Read Chang Naga LEIYENBÜ 19 Bible Online

LEIYENBÜ 19 - Chang Naga bible

LEIYENBÜ 19

¹Israel shousi shuongei Ijep kaodak apyoan phaia lit semboua shaangbounyet haoen Sinai yamlamang to loukei.

²Hobaje ladang haoenei Refidim ka meimeian Sinai yamlamang to loukei, haoen yama shaikei; hoba khonei Israelbü shongh thedanga shaikei.

³Hobaje Mosa Mühghaü jungto shongh to angkei, hoba BUNYUBOU shongh ka hao ngakei hoba laukei, “Nyi Jakob thensilen, Israel shousi shuong to lenashi;

⁴‘Ngo BUNYUBOUei Ijepbü to ai kümbei hoba ailai auluei jembü kaaka shoushou tonda, kho maimai ngei kan kü jungto tonbakei kho kanei hapa.

⁵Hibü tou kanei ngeibü ngüh ditko laualonga, hoba ngeibü thesilan jungeikho laualonga phang pendou yo ka kan ngeibü nyaksinam yinglabü. Kaonyu pendou ngeibü yingasikei

⁶kan kü shanga ungshedbü sangle che hoba saopobü phang che kilabü.’ Habü ngüh nyi Israel shousi shuong to lenjan.”

⁷Hibü Mosaei mütshuong ka leiyeibü jaishou shuong ngakei hoba BUNYUBOUei hao la lenbü ngüh pendou lenkhümbei.

⁸Hobaje müt pendouei jongaiko laukei, “BUNYUBOU lenbü pendou kho künei kümlabü.” Hibü Mosaei mütshuongeibü ngüh kho BUNYUBOU la ngetikei.

⁹BUNYUBOUei Mosa to laukei, “Ngei ka to joyojinei mütshuongei ditlabü, hoba haoenei ka to ponpendou mailemlabü lele ngo ka jungto sangmei shangtüngbüa loulabü.” Kheijinei Mosaei mütshuongei jongaibü BUNYUBOU to lenkei.

¹⁰Hobaje BUNYUBOUei Mosa to lenkei, “Mütshuong jungto hauashi, hoba tat si ngieta haoen saüenan phoshi. Haoen neisimei saktiashi,

¹¹hoba sembounyet shanga lamlean kishi; aieilausi sembounyet müt pendou thedanga Sinai shongh to BUNYUBOU louyenlabü.

¹²Mütshuong shanga nyi takletbü kaijembo phojan hoba ho lenashi: ‘Kan shongh khüto üanglabü hoba leilang khün ameitila kan lulu lolo maangsangashi; aoei shongha meitilaje hao tükde haitilabü;

¹³hao to aikei ikei ameitilabü, lausikei hao maimaitham laangei tetetlabü ayingsi laujinei kipettilabü. Meisiau yingsikei müt yingsikei, hao lang akitilabü.’ Ladang teklaang lounyu metlaje kheijinei ong haoen shongh to anglabü.”

¹⁴Hibü Mosa shongh ka louyenan mütshuong saüenkukei, hoba haoenei haoeneibü neisimei sakkei.

¹⁵Hobaje Mosaei mütshuong to laukei, “Sembounyet shanga lamlean kishi, hoba siisiphe tejam.”

¹⁶Sembounyet ngeyang, langmak langpon phaukei, hoba shongha shangtüngbü sangmei shangkei, hoba teklaang langh yaang ditkei. Shaishang kabü mütshuong pendou hatbüei lühkei.

¹⁷Mühghaü to haüyola Mosaei mütshuong shaishang ka leian longkei, hoba haoen shongh youa lokei.

¹⁸Sinai shongh khümbo wankhükei khuilepbei, aieilausi kho thükto BUNYUBOU wana louyenkei. Hobaje wankhük kho wanang kabü wankhük tegü angkei, hoba shongh pendou kho aeibou nyaakeikei.

¹⁹Ladang teklaang langh aei aei kaangbou yeikei, Mosaei joyokei hoba Mühghaüei langmakei jongaikei.

²⁰BUNYUBOU Sinai shongh to shongh khu sühko louyenkei hoba Mosa shongh khu to ngakei. Hibü Mosa angkei,

²¹hoba BUNYUBOUei Mosa to lenkei, “Mütshuongei nuyoko BUNYUBOU to chühjinei leikhüm tuyetan haoen juong shembula, yanashi hoba mütshuong to maangsanglabü lenashi.

²²Ungshedbou shuong mangkei aoyou BUNYUBOU nyangko loulaje BUNYUBOUei ik ashattila haoen lolo saüentishi.”

²³Mosaei BUNYUBOU to laukei, “Mütshuongei Sinai shongh to alongenlabü; aieilausi nyi künla shongh kaijembo leilang jala sakkukei hoba kho saüenla lenkei.”

²⁴BUNYUBOUei jongaiko laukei, “Yanashi, hoba ka yoa Aron leiba. Lausikei BUNYUBOU haoen khulimbo alolabü lele ungshedbou shuong si mütshuong kü jungto leilang danko telongti.”

²⁵Hibü Mosa mütshuong jungto yanan haoen to lenkei.