Read Chang Naga LEIYENBÜ 31 Bible Online

LEIYENBÜ 31 - Chang Naga bible

LEIYENBÜ 31

¹Kheijinei BUNYUBOUei Mosa to laukei,

²“Chühashi, ngei Urieibü jayangshou Hureibü shi, nyenei Bezalel Jihuda mütli ka piena.

³Songadoa, ditenbüa, ditletbü songadoa, hoba kümbüleibü phang pendoua

⁴hon, chindinam, hoba chinamei maangli maangsang kümsilei kümla,

⁵hanan jinla namsek laang wapnyinla hoba bu jakbü kümsilei liplipa kümbü pendoua Mühghaü soushouei ngei hao shentia.

⁶Hobaje chühashi, ngei hao yoa Ahisamakeibü shou Dan mütli ka Oholiab piena; hoba songsihon kibü maangpon pendoua haoenei ngei ka la sakkubü pendou kümla shanga ngei haosi la songsido jinkua.

⁷Kamshang Neichem ngühkhüm busen, hoba kho thüka kibü onoubü setshang hoba neichema peisilei pendou,

⁸hoba khümsok si thungsiphau hoba hon lanbü wanthung denshang hoba kho shanga peisilei pendou hoba jen juokbü lemshang,

⁹hoba juokbü lemshang chaksiam hoba thung pendou hoba phauyaang hoba jinlabü denshang,

¹⁰hoba hemaiko kümbü neisimei shuong hoba Aron ungshed kümsilei shangabü saopobü hele, hoba ungshed kümsileia khangenla shanga haoeibü shousi shuong neisimei,

¹¹hoba naangkulabü onang hoba saopobü kaoen shanga jen ponlem maibü ngei ka la sakkubü tegütham haosiei pendou kümjan.”

¹²Kheijinei BUNYUBOUei Mosa to laukei,

¹³“Nyi Israel shousi shuong to hai joyoko lenashi: Maimaitham kanei ngeibü nou noujan, aieilausi kan saüenan phokubou BUNYUBOU ngo yingkei dogo kanei ngela shanga meten meten ngo hoba kan kanglanga ho tetsida che ki.

¹⁴Hibü kanei Nounyet noujan, aieilausi kan shanga ho saopobü ki; müt wekoei aoei ho shatilaje haoje haitilabü; aishanga aoyouei Nounyet kümsilei denche ongkei kümlaje, kho müt jembü mütli ka wapan aplabü.

¹⁵Chalou laknyet kouko ungko kümaleiashi, lausikei nyetbounyet saopotham noulabü chalou, BUNYUBOU to saopobü ki; aoyouei Nounyet kümsilei denche ongkei kümlaje haoje haitilabü.

¹⁶Khoei Israel shousi shuongei athakko haoenei meten meten nou jungeila nou noujan.

¹⁷Hoei ngo hoba Israel shousi shuong kanglanga ponpen shanga tetsida che ki; aieilausi chalou laknyeta BUNYUBOUei müh si kao kümbei, hoba nyetbounyet hao haksoko noukei.”

¹⁸Hobaje Sinai shongha hao to ngüh joyokhüman phaia haoei Mosa la Mühghaüeibü ikjishouei dobü ngühkhüm laangdak penyi kukei.