Read Chang Naga LEIYENBÜ 38 Bible Online

LEIYENBÜ 38 - Chang Naga bible

LEIYENBÜ 38

¹Hobaje haoei juokbü lembü lemshang kho akasia buei kümbei, chemnyek lei aenei jeteitei tousüng iknop ngao, hoba phodak iknop ngao, suokla iknop sem.

²Hobaje khoeibü chemnyek lei aenei haoei laang kümbei; laang shuong kho khüto jeteitei ong kikei; hoba haoei khonei chinamei khanglepbei.

³Hobaje lemshang peisilei pendou haoei kümbei, chak, suokjin, phau, pheyaüjin, hoba wankak kipjin, suokjin, peisilei pendou haoei chinamei kümbei.

⁴Hobaje lemshang shanga chakshon phang kaijembo lom sühko longko haoei kümbei.

⁵Hobaje kaang denshang lela shanga haoei chemnyek lei shanga chikom lei thontikei.

⁶Haoei kaang kho akasia buei kümbei hoba khonei chinam jinkei.

⁷Hobaje la shanga lemshang napheinei haoei kaang shuong kho haoei chikoma jinkukei; hoba haoei kho shempheiei kuokjung adan kümbei.

⁸Hobaje kamshang neichem koukhün junga yaksa shuongeibü mangchüh si chinam ka sakla samlabü phauyaang hoba kamshang neichema khangenbü shuong shanga kümbei.

⁹Kho phaia haoei khongmang kümbei; chaaenei khongmang kümbü khonei haoei shenbü phembanei maibü iknop saongao saüan phokei.

¹⁰Khübü thaonyu saoche hoba yukjin saoche chinamei kümbei: thaonyu juetbü hoba kaithetbü kho chandinam.

¹¹Khongmang kho yungkük ae neikei jetei kikei.

¹²Chanep aenei thangtetbü kho iknop anjinsem thaonyu an hoba yukleplabü an; thaonyu juetbü hoba kaithetbü kho chandinam.

¹³Hobaje chaangbou aenei iknop anjinsem.

¹⁴Koukhün jipheinei thangtet nei kho iknop anthükngao kikei, thaonyu sem hoba yukleplabü sem kikei.

¹⁵Hobaje koukhün jijiham shanga thangtet nei kho iknop anthükngao kikei; thaonyu sem hoba yukleplabü sem kikei.

¹⁶Khongmanga thangtet nei pendou kho shenbü phembanei maibüei kümbü kikei.

¹⁷Hobaje thaonyu shanga hanleplabü kho chinam kikei, thaonyu juetbü hoba kaithetbü khübü kho chandinamei kümbü kikei hoba thükaenei thaonyu sembunga khanglepbü kho chandinam kikei: hoba khongmang thaonyu pendou kho chandinamei kailepkhüman kikei.

¹⁸Hobaje khongmang koukhün shanga thangtetbü kho noksa jinan kümbü kikei, pi laü, nakthüngan sakbü, sakbü, panyat hoba shenbü phembanei maibü; hoba tousüng iknop saoche, hoba khongmang thangtetbü khoto thangyenko hoba suokla iknop ngao kikei.

¹⁹Hobaje khübü thaonyu kho lei hoba yukleplabükei lei chinamei kümbü yingan kikei; khübü juetbü kho chandinamei hoba khübü thaonyu sembung hoba kaingaibü shuong kho chandinam kikei.

²⁰Hobaje lemshang neichem jaangbü pendou hoba khongmang pendou kho chinamei kaijeman kikei.

²¹Lemshang neichem shanga yoshaibü peisilei shuong habü ho ki, khei langkei aukabü doan phobü lemshang; laobou Mosaei Levi shuongei kümlaleilabü dogo sakkuan Aron ungshedboueibü shou Ithamar ikjai leko kümtikei.

²²Hobaje Jihudabü chemdang Hureibü shi kho Urieibü shou Bezalelei BUNYUBOUei Mosa la sakkubü pendou kümbei.

²³Hobaje hao yoa Dan chemdang ka Ahisamakeibü shou Oholiabei laanga thüngyetan dobü hoba iksei kümsilei kümbü che noksa jinan pilaü, nakthüngan sakbü, panyat hoba phembanei inyaibüei kümbo kikei.

²⁴Lemshang maisho yeijinei hon lebü pendouei seret saongao setto anjinlei hoba shekel saongao nyet to khujin kho lemshang kabü seret hauan chühkei.

²⁵Hobaje lühbaka kibü shuong ka chandinam seret hajar sem, hoba shekel hajar che, saongao nyet to anjinleito ngao, kho lemshang kabü seret hauan chühkei;

²⁶lühbaka kibü mütpem wekoei beka che kho lemshanga kibüei tho che, hoba po saoche thükae bousu pendou 603,550.

²⁷Hobaje chandinam seret hajar sem kho lemshang yuklepla shanga hoba thangtetbü yuklepla shanga kikei; hoba chandinam seret hajar sem shanga yukleplabü saongao, yukleplabü weko seret khujin bang.

²⁸Hobaje joubü chandinam hajar che, saongaonyet to anjinleito ngao kho thaonyu shuong juetbü, thükaenei thaonyu sembunga khanglepan kaingailabü haoei kümbei.

²⁹Hobaje lemla yoshaibü chinam pendouei seret hajar cheto saongao; hoba shekel hajar nyito saongao lei kikei.

³⁰Hobaje khoei lemshang neichem koukhün küpleplabü hoba chinamei kümbü lemshang hoba kho shanga chinamei hinseibü hoba lemshanga peisilei pendou,

³¹hoba khongmaanga yukleplabü hoba lemshang neichema jaanglabü hoba khongmang kaijembo jaanglabü pendou kümbei.