Read Chang Naga LEIYENBÜ 4 Bible Online

LEIYENBÜ 4 - Chang Naga bible

LEIYENBÜ 4

¹Kheijinei Mosaei BUNYUBOU to jongaiko laukei, “Lausikei haoenei kü to maialembo ayingsi kü ngüh aditko ‘BUNYUBOU ka jungto along dogo laualonga ngei ai laula?’ ”

²Kheijinei BUNYUBOUei hao to laukei, “Kaibü ika kibü kho ai?” Haoei jongaikei, “Julo che.”

³BUNYUBOUei laukei, “Kho kao to attiashi.” Hibü haoei kho kaoa attikei, hoba ju khoei pinyu che yeikei, hoba hao khoto hatla laangjung satkei.

⁴Kheijinei BUNYUBOUei Mosa to laukei, “Kaibü ik shingan hoeibü meia yaüan sungashi.” Hibü Mosaei haoeibü ik shingan pinyu kho lapan sungkei hoba haoeibü ika ju la yeingaikei.

⁵BUNYUBOUei laukei, “Ho hai yingalonga haoenei haoeneibü pisibousi shuongeibü BUNYUBOU Mühghaü Abraham Mühghaü, Isak Mühghaü hoba Jakob Mühghaü, ka jungto longa dogo haoenei mailemlabü.”

⁶Tokei BUNYUBOUei Mosa to laukei, “Kaibü ik kaibü khukua phoashi.” Hibü Mosaei haoeibü ik haoeibü khukua phokei, hoba ladang haoei kho sungenkei kho ninthu tegü im longan kikei.

⁷Kheijinei BUNYUBOUei hao to laukei, “Tou kaibü ik kaibü khukua phongaiashi.” Hibü Mosaei haoeibü ik haoeibü khukua phongaikei, hoba ladang haoei kho sungenkei, kho nyishou tegübü phela yeian kikei.

⁸Kheijinei BUNYUBOUei laukei, “Haoenei ka to shaangbü seikümseileia maialemlonga ayingsi ngüha alelonga, nyiboubü toje ngüha lela thükkei.

⁹Lausikei haoenei seikümseilei penyi hama maialem ayingsi ngüha alelonga nyi Nail shumang ka khubü dei kho sii la yeilabü.”

¹⁰Kheijinei Mosaei BUNYUBOU to laukei, “O BUNYUBOU, shangieda thama, ayingsi nyi ka sambou to joyoan phaia ongkei ngei mülan athük, aieilausi ngo ngüh laula athitthit hoba apekpek.”

¹¹BUNYUBOUei hao to laukei, “Müteibü sembung aoei kümbei? Ayingsi obangbü si likhipbü kho aoei yeitida? Ayingsi aoei haptida hoba nyek thutida? Kho ngo BUNYUBOU aying lo?

¹²Hibü, tou hauashi, hoba ngüh laula ngei thuilabü, hoba nyi ai laula kho ngei ka la lenlabü.”

¹³Lausikei Mosaei laukei, “O BUNYUBOU, sanoudambo lubü che hautishi.”

¹⁴Kheijinei BUNYUBOU Mosa to khauangkei hoba laukei, “Levi mütlia kajai Aron aki lo? Haoei maisho laula thükkei dogo ngei ngeakei. Toukei hao ka to haüyola louada; hoba ladang haoei no haplaje, hao maangpona olinko kilabü.

¹⁵Hobaje nyi hao to joyolabü hoba ngüh shuong kho haoeibü sembunga jinkulabü; hoba lauentila shanga hameibü sembunga ngo yolabü hoba kasiei ai kümla, kho ngei lenlabü.

¹⁶Hobaje eikshuong to ka jeila haoei lenlabü; hoba hao ka shanga sembung tegü hoba no hao shanga Mühghaü tegü kilabü.

¹⁷Lausikei julo, laobouei nyi seikümseilei shuong kümla ki, kho nyi kaibü ika jungjan.”

¹⁸Kheijinei Mosa hao kounyangbou Jethro jungto sepeinyu ngaian hao to laukei, “Ijep kaodaka ngeibü mütli tou sühko lang kilaoje haoen to chühla ngaitikai.” Hobaje Jethroei laukei, “Maisho hauashi.”

¹⁹BUNYUBOUei Midiana Mosa to laukei, “Ijep kaodak to ngaiashi, aieilausi no haitila lambü mütshuong pendou haikhüma.”

²⁰Hibü Mosa haoeibü shousiyak leijung louan gadu thüka settian Ijep kaodak to meimeikei. Hobaje haoei haoeibü ika Mühghaü ju kho jungkei.

²¹BUNYUBOUei Mosa to nyiboukei laukei, “Ladang no Ijep kaodak to sepeinyu ngailaje ngei kaibü ika kubü seikümseilei pendou Farao thedanga kümshi. Lausikei ngei haoeibü maangpon kaangngaitilabü hoba haoei mütshuong kho alitilabü.

²²Nyi Farao to hai lenshi, BUNYUBOUei lauda: Israel küshou, shaangbü shou ki;

²³hoba ngei ka to lenda, ‘Küshou jayangshou kü to lemla hautiashi. Lausikei nyi hao ohauti; hibü ngei kashou jayangshou haitikulabü.’ ”

²⁴Lama sühshanga BUNYUBOU Mosa to haüyokei, hoba hao haitila lambei.

²⁵Kheijinei Zipporaei laang akbü sungjung louan jembü jayangshou kipan apbukei hoba khop kho Mosaeibü you to tekan litikukei; hoba saoei laukei, “Maimaitham kü shanga siiei bukjambü chemkanbou no ki.”

²⁶Hibü BUNYUBOUei Mosa khoyam apyokei. Kheijinei kipan apbü shangabü saoei hai laukei, “Siiei bukjambü chemkanbou no ki.”

²⁷BUNYUBOUei Aron to laukei, “Mosa to haüyola yamto kouashi.” Hibü hao haukei, hoba Mühghaüeibü shongha haoei Mosa haüyoan sembung shepbei.

²⁸Kheijinei Mosaei ai ngüh ong laula BUNYUBOUei hao hautikei, hoba haoei ai seikümseilei kümla sakkukei, khübü pendou Aron to lenkei.

²⁹Kheijinei Mosa si Aron haukei hoba Israel shousi jaishou leiyeibü shuong pendou liko kamshaitikei.

³⁰Hibü BUNYUBOUei Mosa to lenbü ngüh pendou Aronei lenkei, hoba eikshuong yoa seikümseilei kümbei.

³¹Hobaje mütshuongei mailembei, hoba ladang haoenei BUNYUBOUei Israel shousi shuong peanchüha hoba haoei haoen khonkubü hapa dogo ditkei, kheijinei haoen khüpjung kouan Mühghaü to lembei.