Read Chang Naga LEIYENBÜ 33 Bible Online

LEIYENBÜ 33 - Chang Naga bible

LEIYENBÜ 33

¹Kheijinei BUNYUBOUei Mosa to laukei, “Kaibü shisi shousi shuong la ngei kho kukho, dogo Abraham, Isak hoba Jakob to theyolanyobü kaonyek khüto no hoba Ijep ka nyi leian loubü mütshuong haka meimeijung hauashi.

²Hobaje ka thedangto hangangbü che ngei hautikho hoba Kananbü, Amorbü, Hitbü, Perizbü, Hivbü hoba Jebusbü shian apbulabü.

³Sendei si naodei kouko kibü kaonyek khüto angashi; lausikei kan maangpon kaangbü mütshuong yingbü ka ngei kan lama mautisi amaibüla ngoje kan yoto teloukho.”

⁴Ladang mütshuongei kho ngüh ditkei, haoen maanghaapbei hoba haoen aoeikei honeibü chinem yakmen aleko apbei.

⁵Aishanga BUNYUBOUei Mosa to laukei, “Israel shousi shuong to lenashi, kan khünbüyangbü mütshuong ki; ngo kan yoa longche ongkei angalonga ngei kan mautilabü; hibü ngei kan ai kümla kho ngela shanga tou kaneibü honeibü chinem yakmen kan ka sungenashi.”

⁶Hibü Israelbü shuongei Horeb shongh kaje haoeneibü hele haoen lolo hangletkei.

⁷Ladang ong Israelbü shuongei shaishang kümbei, Mosaei khoka longche bangan neichem dangko lekei; hoba haoei khüto “Shuokshang Neichem” dogo laukei. Hobaje müt atei BUNYUBOU to joyomang sühsi shaishang ka kukan kibü Shokshang Neichem khüto haukei.

⁸Ladang ong Mosa neichem khüto atkei, müt pendou lokei, mütpem weko lulueibü neichem koukhüna, hoba neichem khüto ütshongko Mosa to nyek pükan chühko kikei.

⁹Kho tegü Mosa neichem to atan, Mosaei BUNYUBOU to joyotoua sangmei thaonyu kho louyenan koukhüna loan kiteilabü.

¹⁰Ladang ong mütshuongei sangmei thaonyu kho neichem koukhüna loan hapbei mütpem weko lulueibü neichem koukhüna loan lembei.

¹¹Müt cheei jembü thangbou to joyobü tegü BUNYUBOUei Mosa to theshuok joyokei, hoba Mosa shaishang to sepeinyu ngaikei; lausikei hao to thuibou Naneibü shou heshoubou Joshua neichem ka akuk.

¹²Mosaei BUNYUBOU to laukei, “Chühashi, nyi kü to lenko loukei, ‘Habü mütshuong leian hauashi,’ lausikei nyi kü yoa ao hautilaje kü la müt kho angetikei. Nyi laukei, ‘Ngei kaibü nyen ngeakei, hoba kü thedanga nyi onou hapa.’

¹³Hibü ngei tou ka to sudajada, ka thedanga ngei onou hapbei yingalonga, ngei ka thedanga onou hapla shanga tou kaibü lamnyu shuong kü la lenbüma: hoba ho phang ho kaibü phang dogo daman chühshima.”

¹⁴BUNYUBOUei jongaikei, “Ngo yobü ka yoa haulabü, hoba ngei ka la hakso kulabü.”

¹⁵Kheijinei Mosaei hao to laukei, “No yobü kün yoa ohaulonga kün haka leian tüangma.

¹⁶Aieilausi ai ka ngo hoba kaibü eikshuongei ka thedanga onou hapa dogo ngela thükla? Kaonyudaka kibü mütshuong pendou yo ka ngo hoba kaibü eikshuong kün phang mütli che yeitilabü lele no kün yoa haubüei aying lo?”

¹⁷Hobaje BUNYUBOUei Mosa to laukei, “Nyi phebü tegü ngei tükde kümbho; aieilausi nyi kü thedanga onou hapa, hoba ngei kaibü nyen ngeakei.”

¹⁸Kheijinei Mosaei laukei, “Kü la tou kaibü soneikangbü lenbüma.”

¹⁹BUNYUBOUei jongaikei, “Ngo maibü pendou ka thedanga haptikho hoba ka thedanga BUNYUBOU nyen ngetikho; hoba ngei aoyou to onoulaje ngei haoen to onoulabü hoba aoyou to sanouko damlaje haoen to sanouko damlabü.”

²⁰Lausikei haoei laukei, “Nyi kü the hapla athük, aieilausi mütei ngo hapan lang kila athük.”

²¹Kheijinei BUNYUBOUei laukei, “Chühashi, ngo nyangko kishang che kia, hoba no laang thüka lojan.

²²Ladang ngeibü soneikangbü danjung haulaje ngei no laangkokloka phokukho hoba ngo adankhüm shongko ngeibü ikei no kapleplabü.

²³Kheijinei ngei ngeibü ik kuktikho hoba nyi ngeibü tak haplabü, lausikei ngeibü thenyekje ühüplabü.”