Read Chang Naga LEIYENBÜ 25 Bible Online

LEIYENBÜ 25 - Chang Naga bible

LEIYENBÜ 25

¹BUNYUBOUei Mosa to laukei,

²“Israel shousi shuong to kü la lembü che sungba dogo lenashi. Mütpem wekoei jembü maangponei maang angenbü tegü kubü lembü sungletashi.

³Hobaje kanei haoen ka sungletlabü lembü kho ho kilabü: hon, chandinam, hoba chinam;

⁴hoba pii, nakthüngle sakbü, saklangbü panyet hoba inyaibü phemba nei hoba lon wi; akasia bu,

⁵sanlon paangeibü khon saklangbüa hambü, hoba loneibü khon hoba

⁶ngesakbü shanga oliv onang; naangla shanga haajangbü onang, hoba ponlemhibü jen,

⁷oniks laang, namsek laang, ungshedbou hele shanga hoba khukua yuklabü shanga.

⁸Ngo haoen yoa kila shanga haoenei lemshang che dangtiashi.

⁹Lemshang neichem hoba khünei peisilei shangabü ngei ailai lenda kho tegü ong nyi dangjan.

¹⁰“Hobaje haoenei akasia buei busen che kümjan, süng iknop penyi tho hoba khaang iknop che tho, hoba suokbü iknop che tho.

¹¹Hobaje nyi kho hon lanbüei naanglepjan, tangae maangae ham nyi naanglepjan, hoba kho thüka honei ko kaiko naangjemashi.

¹²Kho tonla honeibü chikom lei yaüashi, hoba kho jidanga penyi hoba jidanga penyi dogo, you penlei to khangyoshi.

¹³Hobaje nyi akasia buei kaang küman khonei thüka hon jonan jinshi

¹⁴Hobaje saopobü buseneibü napheinei kho pela shanga nyi kaang kümbü kho chikom khüto hangan jinashi.

¹⁵Kaang kho chikoma jinan phojan; kho khüka asunglangjan.

¹⁶Hobaje ngei ka la kulabü ngühkhüm kho busena jinan phojan.

¹⁷“Hobaje nyi lanbü honei onou setshang kümashi, kho süng iknop nyi tho, hoba khaang iknop che tho.

¹⁸Hobaje jiji thon hama maisho jangbü honei kaakyembü kherabim penyi kümashi.

¹⁹Ji thona kaakyembü kherab che hoba ji thona kaakyembü kherab che dogo kümashi; hoba kaakyembü kherabim kho thon thona onou setshang yoa chemala yaüshemashi.

²⁰Kaakyembü kherabim kho haosieibü kaak kuito binan küpjin ngühlepbo hoba haosi the shuokyoko kümshi.

²¹Ngei kulabü ngühkhüm kho busen maang to jinashi hoba kho thüka küp denashi.

²²Hobaje kaakyembü kherabim kanglanga, ngühkhüm busen kabü onou setshang khonei, ngei ka to haüyolabü hoba Israel shousi shuong shanga kü ngühkhüm pendou kulabü.

²³“Hobaje nyi akasia buei khümsok che kümashi; hoba kho süng iknop penyi, khaang iknop che, hoba suokla iknop che tho.

²⁴Hobaje kho hon lanbüei naanglepshi hoba ko kaijembo honei yaülepshi.

²⁵Tokei kho kaijembo thon sembung ikmaang tetche kümshi, hoba kho thon sembung kaiko honei yaülepshi.

²⁶Hobaje kho shanga nyi hon chikom lei kümashi, hoba khoeibü you lei thüka, ko lei khonei chikom khübü kho jinashi.

²⁷Khümsok labü kaang shangabü kho thon sembung nyangko chikom kho kijan.

²⁸Hobaje kaang khübü kho akasia buei kümshi, hoba khübü khoei khümsok kho bela shanga khübünei hon naanglepbushi.

²⁹Hobaje nyi lembüsabüa jungeila phau, thung, khuan jinla meisok hoba yeian phola buphau kümshi; khübü kho hon lanbü kümshi.

³⁰Khümsok kho Thesilan Busen thedanga phojan, hoba khümsok khonei kü to lembü saopobü wentek ponpen kijan.

³¹“Nyi hon lanbüei wanthung denshang che kümashi. Chungthem si kung khokei maisho jangyenan kümjan; kho thung phatbü chipen, tongbü si pungbü kho khüto mang chenei ong yingjan.

³²Ji ji na to pem sembang pheklangko bhek pem lak phekjung litian kümjan.

³³bhek chenei almond chipen pungbü tegü thung sem. Tongbü che hoba chipen che; hoba bhek chenei almond chipen pungbü tegü thung sem. Tongbü che hoba chipen che kho tegü wanthung ka bhek lak pheklangan kilabü.

³⁴Almond chipen pungbü tegü thung lei khünei tongbü shuong hoba chipen shuong kilabü.

³⁵Bhek penyi phanga tongbü che to liko thepan hoba lubü bhek penyi phanga tongbü che to liko thepan wanthung denshang ka bhek lak phekjung satbü kilabü.

³⁶Khübü tongbü shuong hoba bhek shuong hoba wanthung denshang pendou kho hon lanbüei chemala jangbü mang che ong yingjan.

³⁷Wanthung denshang shanga wanthung pemnyet küman khonei phoashi hoba khübüei haoen thea ngesaklabü.

³⁸Khoeibü kip hoba phau shuong kho lanbü honei kümbü yingjan.

³⁹Wanthung denshang hoba khübü peisilei pendou shanga hon lanbü seret khujinto ngao lejan.

⁴⁰Hobaje nyi khübü kho ka la shongha lenbü phatko kümjan.