Read Chang Naga LEIYENBÜ 21 Bible Online

LEIYENBÜ 21 - Chang Naga bible

LEIYENBÜ 21

¹“Habü Ngühkhüm shuong Israelbü shuong thedanga phokujan.

²Nyi Ibribü sambü che jekalonga, po lak haoei khangenlabü. Lausikei po nyetboubüa haoei ai mu akuko litilabü.

³Hao hao mütpem louan kialonga hao mütpem ngaitilabü, lausikei hao loujinei hao yak thonan louan kialonga sao hao yoa haulabü.

⁴Haoeibü BUNYUBOUei hao la yak ngakuan kialonga hoba saoei jayang nouyangshou bukkuan kialonga, yak si saoeibü shousi shuong kho BUNYUBOU shangabü yinglabü; hoba hao mütpem ngaitilabü.

⁵Lausikei sambü khoei shangashatko, ‘Ngei ngeibü shousiyak sanouda,’ ngo solojung asatlabü dogo ngetia longa,

⁶kheijinei haoeibü bunyubouei Mühghaü jungto hao leian anglabü. Khünei hao koukhu ayingsi kouthung lambo leian loulabü; hoba haoeibü bunyubouei injakei haoeibü nou sepbulabü. Kho phaiaje haoei hao salang sünga khangelabü.

⁷“Müt atei haoeibü nouyangshou samla lela yaaksi saoje bousu sambü tegü asatlabü.

⁸Saoei jembü bunyubou, aoei jembü shanga sao phokei, hao aolintilonga kheijinei haoei bou la sao angngaitikujan. Haoei sao küksithang la yaakkula athük; aieilausi haoei sao maang alanko jungeikei.

⁹Haoei haoeibü jayangshou la sao letialonga haoei sao to nouyangshou tegü jungeijan.

¹⁰Haoei lubü yak nyiboula ngayoalonga, saoeibü shausiyung, saoeibü neisimei, hoba sao chem kanbü janbü asenetjan.

¹¹Hobaje habü kümsilei semei haoei sao to athounoulonga saoei mu ai akuko khei ong satkulabü.

¹²“Aoei müt to hailabü lele ngümlaje, hao tükde haitilabü.

¹³Lausikei müt khoei hao khulimbo thamtham thobü ayingko Mühghaüei hao ik mangto kubü yingan kiteialonga kheijineije hao, ngei pienkulabü kaoen to satetjan.

¹⁴Lausikei müt atei khüpbü langbüei thamtham lubü müt che haitia longa hao haitila shanga hao ngeibü lemshang kakei leilangashi.

¹⁵“Aoei jembüeibü bou, ayingsi nyu to ngümlaje tükde hao haitijan.

¹⁶“Aoei müt koklaje hoba hao yaaklaje, ayingsi hao ika hapoulaje hao tükde haitijan.

¹⁷“Aoei jembü nyusibou to khükla uoklaje, hao tükde haitijan.

¹⁸“Müt nyi oyoan cheei che to laangei tetalonga ayingsi ik seman thangalonga hoba hao ühaisikei shena yeplabü lele yeisije;

¹⁹haoei nyibou haoeibü ju jungan paijung hauenalonga, aoei ngümbei hao litilabü, khei eik aptibü shanga ong haoei mu kulabü, hoba hao maisho maitijan.

²⁰Müt cheei jembü sambü ayingsi sambüsao haoeibü ikei ngümettialonga hao tükde shieikoelabü.

²¹Khei yingsikei hao chalou chesinyi lang kialonga hao ashiakoelabü, aishanga aao kho haoeibü nyaksinam ki.

²²“Bousu shuong ngümyojinei mang akongbü yaksa che to ngümouan jembü lilabü kho leiluan apalonga, lausikei sao to amaibü aloushadlonga; yaksanyueibü laoei hao ka hibü tegü tükde hao to namshau kijan, hoba matjembüei janthetkubü tegü haoei kujan.

²³Lausikei kümsilei amaibü at loushedalonga kheijinei langkei jeila langkei,

²⁴nyek jeila nyek, hauh jeila hauh, ik jeila ik, you jeila you,

²⁵juokbü jeila juokbü, mou jeila mou hoba ngümbü jeila ngümbü dogo shemngaijan.

²⁶Müt cheei haoeibü aao ayingsi aaosao la nyek thutialonga haoei leilutibü shanga aao kho ngaitijan.

²⁷Hobaje haoei haoeibü aao ayingsi aaosaoeibü hauh kühan apbualonga haoei kho shanga aao kho ngaitijan.

²⁸“Masu pongsu cheei bousu ayingsi yaksa che thenettialonga, masu pongsu kho laangei tetettijan, hoba khoeibü phe kho ashaujan. Lausikei masu pongsu khoeibü BUNYUBOUje mat mailabü.

²⁹Lausikei masu pongsu khoei shangieda müt to thenko kialonga hoba kho BUNYUBOU to lenan haoei kho athünglonga hoba khoei bousu ayingsi yaksa at thenettialonga, masu pongsu kho tetetlabü hoba bunyubou khokei haitilabü.

³⁰Laiche küman hao ka nam hialonga hao ka ai ong hilaje haoei haoeibü langkei muthüng kujan.

³¹Bousu nashou to thensikei yaksa nashou to thensikei kho ngühkhüm tegü ong kümlabü.

³²Masu pongsu khoei aao ayingsi aaosao to thensi haoei haoeneibü BUNYUBOU la chandinam khujin kujan, hoba masu pongsu laangei tetettilabü.

³³“Hobaje müt atei püngkhün che phekünsi, ayingsi püngkhün che thuan kho ashamtiko masu ayingsi gadu khüto atalonga,

³⁴püngkhün bunyubouei kho shemjan; shatsinam bunyubou la nam kujan hoba shatsinam haibü kho haoeibü yinglabü.

³⁵Hobaje müt ateibü masu pongsuei lubüeibü leilutikualonga; hoba kho haian apalonga kheijinei langkei kibü kho yaakan kho nam kho haoen janan lelabü, hoba haibü khokei pheian lelabü.

³⁶Ayingsi masu pongsu khoei thenda dogo shangieda ngean, bunyubouei kho thüngan aphoko kialonga, haoei masu pongsu shanga masu pongsu kulabü, hoba haibü masu kho hao shangabü yinglabü.”