Read Chang Naga LEIYENBÜ 27 Bible Online

LEIYENBÜ 27 - Chang Naga bible

LEIYENBÜ 27

¹“Hobaje nyi akasia buei lemshang shon che süng iknop ngao, hoba khaang iknop ngao hoba suokbüa iknop sem lemshon takbü pendou jetei dangashi.

²Hobaje chemnyek lei weko khünei laang che bang küman jinashi, hoba laang kho lemshang mang to jetei yingjan, hoba kho thüka chinamei naanglepshi.

³Tap jinla shanga nyi chak si tapsuokjin, phau, pheyaüjin, kip kümashi, hoba nyi chaksiam pendou kho chinamei kümshi.

⁴Kho shanga chinamei wennyishou wouashi hoba wennyishou thükaenei nyek leia chikom lei kümshi.

⁵Hobaje chinameibü wennyishou khoei lemshang lom sühko anglabü lele shonphang lemshang phang kaijembo nyi kho jinashi.

⁶Lemshang shanga akasia buei kaang kümashi hoba kho thüka chinamei naanglepashi.

⁷Hobaje kaang khühbü kho chikoma jinjan, khei yingsi ong lemshang jinei kaang kho jiji hama kilabü.

⁸Nyi kho wa kuoktian kümjan; ngei ka la shongha lenbü tegü haoenei kho kümjan.

⁹“Hobaje nyi neichem lemshang khongmaang kümashi. Chaang naphei shanga ji phainei khong shanga phemba nei maibüei shenbü iknop saongao, ji phei shanga kho soueiko kilabü;

¹⁰hoba kho thaonyu saoche hoba khübünei yukleplabü chinamei kümbü saoche, hoba thaonyu saoche hoba khübünei yukleplabü chinamei kümbü saoche, hoba thaonyua anjin hoba chühjanla kümbü kho chandinam yingjan.

¹¹Hobaje kho tegü chanep aenei süng iknop saongao soueiko kilabü kijan, hoba kho thaonyu kho saoche hoba khübü küpla kho chinamei kümbü saoche, thaonyua anjin hoba chühjanlabü kho chandinam yingjan.

¹²Hobaje chanep ae khongmaang shanga iknop anjinsem soueitaiko saüan kijan; khübü kho shanga thaonyu an hoba yukleplabü an.

¹³Chaangbou chanyu phamshang ae khongmaang yo kho iknop anjinsem kijan.

¹⁴Koukhün ji aedang iknop anthükngao soueitaiko kijan; khübü shanga thaonyu sem hoba yukleplabü shanga sem.

¹⁵Hobaje che shangabü kho iknop anthükngao soueitaiko kijan, khübü kho shanga thaonyu sem hoba yukleplabü sem.

¹⁶Hobaje koukhün shanga thangtet nei iknop saoche, hoba mühson, nakthüngan sakbü hoba sii tegü sakbü, hoba phemba neiei shenbü inyaibü noksa jinbüei kümbü kümsilei khübü thaonyu lei hoba yukleplabü lei.

¹⁷Khonga thaonyu pendou kaijembo chandinamei khühlepjan, khübü anjin chandinam hoba yukleplabü kho chinam.

¹⁸Khongmaang süng kho iknop saongao hoba khaang kho anjinsem, hoba suokla iknop ngao, shenbü phemba nei inyaibü hoba yukleplabü chandinam.

¹⁹Lemshang neichema peisilei pendou kho jaangla jungeibü pendou kho hoba khongmaang shanga jaangla kümbü pendou kho chinamei yingjan.

²⁰“Nyi Israel shousi shuong to hon shanenbü hoba wanthung jiktian phola koshikbü onang ka jungto jungan loula ngühkhüm kushi.

²¹Kamshang Neichem thangtet nei thükaenei laobou ngühkhüm busen thedanga ki khonei Aron hoba haoeibü shousi shuongei chasem ka ngeyang sühko BUNYUBOU junga kho chühlabü; kho Israel shousi shuong shanga haoen meten sünga ponpen shanga ngühkhüm che kilabü.