Read Chang Naga LEIYENBÜ 37 Bible Online

LEIYENBÜ 37 - Chang Naga bible

LEIYENBÜ 37

¹Bezalelei ngühkhüm busen kho akasia buei kümbei, tousüng iknop nyi tho, hoba khaang iknop che tho kikei.

²Hobaje haoei kho maanga hoba thüka hon hinseibüei naangkei, hoba kaijembo honei seian leilang lean kümbei.

³Haoei you lei khonei honeibü chikom lei thontikei, jinei chikom penyi, jinei chikom penyi.

⁴Haoei akasia buei kaang kümbei hoba khonei honei naangkei.

⁵Hobaje ngühkhüm busen lengla shanga ngühkhüm busena you aenei haoei kaang shuong khübü kho chikom khonei jinkukei.

⁶Haoei hon lanbüei onoubü setshang kümbei; kho tousünga iknop penyi tho hoba phodaka iknop che tho.

⁷Onoubü setshang tho jiji hama honei yaübü kümsilei honei kaakyembü kherabim penyi haoei kümbei;

⁸kaakyembü kherab che ji thona hoba kaakyembü kherab che ji thona thon penyi hama kaakyembü kherabim kho onoubü setshang chela ong yeian haoei kümbei.

⁹Kaakyembü kherabim kho haoeibü kaak thükae to pinan, haoeneibü kaakei onoubü setshang ngühlepan, theshuokyoko, kaakyembü kherabim thenyek kho onoubü setshang ae yeian kikei.

¹⁰Haoei khümsok kho akasia buei kümbei; süng iknop nyi khaang iknop che tho, hoba suokla iknop che tho;

¹¹hoba haoei kho hon hinseibü naangan kaijembo honei seithetan kümbei.

¹²Hobaje haoei kho kaijembo ikmaang tetche sembung kümbei, hoba kho kaijembo honei leilang lean kümbei.

¹³Hobaje khonei honeibü jikom lei thontikei, kho you leia ko lei kibüa chikom kho jinkei.

¹⁴Khümsok kho lengla shanga kaang denshang shanga thon aenei jangbü chikom shuong kho kikei.

¹⁵Hobaje haoei akasia buei kaang shuong kho kümbei; hoba khümsok kho bela shanga khonei honei khanglepbei.

¹⁶Hobaje khümsok thüka semlüh dei jonbü lem shanga hon lanbüei jen shanga phau, yeian jinla phauyaang, hoba meisok kümbei.

¹⁷Wanthung denshang kho haoei hon lanbüei kümbei, wanthung denshang khoeibü chungthem hoba mang haoei jangan yentian kümbei; khoeibü thung shuong; khoeibü tongbü, hoba khoeibü chipen shuong kho khüto jetei kikei.

¹⁸Kho ka bhek pem lak phekjung satan kikei;

¹⁹wanthung denshang naphei jika bhek sem tongbü che, chipen che, bhek chenei kei almond chipen pungbü tegü kümbü thung sem tongbü che hoba chipen che kho tegü wanthung denshang ka bhek lak satbü kho kikei.

²⁰Hobaje wanthung denshang khonei thung lei, almond chipen pungbü tegü, tongbü hoba chipen shuong kikei.

²¹Hobaje bhek penyi bang khonei khoto yoko chela ong yeitian tongbü che, hoba bhek penyi phang khonei kho to yoko che la ong yeitiko tongbü che dogo bhek lak kho ka phekjung satbü kikei.

²²Khübü tongbü hoba khübü bhek kho to jetei ong kikei; kho khümbo hon lanbüei jangan yentibü kikei.

²³Haoei wanthung pem nyet hoba khoeibü lei hoba wannuei kipan apbü hon lanbüei kümbei.

²⁴Hon lanbü seret khujinei haoei khübü peisilei shuong pendou kümbei.

²⁵Haoei jen juokbü lemshon kho akasia buei kümbei; tousüng iknop che, phodak iknop che, dogo ji ji lei pendou jeteitei kümbei; suokla iknop penyi kikei; laang khübü kho khüto jetei ong kikei.

²⁶Hobaje khoeibü thükaenei ko kaijembo hoba laang shuong kho hon lanbüei khanglepbei; hoba kho kaijembo honei seilepan kümbei.

²⁷Hobaje kho lengla shanga khoeibü naphei jiji hama kaang thon thona ikhatshang shanga honei seithetan kümbü phanga honeibü chikom penyi kümbei.

²⁸Haoei kaang kho akasia buei kümbei, hoba khonei honei naanglepbei.

²⁹Hobaje haoei saopobü naanglabü onang kho hoba shikmei maibü ponlüm teishikbü kho ponlem kümbü songeihonei kümbei.