Read Chang Naga LEIYENBÜ 26 Bible Online

LEIYENBÜ 26 - Chang Naga bible

LEIYENBÜ 26

¹“Tokei nyi lemshang neichem kho thangtet nei an yoan shenbü phemba nei inyaibü hoba mühson, hoba nakthüngan sakbü hoba sii tegü sakbü son kaakyembü kherabim thonan iklühmaibü kümsilei kümboueibü kümsilei tegü dangashi.

²Thangtet nei weko süng iknop saoto set; hoba photak iknop lei yingjan, thangtet nei pendou takbü jetei yingjan.

³Thangtet nei ngao liko shenyoashi hoba lubü thangtet nei ngao khokei liko shenyoashi.

⁴Hobaje nyi thükkabou thangtet nei che thüka neithon thonbü che ka mongan jinkula mühsonei kümashi, hoba kho tegü thangtet nei sapyobü nyiboubü thükkabou thona jinashi, hoba nyiboubü shenyobü thangtet nei chenei nyi yukjin anjinsem jinashi.

⁵Thangtet nei chea nyi yukjin anjinsem kümashi hoba nyiboubü phenyobü thangtet nei thon khünei yukjin anjinsem kümashi khei yingsije cheei che to hatleplabü.

⁶Hobaje honeibü anjin anjinsem jinashi, hoba thangtet nei shuong kho jikhapei chela phenyoashi; khünei lemshang neichem kho chela yeilabü.

⁷“Lemshang thüka neichem shanga nyi lon wiei thangtet nei kümshi, khübü thangtet nei kho nyi anthükche kümshi.

⁸Thangtet nei weko süng iknop khujin hoba khaang iknop lei; thangtet nei weko anthük che kho takbü jetei kijan.

⁹Nyi thangtet ngao lulu hoba lubü thangtet nei lak kho lubüa lulu shenyoashi; hoba neichem thedanga thangtet nei lakboubü kho penyila nopan phoshi.

¹⁰Hobaje thenyobü chenei thonbou thangtet nei thona anjin anjinsem jinashi, hoba nyibou thenyobü thangtet nei shuong khoneikei anjin anjinsem jinashi.

¹¹Hobaje nyi chinamei pheklang anjinsem kümashi hoba neichem kho chela shenyotila shanga pheklang kho chikom khonei jinashi.

¹²Hobaje neichem thangtet nei thükaenei soueiweneiko aeian kibü kho, thangtetbü soueitaiko aeian kibü lemshang neichem thükeibü phai aenei kibü to paplepjan.

¹³Neichem thangtet nei tousüng jijiham iknop che bang joujan hoba khoei lemshang neichem kho küplepjan.

¹⁴“Hobaje nyi neichem küplepla shanga sanlon paangeibü khon, saklangbüa haman hoba kho thüka loneibü khonei yuklepan kümashi.

¹⁵“Lemshang shanga nyi akasia buei tangshaitham huongashi.

¹⁶Waphei che che kho süng iknop an bang hoba khaang iknop che bang yingjan.

¹⁷Waphei wekoa wa sembunga cheei che to sapyola haüyetjan; kho tegü lemshang neichem shangabü wa pendou nyi kho tegü lamleashi.

¹⁸Lemshang neichem shanga wa saoche chaangbou phei ae yeian kümshi;

¹⁹hoba wa saoche phangaenei chandinamei hatleplabü yoan kümshi; wa chenei thon bangkoa haüyetbü che bang lubü to sapyola shanga kümshi.

²⁰Lemshang neichem nyiboubü napheinei chanep pheinei wa saoche;

²¹hoba khübü shanga hanlepbü chandinamei kümbü saonyi, wapheia haüyetbü penyi, hoba toukei wa lubü shanga haüyetbü penyi.

²²Hobaje chanep phei aenei lemshang neichem takphainei nyi wa lak kümashi.

²³Lemshang neichem takphai chemnyek ngühshanga wa nyi kümshi.

²⁴Khübü phangaenei lulu, thükaeneije shaangboubü chikom khüto sapyoan kilabü, kho tegü penyi ham shanga kilabü, khübü khoei chemnyek penyi kho yeilabü.

²⁵Wa yeibü penset kilabü, denshang chandinamei kümbü yoan denshang anthüklak, dangla yeian phobü wa che phanga denshang penyi, hoba lubü huongan kibü penyi phanga.

²⁶“Hobaje nyi akasia buei angkhüm jaashi; lemshang neichem napheinei huongla wa ngao,

²⁷hoba lemshang neichem napheinei wa ngao, phainei kibü shanga wa ngao kümashi, kho lemshang neichem chanep ae shanga.

²⁸Hobaje wa shuong kho jenyua khümjan, kho jithon ka jithon sühko haujan.

²⁹Hobaje nyi wa khüto hon yanlettiashi, hoba honeibü chikom kho leikhümjujan shanga yeitishi, hoba leikhümjujan to nyi hon yanan koutiashi.

³⁰Hobaje ka la shongha lenbü noksa phatko nyi lemshang neichem kho dangashi.

³¹“Hobaje nyi mühson, nakthüngan sakbü hoba sii tegü sakbüei shenbü phemba nei inyaibüei kümbü; ikseibü kümsilei kümbouei kümbü tegü kaakyembü kherabim yoan kho kümashi;

³²hoba nyi kho honei naanglepan akasia bu thaonyu lei thüka antian pholabü; pheklang kho honei hoba chandinamei hanleplabü thüka kijan.

³³Thangtet nei kho anjin pheklanga antian phoashi, hoba thangtet nei maangae to ngühkhüm busen kho jungan kaiya; hoba thangtet nei khoei Saopobü shemjang hoba Saopoboutham shemjang kanglanga janyinkujan.

³⁴Hobaje Saopoboutham shemjanga onoubü setshanga nyi ngühkhüm busen kho phoshi.

³⁵Hobaje khümsok kho nyi thangtet nei nongbüa phoshi, hoba wanthung denshang kho khümsok thedanga lemshang neichem aenei chaangbou naphei aenei phoshi.

³⁶“Aishanga kanei neichem koukhün shanga noksa jinko ikseibouei kümbü kümsilei mühson, nakthüngan sakbü hoba sii tegü sakbü hoba ikeishenbü phemba nei inyaibüei nyi thangtet nei kümashi.

³⁷Nyi thangtet nei shanga akasia buei thaonyu ngao kümashi, hoba khübü khonei hon naangkushi, khübü anjin kho honei kümbü yingjan; hoba khübü shanga chinam hanlepla ngao nyi yotiashi.