Read Chang Naga LEIYENBÜ 7 Bible Online

LEIYENBÜ 7 - Chang Naga bible

LEIYENBÜ 7

¹Kheijinei BUNYUBOUei Mosa to laukei, “Chühashi, ngei no Farao junga Mühghaü che tegü yeitida; hoba kajai Aron ka shanga thuseibü yinglabü.

²Ngei ka la sakkubü pendou joyolabü hoba Faraoei Israel shousi shuong haoeibü kaodak ka sattila kajai Aronei hao to joyolabü.

³Lausikei ngei Farao maang kaangtilabü, hoba ngeibü tetsida hoba seikümseilei Ijep kaodaka haatilabü,

⁴lausikei Faraoei ka to ngüha alekulabü. Kheijinei ngei Ijep to ngeibü ik atlabü hoba matjem yaangei Ijep kaodak ka kü mütli Israel shousi shuong leiyenlabü.

⁵Hobaje ladang ngei Ijep thükto ngei ik shingan Israel shousi shuong haoen yoka leiyenlaje, kheijinei Ijepbüei ngo BUNYUBOU ki dogo ngelabü.”

⁶Hobaje Mosa si Aron hamei BUNYUBOUei haosi to lenbü kümbei.

⁷Hobaje haosiei Farao to joyojinei Mosa po saolei hoba Aron saoleito sem kiteikei.

⁸BUNYUBOUei Mosa si Aron to laukei,

⁹“Ladang Faraoei ka to, ‘Nyi seikümseilei che lenashi’ dogo laulaje kheijinei nyi Aron to haoeibü ju sungan Farao thedangto tekan litikula lenshi, hoba khoei pinyu che la yeilabü.”

¹⁰Hibü Mosa si Aron Farao jungto haukei, hoba BUNYUBOUei sakkubü tegü kümbei. Aronei Farao si hao khangenbü thedanga haoeibü ju attikei; hoba kho pinyu che la yeikei.

¹¹Kheijinei Faraoei songngedongebü hoba huonseibü shuong ngaishaikei, hoba Ijep kaodak kabü huonseibü shuongeikei thapboseiko kho tegü kümbei.

¹²Aishanga haoen mütpem wekoei lulueibü ju attikei, hoba khübü kho pinyu la yeikei. Lausikei Aroneibü Juei haoeneibü ju pendou suian apbei.

¹³Khei yingankei Farao maangpon kaangkhühtham yeikei, hoba BUNYUBOUei laubü tegü haoei haosi to ngüha ale.

¹⁴Kheijinei BUNYUBOUei Mosa to laukei, “Farao maangpon kaangan apa, hoba haoei eikshuong hautila maangüangda.

¹⁵Ngeyang Farao Nail yungko to haujinei no hao jungto hauashi. Hobaje nyi pinyu la yeitibü ju kho ka ika jungan yungkoa haiyeiko kishi.

¹⁶Hobaje nyi hao to lenshi, ‘Ibri Mühghaü BUNYUBOUei ka to ho lenla ngo hautikei: Yama haoenei kü to lemtila shanga kü mütshuong hautiashi. Lausikei nyi tou sühko ngüha ale.

¹⁷BUNYUBOUei ho hai lauda: Hoei nyi ngo BUNYUBOU kia dogo ngelabü: Chühashi, kü ik kabü ju hoei ngei dei to ngümlabü, hoba kho sii la yeilabü.

¹⁸Hobaje Nail shumanga kibü ngau hailabü, hoba shumang khüka nyaülüm hilabü; hoba Ijepbüei khüka dei yungla asomlabü.’ ”

¹⁹Hobaje BUNYUBOUei Mosa to lenkei, “Aron to lenashi, ‘Kaibü ju jungashi, hoba sii yeitila shanga kaibü ik Ijep dei shuong khei, shumang shuong, deilam shuong, hoba sametbü deidang shuong thüka kaibü ik shingan ngümashi. Hobaje Ijep kaodak pendoua buphau si laangphau pendoua sii kilabü.’ ”

²⁰Kheijinei Mosa si Aronei BUNYUBOUei sakkubü tegü kümbei. Hobaje Aronei Farao si hao khangenbü thedanga haoeibü ju tuokkei hoba Nail shumang kabü dei to ngümbei, hoba shumanga kibü dei pendou sii la yeikei.

²¹Shumang kabü ngau pendou haikei, hoba shumang ka nyaülüm hibüei Ijepbüei shumang ka dei ayungen. Hobaje Ijep kaodak pendou aenei sii kikei.

²²Lausikei Ijep kabü huonseibü shuongeikei thapboseiko kho tegü kümbei, khoei Farao maangpon kaangngaikei; hoba BUNYUBOUei joyobü tegü, haoei Mosa si Aron ngüha ale.

²³Yongbou, Farao haoeibü chobachem to khüpeinyu ngaikei, hoba kho shangabü maangpona ongkei apho.

²⁴Hobaje Ijepbü pendouei Nail yungkoa yunglabü dei lambo thukei, aishanga haoenei shumang dei kho ayungen.

²⁵BUNYUBOUei shumang to ngüman phaia chalou nyet onkei.