Read Chang Naga LEIYENBÜ 5 Bible Online

LEIYENBÜ 5 - Chang Naga bible

LEIYENBÜ 5

¹Kho phaia Mosa si Aron Ijep choba jungto hauan laukei, “BUNYUBOUei lauda: ‘Yama haoenei kü shangabü lem lilabü lele kü mütshuong hautiashi.’ ”

²Hobaje Faraoei laukei, “Israelbü hautila ngei hao ngüha lelabü lele BUNYUBOU kho ao? Ngei BUNYUBOU kho angekei, hoba toukei ngei Israelbü ohautilabü.”

³Kheijinei Mosa si Aronei jongaiko laukei, “Ibribü Mühghaü kün to haüyoa. BUNYUBOU küneibü Mühghaü to lemla shanga kün chalou sem lam koutikai dogo künei ka to sudajada; khei ayinglonga haoei mühsinou hoba inlouei kün shieikoelabü.”

⁴Lausikei Ijep chobaei haosi to laukei, “Mosa si Aron, kasiei aila mütshuong haoeneibü kümkaleika nangtida? Kan lulueibü kümtoleito hauashi!”

⁵Hobaje Faraoei laukei, “Chühashi, tou kaonyeka kan mütshuong mütshang juongbou hoba kanei haoen lulueibü kümsilei ka haksotida!”

⁶Khünyettham, Faraoei aaoleibü si ikjaibü shuong to laukei,

⁷“Shangied tegü kanei mütshuong la thamjuoklaang kümla youho teku, haoenei haoen lolo youho yoshaitiashi.

⁸Lausikei shaangla haoenei thamjuoklaang lajuche kümbei khüjoche kümshi dogo sakkujan; kanei kho to ashitijan. Haoen haulohaushed, khoei haoenei ngekko lauda, ‘Küneibü Mühghaü to lemla hautishi.’

⁹Mütshuong la kümsilei sekbou kushi; haoen khünei kümtishi, hoba haoen amlangbü ngüha maang teku.”

¹⁰Kheijinei aaoleibü shuong si ikjaibü shuong hauan mütshuong to laukei, “Farao Chobaei ho tegü lauda: Ngei kan la youho akulabü.

¹¹Kan lolo hauan, kanei laka haplaje yoshaishi, lausikei kaneibü kümsilei aikei ashitilabü.”

¹²Hibü mütshuong Ijep kaodak pendou ae youho shanga youkung lamla aakei.

¹³Hobaje aaoleibü shuongei laukei, “Youho kijinei kümbü tegü kanei chalou angbou takletbü kümsilei khümtiashi.”

¹⁴Faraoeibü aaoleibü shuongei haoen phanga phobü Israelbü ikjaibü shuong to ngümbo phekei, “Shangied thamjuoklaang kümbü tegü kanei aila mietkei tatkei kümsilei ayeiti?”

¹⁵Kheijinei Israelbü ikjaibü shuong Farao jungto sühko louan laukei, “Kaibü sambü shuong to nyi aila hainyu jungeida?

¹⁶Kaibü sambü shuong la youho akunyu haoenei kün to thamjuoklaang kümashi dogo lauda! Chühashi, kaibü sambü shuong to ngümda, lausikei kaibü eikshuong shedbü yingkei.”

¹⁷Lausikei Faraoei laukei, “Kan haulo haushed, kan haulo haushed, khoei ong kanei, ‘Kün BUNYUBOU to lemla hautikai,’ dogo kanei lauda.

¹⁸Hibü tou kümsilei to ngaiashi. Kan la ai youho akulabü, lankei kanei thamjuoklaang takletbü longtijan.”

¹⁹Kanei kaneibü chalou angbou thamjuoklaang takletbü ontijan dogo laujinei Israelbü ikjaibü shuongei haoeneibü thu amaiboua kiteikei dogo damenkei.

²⁰Hobaje haoen Farao jungka longjinei haoenei Mosa si Aron lama haoen haiteiko loan haüyokei.

²¹Haoenei haosi to laukei, “BUNYUBOUei kasi to nachüh hoba mat najema! Farao si haoeibü yaangenbü shuong thedanga kün kasiei mangsentia hoba haoen ikto kün haitila inlou yembua.”

²²Kheijinei Mosa BUNYUBOU jungto sepeijung ngaian laukei, “Aila habü mütshuong to amaiko jungeikei? Aila nyi ngo hautikei?

²³Aishanga ngo Farao jungto ka nyena joyola haubü ka jaüan haoei habü mütshuong to amaiko jungeikei; hoba nyi ka mütshuong khümenla aikei aküm.”