Read Chang Naga LEIYENBÜ 30 Bible Online

LEIYENBÜ 30 - Chang Naga bible

LEIYENBÜ 30

¹“Jen juoklabü shanga nyi akasia buei lemshang shon che kümashi.

²Kho süng si khaang jeteitei, süng iknop che, khaang iknop che, hoba suokla iknop penyi, khonei laang kho jetei kilabü.

³Hobaje thükaenei hoba napheinei kaijembo hoba khonei laang kho hon lanbüei naanglepashi; hoba kho kaiko honei kailepan kümashi.

⁴Hobaje jijiham naphei thüka honei naanglepan kibü phang khonei honeibü chikom nyibang kümashi, hoba khübü künla shanga khün yettilabü.

⁵Hobaje nyi kaang kho akasia buei kümlabü hoba khonei honei naanglepshi.

⁶Ngühkhüm busen thüka onoubü setshang thedanga lanei ngo ka to haüyola, khonei ngühkhüm busen nyangko kibü thangtet nei thedanga nyi kho phoashi.

⁷Hobaje Aronei kho thüka ponlemhibü jen juoklabü; ngeyang weko haoei hantin lamlejinei kho jiklabü.

⁸Ladang Aronei chasem wan saplaje haoei jen kho BUNYUBOU junga kaneibü meten sünga jikjan.

⁹Kho thüka nyi saopobü jen ayingsi juokbü lembü ayingsi shausiyung lembü asungletjan; hoba kanei kho thüka yunglabü lembü aikei ajonkujan.

¹⁰Shabü hangletla shanga shabü lembü kubü ka siiei laang to naangkuko poa che Aroneibü shabü hangletla kümbü yoa kaneibü meten sünga poa shabü hangletla kümashi. BUNYUBOU junga ho saopotham ki.”

¹¹Hobaje BUNYUBOUei Mosa to laukei,

¹²“Ladang nyi Israel shousi shuong lühbak wean chühlaje nyi kheijinei haoen yoa khonsak khonku akila shanga, haoen mütpem wekoei BUNYUBOU to lulueibü soushou shanga angnam kujan,

¹³lühbaka yoan kibü haoen müt wekoei, kho lemshang kabü shekel thoche kujan, BUNYUBOU la shekel thoche lembü kuashi.

¹⁴Aoyou lühbaka yoan ki, po saoche ka thükae kabü mütshuongei BUNYUBOU la lembü kho kujan.

¹⁵Kaneibü shabü hangletla shanga BUNYUBOU la ladang haoenei lembü kulaje, shekel thoche to limbo keibouei akujan, hoba shaleboueikei shian akujan.

¹⁶Nyi shabü debü nam kho Israel shousi shuong ka lejan, hoba kho Kamshang Neichem kümsilei shanga thanan phoshi, kho kaneibü shabü dela shanga BUNYUBOU thedanga Israel shousi shuong shanga damenlabü kilabü.”

¹⁷Kheijinei BUNYUBOUei Mosa to laukei,

¹⁸“Nyi chinamei phauyaang kümashi hoba sakla shanga denshang kho chinamei kümashi; hoba nyi kho Kamshang Neichem si lemshang kanglanga phoashi.

¹⁹Aron si hao shousi shuongei you si ik maklabü.

²⁰Haoen ladang kamshang neichem khüto atlaje, ayingsi ladang haoenei khangenla shanga lemshang nyangko louan wanei BUNYUBOU to juokbü lembü kulaje, haoen ühaila shanga haoenei deiei sakjan.

²¹Kho tegü haoen ühaila shanga you si ik deiei sakjan, hoba kho haoen shanga hoba hao, hoba haoeibü lilabü shanga haoen meten meten ponpen shanga ngühkhüm che kilabü.”

²²BUNYUBOUei Mosa to laukei,

²³“Ponlem hilabü jen dei shekel saongao ngao, ponlem hibü phoulo shekel saoanto anjinsem, ponlem hibü teibü shekel saoanto anjinsem,

²⁴hoba kashia saongao ngao saoposhang ka takbü kibü tegü oliv hin che, nyi sungba;

²⁵nyi ponlem hibü kümbouei kümbü ponlem tegü saopobü naanglabü onang kilabü.

²⁶Hobaje khoei Kamshang Neichem hoba ngühkhüm busen,

²⁷hoba khümsok hoba thung si phau pendou, hoba wanthung hoba kho shanga peisilei hoba jenjuok lemshang,

²⁸hoba juokbü lembü hoba thungsiphau pendou hoba phauyaang denshang nyi khoei naangashi.

²⁹Hobaje kho pendou to saopobou yeila shanga nyi khübü kho saüenan phoshi; khübü khoto aiei ong meitilaje saopobü kilabü.

³⁰Aron hoba hao shousi shuongei müilingbü kümsileiei ngo khangenla shanga nyi haoen naangenko saüenan phokushi.

³¹Hobaje nyi Israel shousi shuong to joyoko lenshi. Ho kü junga kan meten meten saopobü naangbü onang kilabü.

³²Mütmang to ho hakan ajinkulabü ayingsi ho onang phatko lubü ai akümjan. Ho saüenbü, hoba kanei ho saopobü dogo weeijan.

³³Aoyouei ong hoto phatko kheiyolaje ayingsi aoei ong ho küksithangbü la jinkulaje hao jembü mütli ka wapan aplabü.”

³⁴BUNYUBOUei Mosa to laukei, “Nyi ponlem teibü stakte hoba oniks, hoba galbanum sungba; jen lanbü ponlem hibü hoba khübü weko takbü jetei kilabü;

³⁵hoba kho ponlem hibü kümbouei kümbü tegü jem jinan hinseibü hoba saopobü nyi hoei kümashi;

³⁶hoba kho atje netla yeiko ngünan kamshang neichema ngühkhüm busen thedanga phokushi, khünei ngo ka to haüyolabü; kho ka shanga saopotham kilabü.

³⁷Hobaje ponlem laobou nyi kümlaje, kheiyobü tegütham nyi jembü shanga akümjan; kho BUNYUBOU shanga ka thedanga saopobü kilabü.

³⁸Aoyouei ong kho phatko ponlem hibü kümlaje, hao jembü mütli ka wapan aplabü.”