Read Chang Naga LEIYENBÜ 29 Bible Online

LEIYENBÜ 29 - Chang Naga bible

LEIYENBÜ 29

¹“Tou nyi kümlabü ho, Aron hoba hao shousi shuong saüenan ungshed kümsileia ngo khangenla shanga nyi haoen to ho hai kümshi. Nali athebü masu pongsu shoushou che hoba sanlon paang penyi,

²hoba tokai ajinbü wentek, hoba oliv onang kheiyobü wentek hoba onang kheibü wentek sungba. Nyi khübü kho whet wen maibouthamei kümjan.

³Nyi khübü kho kam chenei jinshi hoba masu pongsu si sanlon paang penyi yo khünei sungba.

⁴“Hobaje nyi Aron hoba hao shousi shuong Kamshang Neichem koukhün khüto leijung louan nyi haoen la mang yutiashi.

⁵Nyi neisimei kho sungjung louan mangyuk si ungshedbou saopobü helea kaakbü neisimei hoba ungshedbou saopobü neisimei kho hoba khukua yukbü kho nyi Aron la lekuashi hoba shanan takbü ungshedbü saopobü neisimeia khude khoei shenashi;

⁶hoba nyi khude haoeibü khua hankushi, hoba saopobü khun kho khude thüka hankushi.

⁷Nyi naangkulabü onang sungjung louan haoeibü khua jonan jinkushi, hoba hao la naangkushi.

⁸“Hobaje nyi haoeibü shousi shuong leijung louan haoen la mangyuk yukkuashi.

⁹Aron hoba haoeibü shousi shuong la khudeei nyi kaikushi, hoba haoenei khun hankushi; hoba ponpen shanga ngühkhümei haoenei ungshed kümsilei kümlabü; hoba nyi Aron si haoeibü shousi shuong khümbo kutiashi.

¹⁰“Kamshang Neichem thedangto nyi masu pongsu kho sungbajan; hoba Aron si haoeibü shousi shuongei khoeibü khua ikei shangetjan.

¹¹Hobaje Neichem lemshang kouthea BUNYUBOU thedanga nyi masu pongsu kho haitijan.

¹²Masu pongsueibü sii khüka sungan lemshanga ngoulaang thung kümbü khonei kaibü ikjishouei naangashi hoba joubü kho lemshang youjunga jonshi.

¹³Hobaje maangpin haabü pendou, hoba senmang yukbü hoba kelang penyi hoba kho thüka kibü haabü sungan nyi lemshanga jikashi.

¹⁴Lausikei masu pongsu phe, haoeibü khon, khoeibü phet nyi shaishang napheinei wana jikan apashi, kho shabü lembü ki.

¹⁵“Nyi tokei sanlon paang khokei sungan Aron si haoeibü shousi shuongei khoeibü khua ikei shangetlabü.

¹⁶Hobaje nyi sanlon paang kho wapettiashi, hoba nyi khoeibü sii kho sungan lemshang kaijembo lakashi.

¹⁷Hobaje nyi sanlon paang kho netla yeiko jemnyinjan, khoeibü sensimaang hoba youshuong kho sakan apashi, jemnyinan kibü kho khu thüka phoashi.

¹⁸Sanlon paang khümbo kho nyi lemshang thüka juokashi, kho BUNYUBOU to juokbü lembü ki; ho ponlem maibü BUNYUBOU to lembü ki.

¹⁹“Hobaje tokei nyi lubü sanlon paang sungbajan, hoba Aron si haoeibü shousi shuongei haoeneibü ikei sanlon paangeibü khua shangetjan.

²⁰Kheijinei nyi sanlon paang kho wapettijan hoba haoeibü sii sungan Aroneibü mae nou hotena hoba haoeibü shousi shuong mae nou hotena hoba haoeibü mae ikpema hoba haoeibü mae youbema naangkuashi, hoba kho phaia lemshang kaijembo lakashi.

²¹Hobaje lemshanga kibü sii hoba naanglabü onang nyi sungjung louan kho Aron hoba haoeibü neisimei hoba hao yoa shousi hoba haoeneibü neisimeia lakkuashi, kho phaia saüenkushi.

²²“Toukei nyi sanlon paangeibü haabü, meia haabü, hoba maanga yukan kibü haabü hoba sena yukbü haabü hoba kelang penyi hoba kho thüka kibü haabü hoba mae youshi sungashi, aieilausi ho khümbo kubü sanlon paang ki.

²³Hobaje wentek yangbü che, hoba onang jinbü wentek on che, hoba tokai ajinbü wentek peklebü che, BUNYUBOU thedanga kibü kam ka sungashi;

²⁴Hobaje pendou kho nyi Aroneibü ika hoba haoeibü shousi shuongeibü ika phokushi; hoba BUNYUBOU junga soueiashi dogo lenshi.

²⁵Hobaje nyi haoeneibü ik ka khübü kho sungashi hoba BUNYUBOU thedanga ponlem maibü shanga lemshanga juokbü lembü thüka nyi khübü kho juokashi; kho BUNYUBOU to wanei lembü ki.

²⁶“Kheijinei Aron naangenbü shangabü khümbo kubü sanlon paangeibü khük kho nyi sungjan hoba kho soueibü lembü tegü BUNYUBOU thedanga soueiashi; hoba kho kaibü phejan yinglabü.

²⁷“Aron si haoeibü shousi shuong shanga shanenbü sanlon paang hoba lembü yoshaibü youshi, nyi janenan phojan.

²⁸Kho Israelbü shousi shuong ka Aron hoba haoeibü shousi shuong ponpen shanga haoeneibü phejan kilabü, aieilausi kho maangmai kubü lembü ki; Israelbü shousi shuong ka haoeneibü sangmai lembü ki.

²⁹“Hobaje Aroneibü saopobü neisimei kho hao phainei haoeibü shousi shuong shanga kilabü, kho homan haoenkei khübü thüka saüenko naangenla shanga.

³⁰Ladang hao jeibü shou neichem lemshang to loulaje haoei kho chalou nyetnyet yukjan.

³¹“Hobaje nyi khümbo kubü sanlon paang sungjung louan saoposhanga ho phe thungjan.

³²Hobaje neichem koukhüna Aron si haoeibü shousi shuongei sanlon shoushou phe hoba kama kibü wentek kho shaujan.

³³Haoen khümbo kula hoba saüenla shanga laobouei silip jakei, khübü peisilei kho haoenei shaula thükkei, lausikei kho pendoueije ashaujan; aieilausi khübü kho saopobü ki.

³⁴Khümbo kubü phe kho ayingsi wentek at ngeyang sühko jouan kialonga kheijinei nyi kho wana jikan apashi.

³⁵“Kho tegü Aron si haoeibü shousi shuong to ngei ka la sakkubü pendou kümashi, chalou nyet nyet lepde nyi haoen khümbo kutiashi.

³⁶Shabü apla shanga chalou weko masu pongsuei lemashi, hoba kho shanga nyi shabü apla küman phaia nyi lemshang kho saüenjan, kho saopotham yeitila shanga nyi onang naangashi.

³⁷Chalou nyetnyet nyi lemshang shanga noukosouko saüenlabü hoba lemshang kho saopotham kilabü, hoba aiei ong lemshanga meitilaje saopoko kilabü.

³⁸“Lemshanga nyi ho lemjan; chalou angboua athakko sanlon po cheeibü nyibang.

³⁹Nyi sanlon shoushou che ngeyang lemjan;

⁴⁰shaangboubü sanlon kho wennet inyaibü efa chenei anboubü phejan, koshikbü onang hin chenei leiboubü phejan, hoba yunglabü lemla shanga ih hin chenei phejan leiboubüei nyi lemjan.

⁴¹Hobaje sanlon che kho chasem lemjan, hoba ngeyang shausiyung lembü tegü hoba yunglabü lembü tegü kho ponlem maibü shanga wanei BUNYUBOU to lembü ki.

⁴²Kho kaneibü meten shanga BUNYUBOU junga lemshang neichem koukhün nyangko athakko juokbü lembü kilabü, khünei ngei ka to joyola shanga ka to haüyolabü.

⁴³Hobaje khünei ngei Israel shousi shuong to haüyolabü; hoba neichem kho soneikangbüei saüenlabü.

⁴⁴Hobaje ngei Kamshang Neichem hoba lemshon saüenlabü; tokei Aron si haoeibü shousi shuong müilingbü kümsileiei ngo khangenla shanga ngei saüenlabü.

⁴⁵Hobaje ngo Israel shousi shuong yoa kilabü, hoba ngo haoeneibü Mühghaü yinglabü.

⁴⁶Hobaje ngo haoen yoa kila shanga haoen Ijep kaodak ka leiyenbü BUNYUBOU haoeneibü Mühghaü dogo ngelabü.