Read Chang Naga LEIYENBÜ 35 Bible Online

LEIYENBÜ 35 - Chang Naga bible

LEIYENBÜ 35

¹Mosaei Israel shousi shuong ngashaian haoen to laukei, “Habü ngüh ho jungeila BUNYUBOUei sakkuda.

²Chalou laknyet kanei kümaleiashi, lausikei nyetbounyet kan shanga saopobü chalou kilabü. BUNYUBOU to kaangkosekko haksobü Nounyet che kilabü; aoyouei khünyet kümsilei kümlaje hao hailabü.

³Kanei Nounyet kan kishang pendoua wan ametjan.”

⁴Mosaei Israel mütshuong pendou to laukei, “BUNYUBOUei sakkubü kho ho ki:

⁵Kanei kibü ka BUNYUBOU to lemashi; aoyouei maangnyu angko ki, haoei kho BUNYUBOU jungto lembü jungan kai: hon, chandinam, hoba chinam.

⁶Semjeibü, nakthüngan sakbü, saklangbü, phembanei, nei inyaibü hoba loneibü wi;

⁷hoba sanlon paangeibü khon saklangtham apbo hambü, loneibü khon hoba akasia bu;

⁸hoba ngesakbü shanga hantin, naanglabü shanga onang hoba ponlem hibü teibü shanga shikmei mailabü;

⁹hoba oniks laang hoba ungshedbou saopobü neisimei hoba khükhoma jinlabü namseklaang shuong.

¹⁰“Hobaje kan yoa maangli maangsang mütshuongei louan BUNYUBOUei sakkubü kümsilei pendou kümshi.

¹¹Lemshang neichem kho neichem yuklepbü, hoeibü khangyolabü, hoba wa, thangtet, thaonyu hoba kho thangleplabü:

¹²saopobü busen hoba khonei kaang shuong, onou setshang yuklepbü thangbü nei,

¹³hoba khumsok, khoeibü kaang, chaksiam hoba Mühghaü thedanga phokubü wentek:

¹⁴Tokei ngesakbü shanga wanthung hoba kho shanga peisilei hantin, hoba ngesakbü shanga onang.

¹⁵Hobaje jen ponlem juokshang si kaang, hoba naanglabü onang, ponlem teibü, hoba lemshang neichem koukhüna thangbü,

¹⁶juokbü lembü lemshang, chinameibü shon, khoeibü kaang hoba kho denshang.

¹⁷Lemshang chemsophanga ajinkhümbü shuong, thaonyu shuong hoba khübü hanleplabü hoba lemshang chemsophang koukhüna thangbü;

¹⁸lemshang neichem shanga anjin hoba khongaenei anjin hoba khübü janglüh shuong;

¹⁹lemshanga khangenla shanga maisho takbü neisimei hoba mülingbü kümaleia khangenla shanga Aron müilingbou shanga saopobü neisimei hoba haoeibü shousi shuongeibü hele.”

²⁰Kheijinei Israel shousi shuong pendou Mosa jungka kukkei;

²¹hoba kamshang neichem kümsilei shanga hoba khoeibü kümsilei pendou shanga hoba saopobü neisimei shanga mütpem wekoei luluei mangangbü tegü hoba jembü soushouei thungeibü tegü BUNYUBOU jungto lembü jungan loukei.

²²Bousu yaksa mütpem wekoei luluei maangangbü tegü neia kipbü, noua chibü, ngüma yakbü, nyendobü ikjikhap, hoba honeibü namsek peisilei pendou hoba mütpem wekoei BUNYUBOU la hon lembü kukei.

²³Mütpem weko aoeibü ika pi, nakthüngan sakbü, saklo maibü phembanei inyaibü, loneibü wi, sanlon khon, wailüha thungbü hoba sanlon paangeibü khon wailüha thungbü hoba loneibü khon kikei khübü kho jungan loukei.

²⁴Aoyouei hon si chinameibü lemla thükan kikei haoenei BUNYUBOU jungto lemla jungan loukei; hoba aoyoueibü ika akasia bu kiteikei haoenei khübü kümsilei shanga kho sungbakei.

²⁵Hobaje maangli maangsangbü yaksa wekoei maangnyu angko lei shikkei hoba haoenei shikbü lei, pi lei, nakthüngan sakbü, pa lei, phembanei inyaibü sungbakei.

²⁶Thit thitbü songbüdobü yaksa wekoei loneibü wiei keiwi shikkei.

²⁷Hobaje songdakbü shuongei müilingbü saopobü hele nei hoba khükhoma khangla shanga oniks namsek laang sungbakei;

²⁸hoba haoenei tokei shikmei maibü, ngesakbü shanga wandei hoba naanglabü shanga onang, ponlem sa angtila juoklabü jen sungbakei.

²⁹Israelbü bousu yaksa pendouei maangnyu angbü lembü BUNYUBOUeibü kümsilei pendou shanga Mosaei sakkubü tegü lembü yoshaikei.

³⁰Mosaei Israel shousi shuong to laukei, “Chühashi, Jihuda phang ka Horeibü shi, Urieibü shou Bezalel nyenbü BUNYUBOUei piena;

³¹hao songadoa, ditenbüa, hoba ditletbü songadoa hoba dobüshibü kümsilei phang pendoua;

³²hoba hao hon, chandinam, hoba chinamei kümbü dobüshibü chühjanbü kümsilei shanga,

³³hoba namsek laang pheinyinnyin khangbüa hoba bu jakbü kümaleia ikseibü müt shanga hao BUNYUBOUeibü soushouei shentia.

³⁴Hobaje haoei hao Dan phang ka Ahisamakeibü shou Oholiab, ham haoeibü kümsilei lubü la lenla thüklabü lele haoeibü maangpona sei kua.

³⁵Iksei kümsilei yaangbü kümla chühjanbü kümsilei ikpeisei kümsilei kümbou hoba semjeibü, nakthüngan sakbü, saklangbü, hoba phembaneiei noksa jinan kümbü kümsilei hoba neitakbü kümsilei, kümsilei yaangbü den juong kümbü shuong khübü kümsilei kümla haoei haoen la songsido kukei.