Read Chang Naga LEIYENBÜ 34 Bible Online

LEIYENBÜ 34 - Chang Naga bible

LEIYENBÜ 34

¹BUNYUBOUei Mosa to laukei, “Shaangla tegü laangdak penyi thüngenashi, hoba nyi phetnyinbü shaangbü laangdaka kibü ngühshuong kho ngei laangdaka dokukho.

²Ngeyang kho lamlean kiteishi, hoba Sinai shongh to ngeyang kaiyang hoba kho shongh khua no boushou kü thedanga kiteishi.

³Ka yoa aokei aloujan, ayingsi shongha lankei aokei ühüptijan; ayingsi sanlon shuong ayingsi masu shuong kho shongh thedanga alamshautijan.”

⁴Hibü Mosaei shaangla tegü haoei laangdak penyi thüngkei; hoba ngeyang enyu pian BUNYUBOUei hao la sakkubü tegü haoeibü ika laangdak penyi jungan Sinai shongh to angkei.

⁵BUNYUBOU sangmeia louyenan hao yoa lokei hoba BUNYUBOU nyen ngetikei.

⁶Kheijinei BUNYUBOU hao thedangto dankei, hoba ngetikei, “Ngo BUNYUBOU, BUNYUBOU, sanouko dambubou hoba onoubü Mühghaü, khauangla maangyangsho hoba sanoudambü hoba maanglemenbü penbüsoubü.

⁷Hajar, hajar, shanga onou lenda, shedtibü si ngühkhüm lulimbü hoba shabü shanga amai apbuda; lausikei khoei ladangkei shedbü shonbü saopotham ayeitida; nyusibousi shuong shedbü shanga shisi shousi shuong thükto meten sembou leiboubü to sühko phoklamda.”

⁸Hobaje Mosaei tongde kaoae haoeibü khu khüpetkei hoba lembei.

⁹Haoei laukei, “Tou ka thedanga ngei kaibü maangshikbü hapan kialonga, O BUNYUBOU, ngei sudajada, BUNYUBOU kün yoa haukai, aieilausi ho khünbüyangbü mütshuong ki, hoba küneibü shedbü shabü apbuma, hoba kün kaibü phetphanbü shuong yeitishima.”

¹⁰Kheijinei BUNYUBOUei Mosa to laukei, “Chühashi, ngei thebülanbü che kümda, ka mütshuong pendou thedanga kaodak pendoua ayingsi ai phangakei küman achühbü seikümseilei ngei kümbho hoba no aoyou yoa kida, pendouei BUNYUBOUeibü kümsilei haplabü, aieilausi ngei kho kan yoa kümlabü, kho hatlamoklabü che ki.

¹¹Ngei ka la sakkubü nyi tat chühletan phoshi, chühashi, Kananbü, Hitbü, Perizbü, Hivbü hoba Jebusbü ka thedang ka shian sattilabü.

¹²No haushanga kibü kaonyek kabü mütshuong to sangmai teküm, aieilausi khübü kho ka shanga sung che yeibüla no jembü lolo maangsangashi.

¹³Aeiko kanei haoeneibü lemshang netla yeiko jangnyinkujan hoba haoeneibü thaonyu netla yeiko wapyinkushi hoba haoeneibü saopobü thaonyu hoba haoeneibü haatjang kanei wetan attikushi.

¹⁴“Aieilausi kanei lubü mühghaü aikei alemjan aishanga BUNYUBOU aoeibü nyen nyektoshatbou ki, hao nyekto shatbou Mühghaü ki.

¹⁵Aingenyu kaonyeka kibü mütshuong to kan jiyophaiyosi haoeneibü mühghaü phai pejapelako semlanglabü, hoba haoeneibü mühghaü to lemlasalabü hoba atei ho ngealonga kanei lembüsabü phe shaulabü;

¹⁶hoba kaneibü nouyang jayangshousi shuongei haoeneibü nouyang jayangshousi shuong ngatilabü hoba haoeneibü nouyang jayangshousi shuongei haoeneibü mühghaü phai semtilabü hoba haoeneibü shousi shuong haoeneibü mühghaü phai pejapelako semtilabü.

¹⁷“Nyi jembü shanga namei mühghaü teküm.

¹⁸“Tokai ajinbü wentek lem maisho lijan, ngei ka la sakkubü tegü chalou nyetnyet, Abib lita saopoenbü penbü chalou nyi tokai ajinbü wentek shaujan; aieilausi Abib lita no Ijep ka longkei.

¹⁹“Shaang bukbü, shaang shatbü, shatsinam hoba samkeisamuk pendou ngeibü.

²⁰Shaang shatbü gadu san shoushou cheei angthetshi; nyi kho üangthetlonga haoeibü ngüm sükthetkujan, kanei shaang bukbü shou pendou angthetjan. “Aokei kü jungto ik kong aloujan.

²¹“Chalou laknyet kanei kan shanga kümlabü, lausikei nyetbounyet haksoashi, youshap chalouakei hoba youlat jihakei no haksojan.

²²“Nyi balelem jinpünglem yoa nouashi, kho shaangbou whet latbü hoba po thonbü langle küpjembü lem.

²³“Poa semnei sühko kan bousu shuong pendou BUNYUBOU Mühghaü Israel Mühghaü jungto kai.

²⁴Aieilausi kan thedanga phangshuong shian sattikho hoba kaneibü leilang yaangtikukho; ayingsi kan poa semnei BUNYUBOU jungto lemlila angjinei aoeikei kaneibü kaonyek adühlabü.

²⁵“Lemla haitibü sii kho kanei tokai jinbü wentek yoa alemjan, ayingsi khümenbü shanga haitibü kho nyibounyet ngeyang sühko aphojan.

²⁶“Kaneibü kao ka shaangboubü buhek ka maiboutham kanei kaneibü BUNYUBOU Mühghaü chem to sungba. “Kanei lonshou nyunyueibü sendeia tethung.”

²⁷Kheijinei BUNYUBOUei Mosa to laukei, “Habü ngüh ho doashi; aieilausi habü ngühei ngei ka yoa hoba Israelbü yoa theyolanyobü lea.”

²⁸Khonei Mosa BUNYUBOU yoa chalou saonyi nangnak saonyi sühko kikei; haoei ashau ayung hoba haoei laangdaka ngühkhüm an kho dokei.

²⁹Ladang Mosa Sinai shongh ka ika laangdak penyi kho jungan louyenkei, Mosa Mühghaü to joyoan phaia haoeibü thenyek son kho lailaitham kia dogo haoei hao lolo angengaiko kikei.

³⁰Aron si Israel shousi shuong pendouei Mosa hapjinei, chühashi, haoeibü thenyek son lailaitham kikei, hoba hao jungto nyangko loula haoen hatko kikei.

³¹Lausikei Mosaei haoen ngakei, kheijinei Aron hoba shuong leiyeibü pendou hao jungto sepeinyu longeikei, hoba Mosaei haoen to joyokei.

³²Kho phaia Israel shousi shuong pendou nyangko loukei, hoba Sinai shongha BUNYUBOUeibü Ngühkhüma kibü tegü hao to joyobü pendou haoei haoen to lenkei.

³³Ladang Mosaei haoen to joyokhümbei, haoei haoeibü thenyek yuklepbei, hoba Mosaeibü thenyek soneikangko hapbei, kheijinei Mosaei BUNYUBOU to joyola ütshongko haoei haoeibü thenyek neiei yuklepbei.

³⁴Lausikei BUNYUBOU to joyola atjineije hao alongshongko haoei yukbü nei kho nopan phokei, hoba hao longan hao la sakkubü kho Israel shousi shuong to lenkei.

³⁵Hobaje Mosaeibü thenyek Israel shousi shuongei soneikangko hapbei. Hobaje Mosaei BUNYUBOU to joyola ütshongko haoei thenyek yukbü neiei yuklepbei.