Read Chang Naga LEIYENBÜ 28 Bible Online

LEIYENBÜ 28 - Chang Naga bible

LEIYENBÜ 28

¹“Israel shousi shuong yoka kaibü jai Aron hoba hao yoa haoeibü shousi shuong, ungshedbou tegü ngo khangenla shanga ka jungto loutishi, khei Abihu, Eleazar, hoba Ithamar.

²Nyi kaibü jai Aron shanga soneikangko hemaiko soumo shanga saopobü neisimei shikuashi.

³Aronei kü shanga khümbo ungshedbou tegü khangenla shanga pendou to maangli maangsang müt hoba aoyoula sangbüdobü songsido kuan ki, haoenei Aron shanga lemjinei lebü neisimei hele shila nyi lenshi.

⁴Haoenei shikulabü nei kho ho kilabü, khukua yuklabü nei che, hoba ungshedbou saopobü neisimei che, lompanbü mangsho che hoba khun che hoba shembe che, kho tegü ungshedbou kümaleia ngo khangenla shanga haoenei kaibü jai Aron hoba haoeibü shousi shuong shanga saopobü neisimei kümbujan.

⁵Haoenei hon, müh son, nakthüngan sakbü, sii tegü sakbü hoba phemba nei inyaibü lejan.

⁶Hobaje haoenei ungshedbou saopobü hele kho hon, müh son, nakthüngan sakbü, sii tegü sakbü hoba phemba nei woubü maibüei maangsangko kümjan.

⁷Hobaje kho jijiham thona shenyoan phakshoka hangan jinshi hoba kho tegü shenyotishi.

⁸Hobaje kho thüka wa nei kümbü kho phatko kümbü to jetei yeilabü, hon, müh son, nakthüngan sakbü sii tegü sakbü hoba phemba nei maibü shenbü.

⁹Oniks laang penyi sungjung louan kho thüka Israelbü shousi shuong nyen laanga doashi;

¹⁰Haoen pakbü tegü thenei thenko laang chenei lak hoba joubü lak kho lubü chenei thüngan doashi.

¹¹Laang thüngbü mütei laang thüngan nyen dobü tegü, nyi Israelbü shousi shuong nyen laang penyi khonei thüngan dojan hoba kho hon laang shona tonenan phojan.

¹²Israelbü shousi shuong shanga damenlabü laang kila shanga phaka peian nei hanbü penyi thüka nyi kho phojan; hoba damenlabü shanga BUNYUBOU thedanga haoeneibü nyen kho Aronei haoeibü phak nyi hama jinjan.

¹³Hobaje nyi honei kümjan;

¹⁴hon lansanei namlüh penyi janglüh phatko küman nyi kho sapyoan kümjan; hoba sapyobü namlüh kho hon küpjina phojan.

¹⁵“Hobaje nyi sangkodoko matjem khükhom Thükkabou ungshedbou saopobü neisimei hele lamlebü tegü nyi kümjan, hon, müh son, nakthüngan sakbü, sii tegü sakbü hoba shenbü phemba nei maibüei kho kümjan.

¹⁶Kho nyek lei pendou jeteitei hoba nei kho nopyoan kijan, süng ikküm che hoba khaangkei ikküm che.

¹⁷Hobaje khonei nyi namsek laang denjan, namsek laang lin lei; shaangbü lina sarsius, topaz, hoba karbankel laang shuong;

¹⁸hoba nyiboubü lina emerald laang che, safair laang che hoba daimond laang che,

¹⁹hoba saopobü lin kho jacint laang che, agate laang che, hoba amethia laang che,

²⁰leiboubü lin kho beryl laang che, oniks laang che, hoba jasper laang che, khübü den kho honei kailepjan.

²¹Laang kho Israel shousi shuong anthüknyi nyen tegü kilabü; thüngan dobü nyen jangbü tegü, müt weko jembü nyen tegütham phang anthüknyi shanga habü ho kilabü.

²²Hobaje khukua yukbü thük khonei nyi yangmen tegü hon lansanei shenyoan namlüh kümjan.

²³Khukua yukjin khünei nyi honeibü chikom penyi jinjan thonbü ji jiham khonei chikom penyi kho jinjan.

²⁴Hobaje honei sapyobü namlüh penyi kho khukua yukjin kho thon aenei chikom penyi khonei nyi mongan jinkushi.

²⁵Hobaje sapyobü namlüh thon ham kho küpjin penyi thonbü aenei jinjan hoba kho phaka beibü ungshedbou saopobü hele nei thedanga phenashi.

²⁶Nyi honeibü chikom penyi kümashi, hoba nyi kho khukua yukjin thonbü penyia phenashi, ungshedbou saopobü neisimei maangaenei ho phenyoan kishi.

²⁷Hobaje nyi hon chikom penyi kümashi; kho thedanga sapyoshang, khei sangkodoko takbü shembe kaibü nei thükaenei phenashi.

²⁸Hobaje khukua yukjin kho sangkodoko takbü ungshedbou neisimei, shembe kaibü neisimei thüka khukua yukbü kho asoueitila shanga mühsonei shenbü neiei chikomei ungshedbou saopobü neisimeia kibü chikom khünei khübü khoei phenjan.

²⁹“Ladang ong Aron saopobü kaoen to atlaje damenlabü shanga Israelbü shousi shuongeibü nyen haoeneibü maangpon thüka matjembü khükhom kho haoei khühlabü.

³⁰Nyi matjembü khükhom thüka Urim si Thummim jijan, hoba BUNYUBOU jungto atjinei Aroneibü khukua khübü kho kijan, hoba Aronei athakko Israelbü shousi shuong matjembü haoeibü maangpona BUNYUBOU jungto künjan.

³¹“Hobaje ungshedboueibü saopobü neisimei pendou kho pi kilabü.

³²Hobaje khünei khu attishang shanga jenyua khün yettian; hoba tokei kho phenjung asatla shanga ko shopjan.

³³Mangyuk pendou kaijembo chilang chipen son nakthüngko sakbü si sii tegü sakbü jinjan hoba khübü kanglanga kaijembo honeibü nüngnüng jinashi,

³⁴hon nüngnüng che chilang chipen che, dogo mangyuk kaijembo jinashi.

³⁵Aron lemla atjinei haoei kho yukjan; hoba hao ühaila shanga hao BUNYUBOU jungto atjinei hoba longeijinei kho langhlangbü ditlabü.

³⁶“Nyi hon hinseibüei laangdak chenei lamlean nyen dobüa thüngan jinbü tegü, ‘BUNYUBOU shanga SAOPOBÜ’ dogo khonei doashi.

³⁷Hobaje nyi kho piei woubü to phenyoashi, hoba kho khuna jaanglabü hoba kho thedang aenei jinlabü.

³⁸Hobaje kho Aroneibü khüngjaa kilabü, hoba Israel shousi shuongei saopobü jongsak khümbo kubü pendoua saopobü peisilei shuong shanga haoenei shonshaibü shedbü pendou Aronei künjan, hoba haoen BUNYUBOU thedanga sungletenlabü shanga kho ponpen haoeibü khüngjaa kijan.

³⁹“Nyi son lulueibü panpanlanlan takbü phemba nei inyaibüei mangyuk kümjan, hoba nyi phembaei mangyuk takjan hoba nyi phemba nei inyaibüei khuphai che hoba noksa jinan wa che kümjan.

⁴⁰“Aroneibü shousi shuong shanga haoen soneikangbü hoba he maipangteiko mangyuk, khude, hoba khun nyi kümashi.

⁴¹Hobaje khübü kho nyi kaibü jai Aron hoba hao yoa shousi shuong la yukkuashi, hoba haoenei ungshedboueibü kümsilei khangenlabü, haoen la onang naangkuko, khümbo kuko, haoen saüenan phokushi.

⁴²Haoen mütkong kibü küplepla nyi haoen la neisimei shenjang ka youshi sühko shikujan.

⁴³Hobaje ladang neichem lemshang to atlaje ayingsi ladang haoen saopobü kaoen nyangko lemla loulaje khübü kho Aron si haoeibü shousi shuong to kilabü, khonei haoen to shed ashonlabü hoba ühailabü; kho ponpen shanga hao hoba hao ka pakbü shuong shanga ngühkhüm kilabü.