Read Chang Naga LEIYENBÜ 24 Bible Online

LEIYENBÜ 24 - Chang Naga bible

LEIYENBÜ 24

¹Kheijinei haoei Mosa to laukei, “No si Aron, Nadab si Abihu hoba Israelbü jaishou shuong anjinlei kü jungto kaiyang; hoba heebü ka kanei lemashi;

²lausikei Mosa, no ong BUNYUBOU jungto loujan, lubü shuongje nyangko aloujan. Mütshuong hao yoa shongh to alongjan.”

³Hobaje Mosa mütshuong jungto louan BUNYUBOUeibü ngüh pendou hoba ngühkhüm pendou lenkei, hoba müt pendouei ngühkung chenei laukei, “BUNYUBOUei lenbü pendou künei kümlabü.”

⁴Hobaje Mosaei BUNYUBOU ngüh pendou dokei. Hao ngeyang enyu pian, shongh youa laangshong lemshon anthüknyi yaükei hoba Israel phang anthüknyi weko laang thaonyu anthüknyi kekei.

⁵Hobaje Israelbü heshou shuong BUNYUBOU to juokbü lembü hoba masu pongsu haitian thangjam lembü kula haoei hautikei.

⁶Hobaje Mosaei sii jamde sungbaan phaua jinkei, hoba jamde kho lemshon to lakkei.

⁷Hobaje haoei Thebülanbü Le kho jungan kaman kibü shuongei ditko wekei; hoba haoenei laukei, “BUNYUBOUei joyobü pendou künei kümlabü hoba ngüha lelabü.”

⁸Hobaje Mosaei sii kho sungbaan mütshuong la lakkuko laukei, “Theyolanyobü sii khüto chühashi, habü ngüh pendou shanga ho BUNYUBOUei kan yoa kümbü ki.”

⁹Kheijinei Mosa si Aron, Nadab si Abihu hoba Israelbü jaishou anjinlei angkei,

¹⁰hoba haoenei Israel Mühghaü hapbei. Haoeibü you phanga müh sakteibü phatko safir namseklaangei laklepan tegü hapbei.

¹¹Lausikei Mühghaüei Israel shousi shuong to ik ashat; haoenei Mühghaü hapbei, hoba haoenei shaukei yungkei.

¹²Hobaje BUNYUBOUei Mosa to laukei, “Kü jungto shongh to longan kishi; hoba nyi haoen to lenla shanga ngei dobü ngühkhüm hoba sakkubü laangdak penyi ngei ka la kulabü.”

¹³Hibü Mosa hoba hao to thuibou Joshua pienkei hoba Mosa Mühghaüeibü shongh to angkei.

¹⁴Hobaje haoei jaishou shuong to laukei, “Küsi nyibou alongei shongko kan hanei haiteiko kishi. Aron si Hur kan yoa kia, aoyouei joyolabü denche kilaje hao haosi jungto hautila thükkei.”

¹⁵Ladang Mosa shongh to angkei, kheijinei shongh kho sangmeiei khuilepbei.

¹⁶Hobaje BUNYUBOU soneikangbü Sinai shongha kikei; hoba chalou laknyet sangmeiei shanglepnyu kikei; hoba nyetbounyet sangmei jenyu ka haoei Mosa ngakei.

¹⁷Israel shousi shuong thedanga, shongha BUNYUBOU soneikangbü kho chühla lonbü wan tegü kikei.

¹⁸Hobaje Mosa sangmei jenyu to atjung shongh to angkei. Hobaje Mosa shongha chalou saonyi hoba langyang saonyi thüngkei.