Read Chang Naga LEIYENBÜ 39 Bible Online

LEIYENBÜ 39 - Chang Naga bible

LEIYENBÜ 39

¹BUNYUBOUei sakkubü tegü pilaü, nakthüngan sakbü, saklo maian sakbüei saoposhanga khangenla neisimei maibü, hoba Aron shanga saopobü neisimei haoenei kümbei.

²Hobaje ungshedbou saopobü neisimei kho hon, pilaü, nakthüngan sakbü, saklomaibü, hoba shenbü phembanei maibüei haoenei kümbei,

³hoba kho noksa kümbü shuongei pilaü, nakthüngan sakbü, hoba saklo maibüei kümla shanga netla yeiko kipnyinkei.

⁴Kho shanga phakshoka jinla shanga haoenei liko shenyoan kümbei; kho jijiham thon liko shenyoan kikei.

⁵Khonei jetei hoba kümsilei phatyoko kikei, hon, pilaü, nakthüngan sakbü, saklo maibü, hoba shenbü phembanei maibüei kümbü kikei; kho BUNYUBOUei Mosa la sakkubü tegü kikei.

⁶Hobaje haoenei oniks namseklaang kümbei hoba kho Israel shousi shuong nyen tegü thüngan phobü shangjin shangan hona anjin denshanga khinan phokei.

⁷Hobaje BUNYUBOUei Mosa la sakkubü tegü Israel shousi shuong shanga damanchühlabü namseklaang yingla shanga haoei khübü kho phakshoka ungshedbou saopobü neia phenkei.

⁸Hobaje haoei khükhom kho ungshedbou saopobü hele tegü, iksei kümsileiei kümbei; kho hon, pilaü, nakthüngan sakbü, saklo maian sakbü, hoba shenbü phembanei maibüei kümbei,

⁹kho naphei lei pendou jetei kikei; khükhom kho haoenei nyinei nopan kümbei, tousüng ikküm che, hoba phodak ikküm che, kho penyi thüng kikei.

¹⁰Hobaje khonei haoenei laang lin lei khühkei; sardis laang kho shaangbou lin.

¹¹Hobaje nyiboubü lina emerald che, safair che, hoba daimond che,

¹²hoba semboubü lin jacint che, aget che, amethis che.

¹³Hobaje leibou lina beril che, oniks che, hoba jasper che, khübü lin pendou hanei kaijembo naanglepbei.

¹⁴Hobaje laang shuong kho Israel shousi shuong nyen tegü kikei, tetsida shangbü thüngyetbü tegü pem weko lulueibü nyen tegü chung anthüknyi shanga kikei.

¹⁵Hobaje khükhoma haoenei janglüh tegü yangmen hon hinseibüei wouan kümbei.

¹⁶Hobaje haoenei hon yakpit penyi hoba honeibü chikom penyi kümbei, hoba chikom penyi kho khükhom thon bangkoa phenkei.

¹⁷Hobaje phenyobü honeibü namminshou penyi kho haoenei chikom penyi thüka khükhom thonbü jinei phenkei.

¹⁸Hobaje shenyobü namlüh jinei kibü thon penyi kho haoenei hon yakpit penyi khonei phenkei hoba kho phakshoka hopbü ungshedbou saopobü neisimei thedanga phenyokei.

¹⁹Hobaje haoenei hon chikom penyi kümbei, hoba ungshedbou saopobü neisimei maanga thona khükhom thonbü penyi thüka kho phenkei.

²⁰Hobaje haoenei chikom penyi kümbei hoba kho ungshedbou saopobü neisimei thedanga phakshoka thipbü penyi khüto phenkei, kho maang aenei shenyoshang nyangko shembe kaibü thüka.

²¹BUNYUBOUei Mosa la sakkubü tegü, khükhom kho shembe kaibü thüka kilabü, hoba kho ungshedbou saopobü neisimei chikom to pilaü leiei shenkei.

²²Hobaje ungshed neisimei takbü pendou pilaüei kümbei;

²³hoba neisimei jenyua ajitnyinla shanga laakbü hongbü neisimeia khün yetbü tegü kümbü neithon kaiko shian jinkei.

²⁴Hobaje shembe nei thüka haoenei chilang chipen, pilaü, nakthüngan sakbü, saklangbü, hoba shenbü phembanei kümbei.

²⁵Hobaje haoenei hon hinseibüei nüngnüng kümbei hoba nüngnüng kho shembe nei kaijembo chilang chipen shuong kanglanga phenkei.

²⁶Nüngnüng che, chilang chipen che, nüngnüng che che, chilang chipen che, BUNYUBOUei Mosa to lenbü tegü, shembenei kaijembo khangenbü kümsilei shanga kümbei.

²⁷Tokei haoenei Aron si hao shousi shuong shanga phemba maibüei takbü mangyuk kümbei,

²⁸hoba phembanei maibüei khun hoba phemba inyaibüei takbü youshang,

²⁹hoba yikyobü phembaneiei shembe hoba pilaü, nakthüngan sakbü, hoba saklangbü, noksa kümbüei kümbü kümsilei, kho BUNYUBOUei Mosa la sakkubü tegü kümbei.

³⁰Hobaje haoenei hon lanbüei saopobü khun, hoba thüngyetan shangjinbü kümbü tegü kho thüka dokei, “BUNYUBOU TO SAOPOBÜ.”

³¹Hobaje khonei haoenei jolüh shobü pilaüei khuphai thüka phenla shanga kümbei; kho BUNYUBOUei Mosa la sakkubü tegü kikei.

³²Kho tegü BUNYUBOU yobü kamshang neichema lemshang neichem kümsilei pendou wankei; hoba Israel shousi shuongei Mosa la BUNYUBOUei sakkubü tegü pendou haoenei kümbei.

³³Hobaje lemshang neichem hoba kho kabü peisilei pendou juetlabü wa, thangtetlabü thaonyu hoba hanleplabü shuong haoenei Mosa jungto;

³⁴hoba sanlon paangeibü khon paa thungbü küpleplabü khon yukleplabü thangtetlabü thangtet anjin sungbakei.

³⁵Ngühkhüm busen yoa kaang hoba onoubü setshang;

³⁶khümsok hoba khoeibü peisilei pendou hoba Mühghaü thedanga phobü wentek;

³⁷hon lanbüeibü wanthung, khübü wanthung shuong, khübü thenkei thenko pholabü wanthung shuongei hoba khübü peisilei pendou hoba ngesakbü shanga haabü.

³⁸Hobaje honei kümbü lemshang hoba naanglabü onang, hoba ponlem shanga teibü, hoba neichem koukhün shanga thangjin;

³⁹chinamei kümbü lemshang hoba khonei chinamei küng yembei kho shanga kaang hoba kho shanga peisilei pendou hoba saklasamla phauyaang hoba kho denshang.

⁴⁰Hobaje khongmang thangtet shuong khübü shanga thaonyu shuong hoba kho yukleplabü hoba khongmang koukhün thangtetlabü hoba khübüeibü lühshuong hoba khoeibü jaanglabü, hoba kamshang neichem shanga peisilei pendou,

⁴¹lemshang khangenla shanga neisimei maibü kümbü hoba ungshed kümsileia khangenla shanga Aron ungshedbou shanga neisimei hoba haoeibü shousi shuong shanga neisimei.

⁴²BUNYUBOUei Mosa la sakkubü tegü Israel shousi shuongei kümsilei pendou kümbei.

⁴³Hobaje Mosaei kümsilei pendou kho hapbei, hoba chühashi, haoenei kho yeikei; BUNYUBOUei Mosa la sakkubü tegü haoenei kümbei; hoba Mosaei haoen haükukei.