Read Chang Naga LEIYENBÜ 32 Bible Online

LEIYENBÜ 32 - Chang Naga bible

LEIYENBÜ 32

¹Ladang Mosa shongh ka louyenla phaikei, mütshuong haoen lolo liko Aron jungto yoshaian hao to laukei, “Kün thedanga haula kün la mühghaü kümbushi, aieilausi Mosa aoei kün Ijep kaodak ka leiyenan leijung loukei, hao ai yeikei, künei angekei.”

²Hobaje Aronei haoen to laukei, “Kaneibü yaksi shuong, kaneibü jayang nouyang shousi shuongeibü nou ka honeibü chipen sungenashi hoba kü jungto sungba.”

³Hobaje müt pendouei lulueibü noua kibü chinam si chinong sungenan Aron jungto sungbakei.

⁴Hobaje haoei haoeneibü ik ka sungletan khübü peisilei tühnyintian masu paangshou che yaükei. Hobaje mütshuongei laukei, “O Israel, ho seneibü mühghaü yingshi, aoei sen Ijep ka leian loukei.”

⁵Hobaje Aronei kho hapjinei haoei kho thedanga lemshon che dangkei, hoba Aronei ngekko laukei, “Ngiet BUNYUBOU la lem che likulabü.”

⁶Hibü haoenei ngeyang enyu pian juokbü lembü kukei, hoba sangmai lembü jungan loukei; hoba mütshuong shaula yungla setkei, haoen louyojayo pejapela la khangkei.

⁷BUNYUBOUei Mosa to laukei, “Yanashi, aieilausi kaibü mütshuong aoyou nyi Ijep ka leiyenan loukei haoen lolo amaiko yeia.

⁸Ngei haoen la sakkubü lam ka tongde sepeijung sada; haoenei masu paangshou che phatko heangsho che haoen shanga yaüan kho lema hoba khola lembüsabü kua, hoba haoenei laukei, ‘O Israel, habü ho kaibü mühghaü ki, haoei no Ijep ka leiyenan leijung loukei!’”

⁹BUNYUBOUei Mosa to laukei, “Ngei habü mütshuong hapa, hoba chühashi, habü maangpon kaangbü shuong ki;

¹⁰hibü haoen khulimbo ngeibü maangshat yaang longan haoen shemtilabü; hibü tou kü mütpem apyoashi; hoba ngei no phang yaangbü che yeitilabü.”

¹¹Mosaei BUNYUBOU Mühghaü to sukojako laukei, “BUNYUBOU, kaibü mütshuong aoyou nyi kaibü sei yaangbü hoba haukibü ikei Ijep kaodak ka leiyenan leijung loukei, haoen khulimbo aila no khau angda?

¹²Amaibü shanga haoei haoen leiyenan leijung loukei, shongha haoen haitila hoba kaothe ka haoei haoen mautila shanga, dogo aila Ijepbü la laueitila? No hatlamoklabü khauang lotbü ka sepeiashi, hoba kaibü mütshuong khulimbo amaibü kümla kibü ka kaibü maangpon jakshaiashima.

¹³No khangenbü Abraham, Isak hoba Israel haoen to nyi no lolo thekolanko laubü kho damenashi: ‘Müha khanshoulitshou tegü ngei kaibü lilabü haatilabü, hoba ngei ho kaodak shanga lenyobü pendou ka la kulabü, hoba kho pendou shanga haoenei phanlabü.’”

¹⁴BUNYUBOUei jembü mütshuong to kümlabü laubü ka haoeibü maangpon sepeikei.

¹⁵Mosa sepeijung ngaian haoeibü ika ngühkhüm dobü laangdak penyi kho jungan shongh ka louyenkei, kho jijihama dobü laangdak kikei; kho hinei hoba thineikei dogo doan kikei.

¹⁶Hobaje laangdak shuong kho Mühghaüeibü kümsilei kikei, hoba dobü kho Mühghaüei laangdaka thüngenan dobü kikei.

¹⁷Mütshuongei ngekjinei Joshuaei haoeneibü ngühlang ditan Mosa to laukei, “Shaishanga wapyobü ngühlang kia.”

¹⁸Mosaei jongaikei, “Ngühlang kho thükbü shangabü ngühlang aying, ayingsi ngühlang ho athük hapan lemenyobü ngühlang aying, lausikei ho chia laubü shuong ngühlang ngei ditda.”

¹⁹Hao shaishang nyangko lousi, masu paangshou hoba mütshuong tombülakbü hapbei, hoba Mosa aeibou khauangkei, hoba haoei haoeibü ik ka laangdak khübü kho tekan apbei, hoba kho shongh youa phetnyinkei

²⁰Hobaje haoenei yaübü masu paangshou kho haoei sungjung louan wana jikan apbei, hoba kho thamngu la yeiko ngünan deitaka phinan jinan kho Israel shousi shuong la yungtikei.

²¹Hobaje Mosaei Aron to laukei, “Nyi habü mütshuong la shabü hatetche shontilabü lele haoenei ka la ai kümbukei?”

²²Aronei laukei, “Ngeibü BUNYUBOU khau kaangje tüang; mütshuong lai amaiko ki kho nyi no lolo ngeakei.

²³Aishanga haoenei kü to laukei, ‘Kün thedanga haula künla mühghaü kümbushi, aieilausi Mosa aoei kün Ijep kaodak ka leiyenan leijung loukei, hao aila yeikei künei angekei.’

²⁴Hobaje ngei haoen to laukei, ‘Aoei hon ki, kho sungenashi’; hibü haoenei kho sungenan kü la kukei, hoba kho ngei wana jinkei, hoba khoka masu paangshou longkei.”

²⁵Ladang mütshuong thepetla athükko Mosaei hapbei; (aieilausi dangbou shuong yoa haoen la nyikulabü lele Aronei haoen ngoualoua aptia.)

²⁶Kheijinei Mosaei shaishang bakhüna loan laukei, “Aoyou BUNYUBOU aenei ki kü jungto kaiya!” Hibü Levi shousi shuong pendou haoen lolo liko hao jungto kamshaikei.

²⁷Haoei haoen to laukei, “Israel Mühghaü BUNYUBOUei hai lauda, mütpem weko lulueibü in shouan shaishang danko bakhün che ka bakhün che to hau longei dogo paiashi, hoba mütpem wekoei lulueibü jaisina hoba mütpem wekoei lulueibü jenabou hoba mütpem wekoei lulueibü lepbou haitiashi.”

²⁸Hobaje Levibü shuongei Mosaeibü ngüh tegü kümbei, hoba khünyet müt hajar sem thüng tuongkei.

²⁹Mosaei laukei, “Tat kanei lulueibü shousi hoba lulueibü jaisina haitibü lembüei BUNYUBOUei kan la haülabü kula shanga BUNYUBOU to müilingbü tegü khangenashi.”

³⁰Nyibounyet Mosaei mütshuong to laukei, “Kanei shedbü yaang shona, hoba tou ngo BUNYUBOU jungto angkho; aingenyu kaneibü shabü hangletla ngei sukujakula thüklabü.”

³¹Mosa toukei BUNYUBOU jungto sepeijung ngaian laukei, “Ügütü, habü mütshuongei shed yaang shona, hoba haoen shanga honeibü mühghaü yaüa.

³²Khei yinga tegükei, nyi haoeneibü shedbü apbuma; khei tekümbho lausije, ngei ka to sudajada, nyi doan phobü kaibü le ka nyi ngeibü nyen haman apashi.”

³³Lausikei BUNYUBOUei Mosa to laukei, “Aoyouei ong kükhu limbo shabü shonkei ngei hao ngeibü le ka haman aplabü.

³⁴Tou hauashi, hoba ngei ka to lenbü kaonyek khüto mütshuong leian hauashi; chühashi, ngeibü hangangbü ka thedanga haulabü; khei yingsikei ngei shieikoelabü chaloua ngei haoeneibü shedbü shanga shieikoelabü.”

³⁵Hobaje BUNYUBOUei haoen shieikoekei, aieilausi Aronei yaübü masu paangshou haoenei khangenkei.