haübou yingshi; haoei mütshuong Ijepbü ik ka khümenkei.

¹¹Tou ngei ngea, lubü Mühghaü pendou tokei BUNYUBOU yaangbou ki, aishanga Ijepbüei Israelbü amaiko jungeiasikei, haoei haoen thüka haoeibü seiei thükkei.”

¹²Hobaje Mosaeibü kounyangbou Jethroei Mühghaü shanga juokbü lembü hoba haitibü lembü che jungan loukei; hoba Aron si Israelbü leiyeibü jaishou shuong pendou Mühghaü thedanga Mosaeibü kounyangbou yoa saopobü wentek shaula loukei.

¹³Nyibounyet Mosa mütshuongeibü matjemla setkei; hoba mütshuong ngeyang ka chasem sühko Mosa kaijembo loan kikei.

¹⁴Hobaje ladang hao kounyangbouei Mosaei kümbü pendou hapbei, haoei laukei, “Nyi mütshuong shanga ho ai kümda? Aila no boushou setda, hoba müt pendou ngeyang ka chasem sühko lotida?”

¹⁵Hobaje Mosaei haoeibü kounyangbou to laukei, “Aieilausi mütshuongei Mühghaü ka phelalela kü jungto louda.

¹⁶Ladang haoen lemenbü kilaje haoen kü jungto louda, ngei haoen kanglanga laobou tangbou ki kho pankuda hoba ngei haoen la Mühghaüeibü Ngühkhüm hoba haoei sakkubü janenkubü ngetida.”

¹⁷Kheijinei Jethroei laukei, “Nyi kümbü ho tükde aying.

¹⁸Maimaitham nyi ngelabü, no hoba kaibü mütshuongei oan nongan aplabü; aieilausi kümsilei ho ka shanga aeibou atsheibü ki.

¹⁹Tou ngeibü ngüh ditashi, ngei ka la hangsilam wanan lenkho, hoba ka yoa Mühghaü yoan kishi. Mütshuong shanga Mühghaü thedanga no yingshi hoba nyi haoeneibü ngüh Mühghaü jungto sungba.

²⁰Nyi haoen la Mühghaü ngühkhüm hoba janenbü lenashi, hoba haoen ainei paila hoba ai kümla kho nyi haoen la lenjan.

²¹Toukei nyi mütshuong yo ka Mühghaü to hatbü shuong hoba besa anyem amangsühbü, ngühmaanglanbü, kümsilei thükbü shuong, eikshuong yo ka pienashi; hoba hajar thüka, saongao thüka, anjinsem thüka hoba an thüka, khübü tegübü mütshuong songdakla pian phoshi.

²²Hobaje mütshuong thüka jih pendoua haoen la mat jemtishi. Ngüh yaangbü pendou haoenei ka jungto sungbatishi, lausikei ngühsidei hanbü pendou haoen lolo jemlabü. Hoei kaibü on solabü, aishanga haoenei kaibü onat janyolabü.

²³Nyi ho kümsilei kümalonga, hoba Mühghaüei maang angalonga khonei nyi natenko loenlabü hoba mütshuong pendou haoen kishang to haksoa ngailabü.”

²⁴Hibü Mosaei hao kounyangbouei lenbü kho ditkei hoba haoei lenbü pendou kümbei.

²⁵Mosaei Israelbü pendou yoka kümsilei thükbü pienkei, hoba mütshuong thüka kongnyu shuong hajar thüka, saongao thüka, anjinsem thüka hoba an thüka leiyeibü pienkei.

²⁶Jihsiphai pendoua haoenei mütshuongeibü mat jembei. Mat yaangbü haoenei Mosa jungto künkei lausikei ngüh hanbü pendou haoenei lolo jembei.

²⁷Hobaje Mosaei hao kounyangbou hangan hautikei; hoba Jethro haoeibü lam to hao kaodak to haukei.