Read Chang Naga LEIYENBÜ 40 Bible Online

LEIYENBÜ 40 - Chang Naga bible

LEIYENBÜ 40

¹Kheijinei BUNYUBOUei Mosa to laukei,

²“Shaangboubü lit, shaangboubü chalou shaangbounyeta nyi kamshang neichem, lemshang neichem nyi dangashi;

³hoba ngühkhüm busen kho khünei phoashi;

⁴hoba nyi khümsok kho sungetan phoashi hoba kho thüka peisilei shuong yenkei yenko phoashi, hoba hantin kho jungan lotjan hoba khünei wan sapashi.

⁵Nyi honei kümbü ponlem lemshang kho ngühkhüm busen thedanga phoshi hoba lemshang neichem hoba lemshang koukhün thangbü phoshi.

⁶Hobaje kamshang neichem hoba lemshang neichemeibü koukhün thedanga juokbü lembü phoashi.

⁷Hobaje kamshang neichem si lemshang neichem kanglanga nyi sakbüsambü phauyaang kho phoashi, hoba khünei dei phoashi.

⁸Kho kaiko khongmang kümenashi hoba thangtet nei kho shaishang koukhüna thangashi.

⁹“Hobaje nyi naanglabü jungan louan lemshang neichem hoba khonei kibü pendou to naangashi, khoei khünei kibü peisilei pendou saüenko kho khei saopobü yeitilabü.

¹⁰Hobaje nyi juokbü lembü hoba khoeibü peisilei pendou to onang naangkuashi, hoba lemshang kho saüenkuashi, hoba lemshang kho pendou to saopobou kilabü.

¹¹Hobaje nyi phauyaang hoba kho denshang kho onang naangkuko saüenko yeitishi.

¹²“Hobaje nyi Aron hoba haoeibü shousi shuong kamshang neichem koukhün khüto leian louan haoen deiei sakkushi.

¹³Hobaje nyi Aron la saopobü neisimei lekushi; hoba ungshed kümaleia haoei khangenla shanga nyi hao la onang naangkuko saüenkushi.

¹⁴Hobaje nyi haoeibü shousi shuong leian louan haoen la mangyuk yukkushi.

¹⁵Hobaje haoenei ungshed kümaleia ngo khangenla shanga nyi haoeneibü bou to kümbü tegü nyi haoen la onang naangkushi hoba haoen la onang naangkulabü kho haoen meten sünga haoen shanga kilabü.”

¹⁶Kho tegü Mosaei BUNYUBOUei sakkubü pendou kümbei.

¹⁷Nyibou po, shaangbou lit, khangnyet lemshang neichem kho huongenkei.

¹⁸Hobaje Mosaei hanan attilabü khünei kho tenan phoan kamtak shuong kho huongan, hoba thangtetlabü jinan hoba thaonyu shuong kean lemshang neichem dangkei.

¹⁹Hobaje haoei lemshang neichem binan phokei, hoba thükaenei kho thüka yukleplabü küpletkei, kho BUNYUBOUei Mosa to lenbü tegü kikei.

²⁰Hobaje haoei ngühkhüm sungjung louan ngühkhüm busena jinan phokei, hoba ngühkhüm busena kaang shuong kho suttian phokei, hoba thükaenei saopobü busen thüka onoubü setshang kho phokei;

²¹hoba haoei ngühkhüm busen kho lemshang neichem to sungbakei, hoba toketla shanga thangtet phokei; kho BUNYUBOUei Mosa la sakkubü tegü kikei.

²²Hobaje lemshang neichem chanep aepheinei kamshang neichema thangtet nei thükaenei haoei haoeibü khümsok kho phokei.

²³Hobaje kho thüka haoei wentek kho küpjemetnyu BUNYUBOU thedanga phokei; kho BUNYUBOUei Mosa la sakkubü tegü kikei.

²⁴Hobaje chaaenei lemshang neichem aenei khümsok thedanga haoei wanthung kho phokei.

²⁵Hobaje BUNYUBOUei Mosa la sakkubü tegü BUNYUBOU thedanga wanthung kho jikkei.

²⁶Hobaje honei kümbü lemshang kho thangtet nei thedanga kamshang neichema haoei phokei;

²⁷hoba BUNYUBOUei Mosa la sakkubü tegü, haoei kho thüka shikmei maitibü juokkei.

²⁸Hobaje haoei lemshang neichem toketlabü koukhün kümbei.

²⁹Hobaje kamshang neichema lemshang neichem koukhün junga haoei juokbü lembü hoba shausiyung lembü kukei; kho BUNYUBOUei Mosa la sakkubü tegü kikei.

³⁰Hobaje phauyaang kho kamshang neichem si lemshang kanglanga phokei, hoba sakla shanga khonei dei jinkei.

³¹Mosa, Aron hoba haoeibü shousi shuongei khonei you si ik makkei.

³²Hobaje BUNYUBOUei Mosa la sakkubü tegü, haoen kamshang neichem to lotjinei hoba lemshang nyangko haoen loujinei haoenei you si ik makkei.

³³Hobaje haoei lemshang neichem hoba lemshang kaijembo khongmang kümbei hoba khongmang khonei thangtetbü phokei; kho tegü Mosaei kümsilei kümsembei.

³⁴Kheijinei sangmeiei kamshang neichem kho denlepbei, hoba BUNYUBOUeibü soneikangbüei lemshang neichem kho shenkei.

³⁵Hobaje Mosa kamshang neichem khüto atla athükko kikei, aieilausi kho thüka sangmei kikei, hoba BUNYUBOUeibü soneikangbüei lemshang neichem kho shenan kikei.

³⁶Hobaje ladang ong sangmei kho lemshang neichem ka tonenkei, kheijinei Israel shousi shuongei haoeneibü lama paibü sünga thedang ae haukei;

³⁷lausikei sangmei kho atonenko kialonga kho tonjung üangshongko haoen ameimei.

³⁸Aieilausi haoeneibü lama paibü sünga Israelbü chungsiphang pendouei hapbo lemshang neichem thüka changea BUNYUBOUeibü sangmei hoba nangnak wan kikei.