Read Chang Naga LEIYENBÜ 23 Bible Online

LEIYENBÜ 23 - Chang Naga bible

LEIYENBÜ 23

¹“Nyi amlangbü ngühlang tewenthon; hoba ngühmaang alanbü müt shanga aungüh tüt.

²Amaibü kümla no juongbou phai tesem; ayingsi shuong yaangbou ae matjem sepeitila shanga haujembü kümaleia nyi tetotyo;

³ayingsi shalebü to hao shangabü ngüha the techüh.

⁴“Nyi kaibü dangboueibü masu ayingsi gadu lam maan paiko haüyosi nyi kho hao jungto leibakujan.

⁵Ka to mangsenbü müteibü gadu onei tetlepan leketnyu yepan hapalonga, nyi hao to athuiko tüpyo; nyi hao to thuijan.

⁶“Shalebü ngüh matjema nyi ngühmai khüpeilangei tüpbu.

⁷Amlanga yuktibü ngühsidei ka bangan kishi; hoba shedbü akibü ngühmaanglanbü nyi tühaiti; aishanga ngei müt amaibü mat amaitilabü.

⁸Hobaje nyi besa anyem aikei alejan; aieilausi besa anyemei müt nyek thutida, hoba ngühmaanglanbü ngüh khüpeilangeitida.

⁹“Yenbou teshitekoe; aishanga kan Ijep kaodaka yenla lean kikeibü kanei yenboueibü maangpon ngeakei.

¹⁰“Po lak sühko nyi seka langle jinashi hoba kho ka langle yoshaiashi.

¹¹Lausikei ka mütlia shalebü shuongei shaula shanga nyetbou poje nyi youli ajinko apyoashi; hoba khonei ai joutilaje yama kibü meisiau shuongei shaulabü. Kho tegü nyi kaibü semlühlaak si oliv bamang shangakei kümashi.

¹²“Chalou lak nyi kaibü kümsilei kümashi, lausikei kaibü masu si kaibü gadu haksolabü lele hoba kaibü sambünyueibü jayangshou hoba yenbou haksola shanga nyetbounyet haksolabü.

¹³“Ngo BUNYUBOUei kan to lenbü ajanjan pendou shanga maangsangashi; lubü mühghaü shuong nyen tephong, ayingsi kaibü sembung ka teditti.

¹⁴“Po chenei semnei nyi kü shanga lem lijan.

¹⁵Tokai ajinbü Wentek lem nyinei lijan; ngei ka la sakkubü tegü Abib lita pienbü chalou nyet nyi tokai ajinbü wentek shaujan; aieilausi khonei no Ijep ka longenkei. ‘Kü to lemla ladangkei ikkong aloujan.’

¹⁶“Nyi kaibü kean ongenbü langle shaangbü buhek ai nyi seka jinkei, kho Youlat Lem lijan. “Po thonbüa kaibü langle sek ka longbü yoshaian phobü Küpjembü Lem lijan.

¹⁷Po weko habü lem sema bousu pendou ngo kaneibü Thükenbou BUNYUBOU to lemla loujan.

¹⁸“Kü shanga lemla haitibü sii, tokai jinbü wentek yoa nyi alemjan. Ngeibü lema lemla haitibü haabü ngeyang sühko aphojan.

¹⁹“Kaibü kao ka longbü maiboutham hoba shaangbü buhek shuong kho nyi kaibü Mühghaü BUNYUBOU jungto sungbajan. “Nyi sanlon shoushou ayingsi lonshou nyueibü sendeia athungjan.

²⁰“Chühashi, kaibü lam leila hoba ngei ai kaonyek lamlekuan ki khüto no leian atla shanga ka thedanga hangangbü che hautida.

²¹Maangkuashi hoba hao ngüha leashi. Haokhu telim, aishanga haoei kaibü shedbü üpbulabü; aieilausi ngeibü Nyen hao to ki.

²²Lausikei nyi haoeibü ngüha lealonga, hoba ngei sakkubü pendou kümalonga, kheijinei kaibü dangbou to ngokei dangbou che kilabü, hoba no khulimbü shuong to ngokei khulimbou che kilabü.

²³Aieilausi ngeibü hangangbü ka thedangto haulabü hoba Amorbü, Hitbü, Perizbü, Kananbü, Hivbü, hoba Jebusbü jungto no leian loulabü; hoba ngei haoen shemtilabü.

²⁴Haoeneibü mühghaü to akhüpetjan, ayingsi haoen to alemjan, ayingsi haoeneibü kümhaang shuong tejungei. Nyi haoen saopotham kakan apashi, hoba haoeneibü saopobü laang thaonyu shuong kho netla yeiko jangnyinkuashi.

²⁵Kaneibü Mühghaü BUNYUBOU to lemashi, hoba haoei kaibü shausiyung hoba dei haükulabü, hoba haoei kan yoka shatsinyat ngailangkulabü.

²⁶Khonei kaneibü kaonyeka aoeibü shoukei aleilulabü ayingsi angkong üplabü. Ngei kaibü salang loutikulabü.

²⁷“Ngei no shuoklabü phangshuong pendou jungto molousühtoua hatlamoklabü hautikulabü hoba phenyemtilabü. Ngei kaibü labou shuong pendou sepeijung ngaitilabü.

²⁸Ngei kaibü haang ka Hivbü, Kananbü, hoba Hitbü, shian sattila ka thedangto naoyang hautilabü.

²⁹Lausikei kaonyek litham yeian apan meisiau pühsi amaibüla, ka thedang ka po chenei ongje shian asattilabü.

³⁰No haako yaangko kaonyek kho khümbo ale shongko ka thedang ka haoen shibang ong shian sattilabü.

³¹Hobaje Saklangbü Yungnyu ka Filistiabü Yungnyu sühko hoba yamlamang ka Eufrates Shumang sühko ngei kaibü leilang khümbulabü. Kho kaonyek kabü mütshuong kho ngei kaibü ik to khümbo kuan aplabü, hoba ka thedang ka nyi haoen shian sattilabü.

³²Haoen yoa ayingsi haoeneibü mühghaü shuong yoa nyi thesilan ai teküm.

³³Ngo khulimbo haoenei ka la shabü ashontila shanga kaneibü kaonyeka haoen tekiti; aieilausi nyi haoeneibü mühghaü shuong to lembü kho ka shanga sung che yinglabü.”