Read Chang Naga LEIYENBÜ 3 Bible Online

LEIYENBÜ 3 - Chang Naga bible

LEIYENBÜ 3

¹Tou Mosa Midianbü ungshedbou hao kounyangbou Jethroeibü san lombo kikei; hoba haoei sanshuong kho yamnak naphei to leijung hauan Mühghaü Shongh Horeb to loukei.

²Khünei buham jenyua wanlonga Mühghaü khuthük hangangbü kho hao jung to longkei. Hobaje Mosaei chühsi buhama wan longan kikei lausikei alon.

³Hobaje Mosaei laukei, “Buham kho ailaibü alondaje ngo nyangko haulabü hoba shalatalabü kaoen to chühlabü.”

⁴Ladang hao kho chühla haubü BUNYUBOUei hapbei, Mühghaüei buham jenyu ka hao to ngako laukei, “Mosa! Mosa!” Hobaje haoei jongaikei, “Ngo hanei kia.”

⁵Mühghaüei laukei, “Hato nyangko telou. Kaibü you ka nguok hangletashi, aieilausi no lanei loan ki kho saopobü kao ki.”

⁶Tokei haoei laukei, “Ngo kaibü pisishuongeibü Mühghaü, Isak Mühghaü, hoba Jakob Mühghaü ki.” Kheijinei Mosaei the hukei; aieilausi haoei Mühghaü to chühla hatkei.

⁷Hobaje BUNYUBOUei laukei, “Ngei maimaitham ngeibü eikshuong Ijep kaodaka aaolalebü hapa. Hobaje lombü shuongei haoen khonsaktibü si haoenei ngekbü ngei dida; aieilausi ngei haoen maangshat ngeakei.

⁸Hibü ngei haoen Ijep kaodak ka khümenlabü hoba kho kaodak ka leiyenan kaonyek maibü ongabü kaoen che khei, sendei si naodei koubü kaodak khüto leian haula ngo louyenkei. Hobaje Kananbü, Hitbü, Amorbü, Perizbü, Hivbü hoba Jebuzbü, kaodak to leian haulabü.

⁹Hobaje tou Israel shousi shuongei ngekbü kü junga lousüha, hoba Ijepbüei lai shieikoeko khonsaktida khokei ngei hapa.

¹⁰Hibü ngei kü mütli Israel shousi shuong Ijep kaodak ka leiyenla ngei no Farao jungto hautida, tou kaiya.”

¹¹Lausikei Mosaei Mühghaü to laukei, “Farao jungto hauan Ijep ka Israel shousi shuong leiyenlabü lele ngo ao?”

¹²Hobaje Mühghaüei jongaikei, “Maimaitham ngo ka yoa kilabü. Hobaje ngei no hautikei dogo ngela shanga ka shanga tetsida ho kilabü: ladang nyi eikshuong Ijep kao ka leian loulaje kanei ho kaoena Mühghaü lemlabü.”

¹³Mosaei Mühghaü to laukei, “Ladang ngo Israel shousi shuong jungto hauan, ‘Kaneibü pisibou Mühghaüei kan jungto ngo hautikei’ dogo lenlaje haoenei kü to phelabü, ‘Hao nyen ao?’ Kheijinei ngei haoen to ai lenla?”

¹⁴Mühghaüei Mosa to laukei, “NGO KHO NGO KI . Hobaje nyi Israel shousi shuong to lenshi, ‘Aoei NGO KI dogo lauda, haoei ngo kan jungto hautikei.’”

¹⁵Mühghaüei toukei Mosa to lenkei, “Nyi ho Israel shousi shuong to lenashi, ‘BUNYUBOU, kaneibü pisibou Mühghaü, Abraham Mühghaü, Isak Mühghaü, hoba Jakob Mühghaüei ngo kan jungto hautikei. Ho ponpen shanga kü nyen, hoba kho tegü meten pendoua ngo damenlabü ki.’

¹⁶Hauashi, hoba Israel jaishou shuong liko yoshaitian haoen to lenshi, ‘BUNYUBOU kaneibü Mühghaü, Abraham Mühghaü, Isak Mühghaü hoba Jakob Mühghaü kü jungto longan lenkei. Maimaitham ngei kan pean chüha, hoba Ijepa kan to ai kümbei kho ngei hapa.

¹⁷Hobaje ngei kan Ijepa khonkubü ka Kananbü, Hitbü Amorbü, Perizbü, Hivbü, Jebusbü kaonyek hoba sendei si naodei koubü kaonyek to leian loula jantheda.’

¹⁸“Israel jaishou shuongei ka ngüha lelabü. Hobaje no hoba ka yoa Israel jaishou shuong Ijep choba jungto loulabü hoba kanei hao to laulabü, ‘BUNYUBOU, Ibribü Mühghaü, kün to shuokyoa. Künei küneibü BUNYUBOU Mühghaü to lemla yama chalou semnyet lam hautila sakkushi dogo künei ka to sudajada.’

¹⁹Lausikei ngei ngeakei, hau kibü ik cheei akümlonga Ijep chobaei kan ohautilabü.

²⁰Hobaje ngei ngeibü ik shingan Ijep kaodaka seikümseilei pendou kümbo ngei haoen to ngümlabü. Kho phaia haoei kan litilabü.

²¹“Hobaje ho mütli la Ijepbü thedanga ngei maangshik haptilabü, hoba ladang kan haulaje kan ik kong asatlabü.

²²Lausikei chandinam si honeibü peisilei shuong hoba yaksa mütpem wekoei neisimei saoeibü chempen hoba sao chema homan kibü ka hilabü, hoba khübü kho kaneibü jayangshou hoba nouyangshou la yakkulabü. Hobaje kanei Ijepbüeibü nyaksinam maklanglabü.”